༢༠༡༣ ཟླ་ ༧ ཚེས་ ༢༣ རེས་གཟའ་མིག་དམར།
༄༅། །ཕྱི་ལོ་ ༢༠༡༣ ཟླ་ ༧ ཚེས་ ༢༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་དུ་རྟེན་གཞི་བྱས་པའི་དགའ་ལྡན་བྱང་རྩེ་གྲྭ་ཚང་གི་གཙུག་ལག་ཁང་དུ་དད་ལྡན་ཆོས་ཞུ་བ་ཆིག་ཁྲི་བརྒལ་བར་སྒྲོལ་དཀར་ཡིད་བཞིན་འཁོར་ལོའི་ཚེ་དབང་མ་སྩལ་སྔོན་བཀའ་སློབ་ཕེབས་དོན། ངོས་རང་དེ་རིང་འདི་གར་ཡོང་ནས་ཁྱེད་རང་ཚོ་དང་ཐུག་རྒྱུ་བྱུང་བར་ཧ་ཅང་དགའ་པོ་བྱུང། ང་ཚོ་བོད་མི་བཙན་བྱོལ་དུ་འབྱོར་ནས་མི་ལོ་ ༥༤ བརྒལ་འགྲོ་གི་ཡོད། ལོ་ཡུན་དེ་དག་མི་སྒེར་པ་ཞིག་གི་མིི་ཚེར་ཆ་བཞག་ན་གང་ཙམ་རིང་པོ་རེད། འོན་ཀྱང་མི་རིགས་ཤིག་གི་བདེན་དོན་འཐབ་རྩོད་བྱེད་རྒྱུའི་ངོས་ནས་བཤད་ན་ལོ་ལྔ་བཅུ་ང་གྲངས་དུས་ཐུང་རེད། གང་ལྟར་དུས་ཡུན་དེ་དག་རིང་གཙོ་ཆེ་ཤོས་གཞིས་ལུས་རྒྱ་ཆེའི་མི་དམངས་རྣམས་ལྷག་བསམ་དང་སྙིང་སྟོབས་གཡོ་བ་མེད་པར་བསྡད་ཡོད་པ་འཛམ་གླིང་ལ་ཀུན་གསལ་ཆགས་ཡོད།
ལྷག་པར་རྒྱ་ནག་ནང་གི་རྒྱ་རིགས་བློ་གཟུ་བོར་གནས་པ་ཚོས་གནས་ཚུལ་དེ་དག་མཐོང་གི་ཡོད། ང་ཚོ་བཙན་བྱོལ་དུ་ཡོད་མཁན་ཚོས་ཀྱང་སོ་སོའི་སྒེར་པའི་མི་ཚེ་འཁྱོལ་ཙམ་མ་ཡིན་པར། ང་ཚོ་བོད་མི་རིགས་ཀྱི་ཆོས་དང་རིག་གཞུང་སྐད་ཡིག་ཟུར་གསལ་དུ་ཡོད་པ་དེ་བཞིན་བདག་པོ་རྒྱག་རྒྱུའི་ལས་འགན་འཁྱེར་བཞིན་ཡོད། བོད་མི་བཙན་བྱོལ་བ་གཙོ་ཆེ་ཨ་རི་དང་ཡུ་རོབ་སོགས་འཛམ་གླིང་ས་ཕྱོགས་མང་དག་ཅིག་ནང་ཡོད། དེ་བཞིན་ངོས་རང་གཞིས་ཆགས་ཁག་ཏུ་ཡོང་རིམ་བཞིན་དུས་ཁོམ་ཡོད་སྐབས་སློབ་ཕྲུག་ཚོ་ཐུག་གི་ཡོད། ཁྱེད་རང་ཚོ་སློབ་ཕྲུག་རྣམས་བོད་པའི་སོན་རྩ་ཆགས་ཡོད། སོན་རྩ་ཡག་པོ་ཞིག་ཡོང་བར་ཤ་ཁྲག་རུས་གསུམ་བོད་པ་ཡིན་རུང་སེམས་ནང་བོད་པའི་ཤེས་ཡོན་མེད་ན་བོད་པ་ཕྱེད་ཀ་རེད།
