༢༠༡༣ ཟླ་ ༦ ཚེས་ ༢༨ རེས་གཟའ་པ་སངས།
༄༅། །ཕྱི་ལོ་ ༢༠༡༣ ཟླ་ ༦ ཚེས་ ༢༧ ཉིན་ཨ་རིའི་གྲོས་ཚོགས་གོང་མའི་ནང་གྲོས་ཚོགས་འཐུས་མི་ ༦༨ ཀྱིས་ཨ་རིར་ཕྱི་མི་གནས་སྤོ་བྱ་རྒྱུའི་རྩ་ཁྲིམས་ལ་བསྐྱར་བཅོས་དགོས་པའི་གྲོས་གཞི་དེར་རྒྱབ་སྐྱོར་གནང་ཡོད་པ་དང། གྲོས་ཚོགས་འཐུས་མི་ ༣༢ གྲོས་གཞི་དེར་དགག་པ་བརྒྱབ་ཡོད་ཀྱང་མང་མོས་ཀྱིས་རྒྱལ་ཁ་ཐོབ་པར་བརྟེན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་དགའ་བསུ་ཞུས་ཡོད། ད་ཐེངས་ཨ་རིར་ཕྱི་མི་གནས་སྤོ་བྱ་རྒྱུའི་གྲོས་གཞི་དེའི་ནང་དུ་དོན་ཚན་མང་དག་ཅིག་འཁོད་ཡོད་པའི་ཁོངས་ནས་རྒྱ་གར་དང་བལ་ཡུལ་ནས་ལོ་གསུམ་གྱི་ནང་ཚུད་ལ་བོད་མི་སྐྱབས་བཅོལ་མི་གྲངས་ ༥༠༠༠ ཨ་རིར་གནས་སྤོ་བྱ་རྒྱུའི་ཆ་རྐྱེན་ཡང་འཁོད་ཡོད། བོད་མི་གནས་སྤོ་བྱ་རྒྱུའི་ཆ་རྐྱེན་དེའི་སྐོར་གྲོས་ཚོགས་གོང་མའི་ནང་ཨ་རིའི་གྲོས་ཚོགས་གོང་མའི་འཐུས་མི་ལྕམ་སྐུ་ཌ་ཡེན་ཕ་ཡིན་སི་ཊེན་ Senator Dianne Feinstein མཆོག་གིས་ངོ་སྤྲོད་ཞུ་སྐབས་ཨ་རིའི་གྲོས་ཚོགས་ཀྱི་སྤྱི་མཐུན་ཚོགས་པ་དང་། མང་གཙོ་ཚོགས་པ་གཉིས་ཀས་རྒྱབ་སྐྱོར་ཤུགས་ཆེ་གནང་ཡོད། ཐེངས་འདིར་ཨ་རིར་ཕྱི་མི་གནས་སྤོ་བྱ་རྒྱུའི་རྩ་ཁྲིམས་ལ་བསྐྱར་བཅོས་དགོས་པའི་གྲོས་གཞི་དེའི་དོན་ཚན་ཁག་གཅིག་ནང་བོད་མི་ལྔ་སྟོང་ཨ་རིར་གནས་སྤོ་བྱ་རྒྱུའི་དོན་ཚན་དེ་བཞིན་གྲོས་ཚོགས་གོང་མའི་ནང་གྲོས་འཆར་འདོན་མཁན་ལྕམ་སྐུ་ཌ་ཡེན་ཕ་ཡིན་སི་ཊེན་མཆོག་ཡིན་པ་དང། དེར་རྒྱབ་སྐྱོར་གནང་མཁན་གྲོས་ཚོགས་གོང་མའི་འཐུས་མི་སྐུ་ཞབས་པེ་ཊིཀ་ལི་ཧེ་(Patrick Leahy) མཆོག་དང། ཅག་ཤུ་ཁུ་མར་ (Chuck Schumer) མཆོག་བཅས་ཡིན་འདུག

དེ་ཡང་སྲིད་སྐྱོང་བློ་བཟང་སེང་གེ་མཆོག་གིས་གསུང་དོན། ང་རང་བོད་མིའི་གཞིས་ཆགས་ཀྱི་ས་ཁུལ་ཁག་ཏུ་བསྐྱོད་སྐབས་ཕྱི་རྒྱལ་དུ་གནས་སྤོ་ཆེད་རོགས་རམ་ཞུ་མཁན་མང་པོ་འདུག ང་དང་ངའི་ལས་རོགས་བཀའ་བློན་རྣམ་པ་ཚོས་ལོ་གཅིག་ལྷག་རིང་དེའི་ཐོག་ཤུགས་བརྒྱབ་ཡོད། ཕྱོགས་མཚུངས་ཨ་རིའི་སྲིད་དོན་ཚོགས་པ་གཉིས་ཀའི་གྲོས་ཚོགས་གོང་མའི་འཐུས་མི་འགའ་ཤས་དང་མཇལ་རྒྱུའི་གོ་སྐབས་ཀྱང་ཐོབ་བྱུང། དེར་བརྟེན་ཐེངས་འདིར་བོད་མི་ལྔ་སྟོང་གནས་སྤོ་བྱ་རྒྱུའི་གྲོས་གཞི་དེར་རྒྱབ་སྐྱོར་གནང་བར་སྙིང་ཐག་པ་ནས་བཀའ་དྲིན་ཆེ་ཞུ་རྒྱུ་དང། འབྱུང་འགྱུར་གྲོས་གཞི་དེ་བཞིན་གྲོས་ཚོགས་འོག་མའི་ནང་དུའང་རྒྱབ་སྐྱོར་ཐོབ་རྒྱུའི་རེ་བ་ཞུ་བཞིན་ཡོད། ཅེས་གསུངས་ཡོད།།