༢༠༡༣ ཟླ་ ༧ ཚེས་ ༨ རེས་གཟའ་ཟླ་བ།
༄༅། །ཕྱི་ལོ་་༢༠༡༣ ཟླ་ ༧ ཚེས་ ༦ རེས་གཟའ་སྤེན་པའི་སྔ་དྲོ་རྒྱ་གར་ལྷོ་ཕྱོགས་སྦེལ་ཀོབ་གཞིས་ཆགས་སུ་རྟེན་གཞི་བྱས་པའི་སེ་ར་ཐེག་ཆེན་གླིང་གི་ཡ་གྱལ་སེར་བྱེས་མཁས་སྙན་གྲྭ་ཚང་གིས་གོ་སྒྲིག་འོག་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༧༨ ཕེབས་པའི་སྐུའི་འཁྲུངས་སྐར་དགྱེས་སྟོན་གྱི་མཛད་སྒོ་གཟབ་རྒྱས་སྲུང་བརྩི་ཞུ་སྐབས་བཀའ་སློབ་སྩལ་དོན།
དེ་རིང་འདི་ག་ས་གནས་སུ་དངོས་སུ་བཞུགས་པའི་ས་གནས་མངའ་སྡེའི་གཞུང་གི་གཙོ་འཛིན་མཆོག་དང་འབྲེལ་ཡོད་བློན་ཆེན་གྱི་མི་སྣ་རྣམ་པ། དེ་བཞིན་ཆེད་དུ་གཉེར་ནས་ཕེབས་པའི་ཨ་རུ་ན་ཅལ་མངའ་སྡེའི་གཙོ་འཛིན་དང་ཕྱག་རོགས་བློན་ཆེན་ཁག ཚང་མར་འཚམས་འདྲི་ཡོད། ངོས་རང་བཅོམ་ལྡན་འདས་ཀྱི་རྗེས་འབྲངས་པ་ཞིག་དང་སངས་རྒྱས་པའི་ཆོས་པ་ཞིག་གི་ངོས་ནས་དེ་རིང་འདིར་ཆོས་བརྒྱུད་གཙོ་ཆེ་བ་གསུམ་གྱི་སྐུ་ཚབ་ཕེབས་ཡོད། རྒྱ་གར་ནང་གི་ཧིན་རྡུའི་ཆོས་བརྒྱུད་མང་པོ་ཞིག་ཡོད་ཀྱང་སྤྱི་ཡོངས་ཀྱི་ཆ་ནས་འདི་གར་བླ་ཆེན་ཁོང་དང་། འཛམ་གླིང་འདིའི་སྟེང་གི་ཆོས་ལུགས་ཆེ་ཤོས་ཞིག་ཡི་ཤུ་རེད་ཡི་ཤུའི་ས་གནས་ཀྱི་བླ་ཆེན་བྱས། དེ་ནས་འཛམ་གླིང་འདིའི་སྟེང་གི་ཆོས་པའི་གྲངས་མང་ཤོས་ཞིག་ཨི་སི་ལམ་ཆགས་ཡོད་འདིར་ཁ་ཆེའི་ས་གནས་དབུ་ཁྲིད་དང་། དེ་ཡང་ངོས་ཀྱི་དམིགས་བསལ་གནད་འགག་ཅིག་བརྩི་གི་ཡོད། གང་ཡིན་བརྗོད་ན་འཛམ་བུ་གླིང་འདིའི་སྟེང་ཆོས་ལུགས་མི་འདྲ་བ་རྒྱུ་མཚན་དུ་བྱས་ཏེ་རྩོད་པ་རྒྱག་རྒྱུ་དང་མཐའ་ན་མི་གསོད་ཁྲག་སྦྱོར་ཡོང་གི་ཡོད། གདོད་མའི་སྐབས་དེ་འདྲ་བྱུང་བ་དེ་གནས་ཚུལ་ཁག་ཁག་རེད། ད་ལྟ་དུས་རབས་ཉི་ཤུ་པ་དང་ཉེར་གཅིག་དེའི་ནང་དངོས་གནས་བྱས་ན་མིའི་བསམ་བློ་གཏོང་སྟངས་ཡར་རྒྱས་ཕྱིན་ཡོད། ཕན་ཚུལ་འབྲེལ་བ་མ་འདོད་ཀྱང་བྱེད་དགོས་པ་ཆགས་ཡོད། དེ་འདྲའི་དུས་སྐབས་སུ་ཆོས་ལུགས་མི་འདྲ་བ་རྒྱུ་མཚན་དུ་བྱས་ཏེ་འཁྲུག་པ་རྒྱག་རྒྱུ་ཟེར་བ་དེ་ཧ་ལས་པའི་བློ་ཕམ་པོ་རེད།
