༢༠༡༣ ཟླ་ ༧ ཚེས་ ༡༦ རེས་གཟའ་མིག་དམར།

༄༅། །ཕྱི་ལོ་ ༢༠༡༣ ཟླ་ ༧ ཚེས་ ༡༥ ཉིན་སུད་སི་གྲོས་ཚོགས་ཀྱི་ཚོགས་གཙོ་ལྕམ་སྐུ་མ་ཡ་གྷ་རཕ་(Ms. Maya Graf ) མཆོག་དང་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་མཇལ་འཕྲད་གནང་འདུག དེ་ཡང་ཚོགས་གཙོ་རྣམ་གཉིས་སུད་སིའི་གྲོང་ཁྱེར་ཛུ་རིཀ་ཏུ་ཉིང་གུང་གསོལ་ཚིགས་དང་སྟབས་བསྟུན་ནང་མོལ་མཇལ་འཕྲད་སྐབས། བོད་མི་མང་སྤྱི་འཐུས་ཚོགས་གཙོ་མཆོག་གིས་ཁོང་ལ་ད་ལྟའི་བོད་ནང་གི་གནས་སྟངས་ཛ་དྲག་ཡིན་སྐོར་དང། ཚོགས་གཙོའི་སུད་སི་དང་ཨི་ཊ་ལི་ཁུལ་གྱི་ཚོགས་འདུའི་སྐོར་ལའང་གསུངས་ཡོད།

ལྕམ་སྐུ་མ་ཡ་གྷ་རཕ་མཆོག་གིས་འདི་ལོའི་ཟླ་ ༤ པའི་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སུད་སིར་ཆིབས་སྒྱུར་སྐབས་སུད་སི་གྲོས་ཚོགས་ནང་གདན་འདྲེན་ཞུས་ཡོད་པ་དང། གྲོས་ཚོགས་ཀྱི་ཚོགས་གཙོར་མ་འཁོད་གོང་དེར་བོད་མིའི་སྒྲིག་འཛུགས་ཀྱི་སྲདི་སྐྱོང་མཆོག་དང་ཡང་མཇལ་འཕྲད་གནང་ཡོད། ལྕམ་སྐུ་མཆོག་ནས་དུས་ཡུན་རིང་པོའི་རིང་སུད་སི་གྲོས་ཚོགས་ནང་གི་བོད་དོན་རྒྱབ་སྐྱོར་བའི་ཚོགས་མི་གནང་ཡོད། དེ་བཞིན་ཕྱི་ལོ་ ༢༠༠༣ ལོར་རྡ་སར་ཕེབས་མྱོང་ཡོད།

དེ་བཞིན་ཕྱི་ཚེས་ ༡༣ རེས་གཟའ་སྤེན་པའི་ཉིན་སུད་སི་བོད་རིགས་ཀྱིས་གོ་སྒྲིག་འོག་བོད་མི་མང་སྤྱི་འཐུས་ཚོགས་གཙོ་མཆོག་གིས་སུད་སི་དང་ལེཀ་ཏེན་སིཊཡན་ཁུལ་དུ་གནས་སྡོད་བོད་རིགས་རྣམས་དང་ལྷན་ཐུག་འཕྲད་ཀྱིས་མང་ཚོགས་ཀྱི་དྲི་བར་ལན་འདེབས་གནང་ཡོད། སྐབས་དེར་ཚོགས་གཙོ་མཆོག་གིས་བོད་མི་རྣམས་ནས་བོད་ཀྱི་བདེན་དོན་རྣམས་འཕྱུགས་མེད་ཐོག་མི་གཞན་ལ་འགྲེལ་བརྗོད་རྣལ་མ་རྒྱག་ཐུབ་ཆེད་སོ་སོའི་ངོས་ནས་དུས་རྒྱུན་དུ་བོད་དོན་ལ་དོ་སྣང་ཤུགས་ཆེ་ཙམ་བྱེད་དགོས་སྐོར་གསུངས་ཡོད། ལྷག་པར་ཚོགས་གཙོ་མཆོག་གིས་གཉིས་སྨན་དབུ་མའི་ལམ་གྱི་སྲིད་བྱུས་སྐོར་གསུངས་ཡོད་པ་མ་ཟད། སྲིད་བྱུས་འདིར་རྒྱལ་སྤྱིའི་སྤྱི་ཚོགས་དང་རྒྱ་ནག་མི་མང་གི་རྒྱབ་སྐྱོར་བྱེད་བཞིན་ཡོད་སྐོར་སོགས་གསུངས་ཡོད།

ཕྱོགས་མཚུངས་ཚོགས་གཙོ་མཆོག་ཕྱི་ཚེས་ ༥ ཉིན་ཨི་ཊ་ལིའི་གྲོང་ཁྱེར་ཊུ་རིན་དུ་ (Turin) ཚོགས་པའི་རྒྱལ་སྤྱིའི་བོད་དོན་ལྷན་ཚོགས་ཐོག་མཉམ་ཞུགས་གནང་ཡོད་པ་མ་ཟད། ཨི་ཊ་ལིའི་རྒྱལ་ས་རོམ་དུ་བོད་དོན་རྒྱབ་སྐྱོར་བ་དང་ཨི་ཊ་ལིའི་གྲོས་ཚོགས་འཐུས་མི་ཁག་གཅིག་དང་ལྷན་མཇལ་འཕྲད་གནང་ཡོད། སྐབས་དེར་ཨི་ཊ་ལིའི་གྲོས་ཚོགས་འཐུས་མིས་ཨི་ཊ་ལི་གྲོས་ཚོགས་ནང་བོད་དོན་རྒྱབ་སྐྱོར་ཚོགས་པ་བསྐྱར་གསོ་གནང་རྒྱུའི་ཁས་ལེན་གནང་འདུག་པ་བཅས།།