༢༠༡༣ ཟླ་ ༧ ཚེས་ ༡༩ རེས་གཟའ་པ་སངས།
༄༅། །ཕྱི་ལོ་ ༢༠༡༣ ཟླ་ ༧ ཚེས་ ༡༩ འདི་གར་ཁུངས་ལྡན་གྱི་གནས་ཚུལ་འབྱོར་བ་ལྟར་ན། ཕྱི་ཟླ་ ༧ ཚེས་ ༡༦ ཉིན་རྒྱ་ནག་གིས་ཀན་ལྷོ་བོད་རིགས་རང་སྐྱོང་ཁུལ་བཙུགས་ནས་ལོ་ངོ་ ༦༠ འཁོར་བའི་དུས་ཆེན་ལ་ས་གནས་སུ་གཞི་རྒྱ་ཆེན་པོས་གཞུང་འབྲེལ་མཛད་སྒོ་ཚོགས་པར་རྒྱ་ནག་ནང་ཁུལ་གྱི་གླུ་པ་དང་གླུ་མ། སྒྱུ་རྩལ་བ་དང་། དེ་བཞིན་ཀྲུང་དབྱང་བརྙན་འཕྲིན་ཁང་གི་གཙོ་སྐྱོང་བ་སོགས་ཆེད་དུ་ཀན་ལྷོ་ཁུལ་དུ་རིག་རྩལ་དགོང་ཚོགས་བསྡུས་བ་སོགས་བྱས་ཏེ་གང་ཐུབ་ཀྱི་མི་ལོ་ ༦༠ རིང་ཡར་རྒྱས་དང་འགྱུར་ལྡོག་གི་རྣམ་པ་སྟོན་ཐབས་བྱས་ཡོད་ཀྱང༌། ས་གནས་བོད་མི་ཞིག་གིས་བརྗོད་པར་གཞིགས་ན། ཀན་ལྷོ་ཁུལ་གྱི་དུས་སྟོན་ཚོགས་པར་བརྟེན་དེ་རིང་ང་ཚོ་ཉ་འཁོར་བོད་མི་ཚོ་དུས་སྟོན་ལ་འགྲོ་མི་ཆོག་པའི་འགྲིམ་འགྲུལ་བཀག་སྡོམ་བྱས་པ་དང༌།
ཁུལ་ནས་རྫོང་རིམ་པ་དང༌། ཤང་རིམ་པར་དུས་སྟོན་རིང་དེ་ཐོག་ལ་འགྲོ་མི་ཆོག་པའི་བཙན་བཀའ་བཏང་སྟེ་ས་གནས་འགོ་ཁྲིད་ཚོས་ཁུལ་དེར་དུས་སྟོན་རིང་ས་གནས་སུ་རྙོག་ཟིང་རིགས་མི་ཡོང་བའི་ཁག་ཐེག་བྱེད་དགོས་བ་སོགས་བཀོད་མངགས་བྱས་ཡོད་པ་བརྗོད་བྱུང༌། ཡང་དེ་ཁུལ་གྱི་བོད་མི་གཞན་ཞིག་གིས་བརྗོད་དོན་ལྟར་ན། ཁུལ་དེར་དུས་སྟོན་ཧ་ཅང་གི་གཞི་རྒྱ་ཆེན་པོ་ཚོགས་ཀྱི་ཡོད་མོད། ཉེ་འཁོར་ཡོངས་སུ་དྲག་ཆས་དམག་གིས་སྐོར་ཏེ་སྔ་ས་ནས་གོ་སྒྲིག་བྱས་པའི་འབྲེལ་ཡོད་མི་སྣ་མ་གཏོགས་ས་གནས་བོད་མི་ཚོ་མཉམ་ཞུགས་བྱེད་ཆོག་གི་མེད་པ་དང༌། ཐ་ན་རིག་རྩལ་དགོང་ཚོགས་སྐབས་སུ་ཡང་ས་གནས་ཀྱི་གླུ་པ་དང་གླུ་མ། སྒྱུ་རྩལ་བ་ཚོ་མཉམ་ཞུགས་བྱེད་བཅུག་མེད་པ་བརྗོད་བྱུང་ལ་གནས་ཚུལ་ལྟར་ན་ཕྱི་ཚེས་ ༡༦ ཉིན་ཁུལ་དེར་གཞུང་འབྲེལ་དུས་སྟོན་མཛད་སྒོར་འཁེལ་བའི་ཆུ་ཚོད་ཁ་ཤས་རིང་དྲ་རྒྱའི་བརྒྱུད་ལམ་ཡང་བཀག་འདུག
ཀན་ལྷོ་བོད་རིགས་རང་སྐྱོང་ཁུལ་ནི་ཀན་སུའུ་ཞིང་ཆེན་གྱི་ལྷོ་རྒྱུད་དུ་ཆགས་པའི་ཁུལ་ཞིག་ཡིན་པ་དང༌། དེའི་ཁོངས་སུ་བསང་ཆུ་རྫོང་དང༌། རྨ་ཆུ་རྫོང༌། ཀླུ་ཆུ་རྫོང༌། འབྲུག་ཆུ་རྫོང༌། ཐེ་བོ། ཅོ་ནེ་སོགས་བོད་རིགས་རྫོང་ཁག་མང་པོས་གྲུབ་པའི་བོད་རིགས་རང་སྐྱོང་ས་ཁུལ་ཞིག་ཡིན་ལ་སྲིད་འཛིན་ལྟེ་གནས་ནི་མདོ་སྨད་གཙོད་གྲོང་འཁྱེར་ལ་ཆགས་ཡོད་འདུག