དེར་བརྟེན་ང་ཚོ་ཆོས་བརྒྱུད་ཕན་ཚུན་ལྟ་བ་མི་འདྲ་བ་ཡོད། འཇིག་རྟེན་བཀོད་པ་པོ་འདོད་མཁན་དང་མི་འདོད་མཁན་གྱི་ལྟ་གྲུབ་མི་འདྲ་བ་ཡོད། འོན་ཀྱང་ལྟ་གྲུབ་མི་འདྲ་དེ་དག་ཚང་མས་ཁ་གཅིག་གྲགས་ཀྱིས་བྱམས་པ་དང་བརྩེ་བ། བཟོད་པའི་ཉམས་ལེན་་དགོས་པ་ཚང་མས་གསུངས་ཀྱི་ཡོད། དཔེར་ན་ཁ་ཆེའི་ཆོས་ལུགས་སྐོར་བརྗོད་འདོད་བྱུང་། ཁ་ཆེའི་ཆོས་པ་ཚོས་ཁ་ཆེའི་ཆོས་པ་ཞིག་ཡིན་ན་ཨ་ལར་ལ་གུས་ཞབས་ཞུ་བ་དང་དཀོན་མཆོག་ལ་བརྩེ་དུང་ཞུ་གི་ཡོད། དེར་བརྟེན་ང་ཚོའི་བྱམས་བརྩེ་དེ་དཀོན་མཆོག་ཨ་ལར་གྱིས་བཀོད་པའི་སེམས་ཅན་མཐའ་དག་ལ་བྱམས་བརྩེ་བསྟེན་དགོས་པ་རེད་ཅེས་དེ་འདྲ་བརྗོད་ཀྱི་འདུག
དེར་བརྟེན་ཆོས་བརྒྱུད་དེ་དག་ལྟ་བ་མི་འདྲ་བ་ཡོད་ཀྱང་ཆོས་བརྒྱུད་ཁ་ཤས་ཀྱི་འཇིག་རྟེན་བཀོད་པ་པོ་ཡོད་པ་དང་ཁ་ཤས་ཀྱིས་མེད་གསུང་གི་ཡོད། ཧོབ་སྟེ་བལྟས་པ་ཡིན་ན། འཇིག་རྟེན་བཀོད་པ་པོ་འདོད་མཁན་གྱི་ངོས་ནས་འཇིག་རྟེན་བཀོད་པ་པོ་མི་འདོད་མཁན་ལ་ཚུར་གཟིགས་ན་ཆད་ལྟ་བ་རེད་ཕལ་ཆེར་གསུངས་ཀྱི་རེད། ཕྱོགས་མཚུངས་འཇིག་རྟེན་བཀོད་པ་པོ་མི་འདོད་མཁན་གྱིས་འཇིག་རྟེན་བཀོད་པ་པོ་འདོད་མཁན་ལ་རྟག་མཐའ་བ་ཕལ་ཆེར་ཆགས་ཡོད། དེར་བརྟེན་ལྟ་གྲུབ་མི་འདྲ་བ་ཡོད་ཀྱང་གང་ལྟར་ལྟ་གྲུབ་མི་འདྲ་བ་དེ་དག་གི་དམིགས་ཡུལ་གང་ཡིན་བརྗོད་ན། མི་བཟང་པོ་ཞིག་ཡོང་རྒྱུ་དང་མི་བཟང་པོ་ཟེར་བ་དེའི་རྩ་བ་བྱམས་བརྩེ་ཆགས་ཡོད། དེར་བརྟེན་ལྟ་གྲུབ་མི་འདྲ་བ་དེ་དག་ཚང་མའི་དམིགས་ཡུལ་གཙོ་བོ་དེ་མིའི་བྱམས་བརྩེའི་བློ་གོང་ནས་གོང་དུ་སྤེལ་རྒྱུར་དམིགས་བཞག་པ་གཅིག་པ་རེད། གང་ལྟར་ང་ཚོ་ཆོས་པ་ཚོ་ཡང་ཡང་ཐུག