༢༠༡༣ ཟླ་ ༧ ཚེས་ ༢༩ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ཟླ་ ༧ ཚེས་ ༢༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་གྱི་པུ་ནེ་ (Pune) གྲོང་ཁྱེར་ནང་རྟེན་གཞི་བྱས་པའི་ཧིན་ངྷུའི་བླ་ཆེན་ཝ་སི་ཝི་ནི་ (Rev Dada JP Vaswani ) མཆོག་དགུང་གྲངས་ ༩༥ ལ་ཕེབས་པའི་འཁྲུངས་སྐར་གྱི་མཛད་སྒོའི་སྐུ་མགྲོན་གཙོ་བོར་གདན་ཞུས་ལྟར་བཀའ་བཞེས་ཟབ་མོ་ཐོབ་སྟེ་ཆིབས་སྒྱུར་གྱིས་འཚམས་འདྲི་དང་བཀའ་སློབ་སྩལ་ཡོད།

དེ་ཡང་གོང་ཚེས་ཉིན་བླ་ཆེན་མཆོག་གི་འཁྲུངས་སྐར་སྲུང་བརྩི་དང་སྟབས་བསྟུན་མཁས་པའི་བགྲོ་གླེང་གོ་སྒྲིག་ཞུས་ཡོད་པ་དེ་བཞིན་རྒྱ་གར་གྱི་གློག་བརྙན་འཁྲབ་སྟོན་པ་གྲགས་ཅན་ཨ་མིར་ཁན་ (Aamir Khan) ལགས་ཀྱིས་གཙོ་སྐྱོང་ཞུས་ཡོད། སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་མི་ཚེའི་ནང་ཆོས་ཀྱི་ཕན་ཡོན་དང་འབྲེལ་བའི་སྐོར་བཀའ་སློབ་སྩལ་དོན། དེ་རིང་ངོས་རང་བླ་ཆེན་ཝ་སི་ཝི་ནི་མཆོག་དགུང་གྲངས་ ༩༥ ལ་ཕེབས་པའི་འཁྲུངས་སྐར་གྱི་མཛད་སྒོར་མགྲོན་འབོད་གནང་བ་ལྟར་བཅར་རྒྱུ་བྱུང་བར་ཧ་ཅང་དགའ་པོ་བྱུང།

སྤྱིར་བཏང་འཛམ་གླིང་འདིའི་ནང་གི་ཆོས་བརྒྱུད་ཆེན་པོ་ཡོངས་རྫོགས་རྒྱ་གར་ནང་མཉམ་གནས་ཐུབ་ཀྱི་ཡོད། འདས་པའི་ལོ་བརྒྱ་ཕྲག་བདུན་ལྷག་གི་རིང་རྒྱ་གར་ནི་འཛམ་གླིང་འདིའི་ནང་ཆོས་བརྒྱུད་ཁག་གི་ཁྱིམ་ཚང་ལྟ༌བུ་ཆགས་ཡོད། དེ་བཞིན་ཆོས་ཀྱི་མིང་ཐོག་ནས་འཁྲུག་རྩོད་རྒྱག་རྒྱུ་དེ་ནི་ཧ་ཅང་བློ་ཕམ་དགོས་པའི་གནས་ཚུལ་ཞིག་རེད། རང་ཉིད་ཀྱིས་དད་གུས་དང་ཡིད་ཆེས་བྱེད་ཡུལ་གྱི་ཆོས་བརྒྱུད་དེ་འཚོ་གནས་ཐུབ་ཆེད་ཆོས་བརྒྱུད་གཞན་ལ་ཐུབ་ཚོད་དང་མ་གུས་པ་བྱེད་རྒྱུ་རྩ་བ་ནས་མེད།

རྒྱ་གར་གྱི་རྩ་ཁྲིམས་ནང་ཡུལ་མི་ཡོངས་ལ་ཐོབ་ཐང་འདྲ་མཉམ་གནང་མིན་ལ་མ་ལྟོས་པར་རྒྱ་གར་ནང་རིགས་རུས་མཐོ་དམན་རྩིས་སྲོལ་གྱི་ལམ་ལུགས་རྙིང་པ་འགའ་ཞིག་མུ་མཐུད་གནས་རྐྱེན་མཚམས་རེ་ཡུལ་མི་དབུལ་ཕོངས་ཚོར་དཀའ་ངལ་འཕྲད་ཀྱི་ཡོད་སྟབས། དེའི་ཐོག་ཆོས་ལུགས་ཁག་གི་དབུ་ཁྲིད་ཚོས་ཐུགས་འགན་ཆེ་ཙམ་བཞེས་ཏེ་རིགས་རུས་མཐོ་དམན་རྩིས་སྲོལ་གྱི་ལམ་ལུགས་དེ་ནི་སྐྱོན་ཆ་ཞིག་ཡིན་སྐོར་མང་ཚོགས་ལ་ལམ་སྟོན་གནང་དགོས། ཞེས་སོགས་ཀྱི་བཀའ་སློབ་སྩལ་འདུག་པ་བཅས། །