གང་ལྟར་དེང་དུས་ཀྱི་ཤེས་ཡོན་ཆ་ཚང་ཡོད་ཀྱང་བོད་པའི་ཤེས་ཡོན་དང་བོད་པའི་སྐད་ཡིག་ཡག་པོ་མ་ཤེས་ན་བོད་པ་ཕྱེད་ཀ་རེད། དེར་བརྟེན་དེ་སྔ་ང་ཚོས་སློབ་གྲྭ་ཟུར་དུ་འཛུགས་སྐབས། ནེ་རུར་སྙན་སེང་ཞུས་ཏེ་ང་ཚོ་བོད་པའི་སློབ་གྲྭ་བོད་ཡིག་བསླབ་རྒྱུ་ཡོད་པ་ཞིག་དང་བོད་ཡིག་ནང་ཡོད་པའི་ཤེས་ཡོན་དེ་དག་ལ་སློབ་སྦྱོང་བྱེད་རྒྱུ་ཞིག་དགོས་ཀྱི་འདུག་ཅེས་ནས་བོད་པའི་སློབ་གྲྭ་ཟུར་དུ་བཙུགས་པ་རེད། མདོར་ན། བོད་པ་ཆ་ཚང་བ་ཞིག་ཡོང་བར་བོད་པའི་ཤེས་ཡོན་དང་རིག་གཞུང་ཤེས་པ་བྱེད་རྒྱུ་ཧ་ཅང་གལ་ཆེན་པོ་རེད། བོད་པའི་ཤེས་ཡོན་དང་རིག་གཞུང་ནི། ངོས་ཀྱིས་ནམ་རྒྱུན་སངས་རྒྱས་པའི་རིག་གཞུང་དང་བོད་ཀྱི་རིག་གཞུང་ཞེས་པ་དེ་འཚེ་བ་མེད་པའི་རིག་གཞུང་དང་། དེ་ཡང་སྙིང་རྗེའི་རྩ་བར་གྱུར་བའི་འཚེ་བ་མེད་པའི་རིག་གཞུང་ཆགས་ཡོད་ཅེས་བརྗོད་ཀྱི་ཡོད།
དེ་བཞིན་མི་ཚེ་རིང་པོ་དང་གཟུགས་པོ་བདེ་པོ་ཡོང་རྒྱུ་གཙོ་བོ་ནམ་རྒྱུན་ནས་ལུས་པོའི་འཕྲོད་བསྟེན་ཡག་པོ་བྱེད་རྒྱུ་དེ་ཧ་ཅང་གལ་འགངས་ཆེན་པོ་ཆགས་ཡོད། འཕྲོད་བསྟེན་ལ་དོ་སྣང་གང་ཡང་མ་བྱས་པར་ཚེ་སྒྲུབ་ཁོ་ན་བྱས་པའི་ཚེ་སྲིང་ཐུབ་རྒྱུ་གང་ཡང་མེད། སངས་རྒྱས་བཅོམ་ལྡན་འདས་ཀྱིས་མདོ་རྒྱུད་སོགས་ནང་སྨན་གྱི་སྐོར་གསུངས་ཡོད། ང་ཚོས་འདི་གར་འདོན་པ་བཏོན་ནས་དམིགས་པ་བྱས་པ་ཁོ་ནས་ཚེ་སྲིང་ཐབས་མེད། དེར་བརྟེན་ཁ་ཡོད་ལག་ཡོད་ཀྱིས་སྨན་བཅོས་འཕྲོད་བསྟེན་དགོས་རྒྱུ་དེ་གལ་ཆེན་པོ་རེད། ཁྱེད་རང་ཚོ་གཞིས་འགོ་དང་རྒྱ་བོད་ཀྱི་སྨན་པ་ཚོས་ཟས་བཅུད་དང་སྤྱོད་ལམ་སོགས་གང་གི་ཐོག་ནས་སྐྱོན་ལྷག་གི་འདུག དེའི་ཐད་ཉམས་ཞིབ་བྱས་ཏེ་མི་དམངས་ལ་གོ་བརྡ་སྤྲོད་རྒྱུ་ཧ་ཅང་གལ་ཆེན་པོ་རེད། ཅེས་སོགས་ཀྱི་བཀའ་སློབ་དང་སྒྲོལ་དཀར་ཡིད་བཞིན་འཁོར་ལོའི་ཚེ་དབང་སྩལ་ཡོད།