ནང་ཚགས་གཅིག་གི་གཅིག་ལ་ངོ་ཤེས་པ་བྱས་ཏེ་དངོས་གནས་ཆོས་བརྒྱུད་གཅིག་གིས་གཅིག་ལ་གུས་བརྩི་དང་ཆོས་བརྒྱུད་མི་འདྲ་བ་གཅིག་གིས་གཅིག་ལ་ཆོས་བརྒྱུད་གཞན་པ་དེས་འགྲོ་བ་མི་ས་ཡ་མང་པོར་ཕན་ཐོགས་ཡོང་གི་ཡོད་པ་དེ་ངོས་ལེན་བྱས་པའི་ཐོག་ནས་གཅིག་གི་གཅིག་ལ་ཕན་ཚུན་གུས་ཞབས་བྱེད་རྒྱུ་དེ་དཔེ་གལ་ཆེན་པོ་རེད། དེ་རིང་འདིར་ངོས་ཀྱི་སྐྱེས་སྐར་གྱི་དུས་ཚིག་ཐོག་ཆོས་བརྒྱུད་གཙོ་ཆེ་བ་ཞིག་གི་མི་གསུམ་འདིར་ཕེབས་ཡོད་པར་ངོས་རང་ཧ་ཅང་དགའ་པོ་བྱུང་། དམིགས་བསལ་ཐུགས་རྗེ་ཞུ་རྒྱུ་ཡིན།
དེ་རིང་འདིར་དངོས་སུ་བཞུགས་མེད་མཁན་གྱི་ང་ཚོའི་གྲོགས་པོ་འཛམ་གླིང་ཤར་ནུབ་དང་འཛམ་གླིང་ལྷོ་བྱང་ཕལ་ཆེ་བར་མང་པོ་ཡོད། ལྷག་པར་དུ་རྒྱ་རིགས་ནང་ཞེ་དྲག་ཕོན་ཆེན་པོ་རེད། རྒྱ་ནག་ནང་ལ་ཡོད་པའི་རྒྱ་རིགས་ནང་པ་ཕོན་ཆེན་པོ་ཞིག་ཡོད་པ་དེ་དག་གིས་དེ་རིང་ཉིན་མོ་འདིར་ཕལ་ཆེར་སྨོན་ལམ་རྒྱག་གི་ཡོད། དེར་བརྟེན་དེ་རིང་འདིར་ལུས་པོ་དངོས་སུ་བཞུགས་མེད་ཀྱང་། སེམས་ཀྱི་ས་ཆ་འདིར་ངོས་ཀྱི་སྐྱེས་སྐར་རེད། ཅེས་བརྗོད་དེ་སྤྲོ་སྣང་དང་སྨོན་ལམ་རྒྱག་རྒྱུ་ཞིག་ཡོང་གི་རེད་དེ་འདྲ་ཡིན་དུས་ཚང་མར་ཐུགས་རྗེ་ཆེ་བརྗོད་རྒྱུ་ཡིན།
གང་ལྟར་ངོས་ལ་སེམས་ནས་ཉེ་པོ་འདྲ་བྱས་ཏེ་ཡོད་ན། ངོས་ལ་སྐྱེས་སྐར་དུས་ཚིགས་ཀྱི་ཕྱག་རྟགས་ཡག་ཤོས་ག་རེ་དགོས་སམ་བརྗོད་ན། ཁྱེད་རང་ཚོས་སེམས་པ་བཟང་པོ་བྱེད་རོགས། སེམས་ཕྲན་བུ་འཁྲུག་པ་དང་ཁོང་ཁྲོ་ཟ་བ། བརྣག་སེམས་དང་། གནོད་སེམས་སྐྱེས་རྒྱུ་ཡོང་བའི་སྐབས་ལ་ངོས་ཀྱི་གདོང་འདི་དྲན་རོགས་བྱེད། སེམས་བཟང་པོ་བྱེད་དང་དེ་ནི་ངོས་ལ་སྐྱེས་སྐར་གྱི་ལགས་རྟགས་ཡག་ཤོས་དེ་ཡིན། དེར་བརྟེན་འདིར་དངོས་སུ་ཡོད་མཁན་ཚོ་ཡིན་ནའང་འདྲ་འཛམ་གླིང་འདིའི་གླིང་གཞན་དང་གཞན་པར་ཡོད་པའི་ངོས་ཀྱི་གྲོགས་པོ་ཚང་མས་འདི་སེམས་ལ་འཇོག་རོགས་བྱེད་ཞེས་བརྗོད་རྒྱུ་ཡིན། བཀྲི་ཤིས་བདེ་ལེགས། ཞེས་བཀའ་སློབ་སྩལ།།
