༢༠༡༣ ཟླ་ ༦ ཚེས་ ༡ རེས་གཟའ་སྤེན་པ།
༄༅། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་འཕགས་ཡུལ་ས་གནས་ཁག་བཅུ་ལས་གྲུབ་པའི་ན་ལེནྡྲ་ཤེས་ཡོན་ལྷན་ཚོགས་ཞེས་པས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ་ཕྱི་ལོ་ ༢༠༡༣ ཟླ་ ༦ ཚེས་ ༡ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་རྒྱ་གར་འཕགས་ཡུལ་གྱི་དད་ལྡན་ཆོས་ཞུ་བ་གཙོ་བོར་གྱུར་པའི་སེར་སྐྱ་མི་མང་རྣམས་ལ་རྒྱལ་སྲས་ཆེན་པོ་ཞི་བ་ལྷས་མཛད་པའི་བྱང་ཆུབ་སེམས་དཔའི་སྤྱོད་འཇུག་ཆེན་མོའི་བཀའ་ཁྲིད་དབུ་འཛུགས་མཛད་ཡོད། དེ་ཉིན་སྔ་དྲོ་ཆུ་ཚོད་ ༩།༡༥ ཐོག་ན་ལེནྡྲ་ཤེས་ཡོན་ལྷན་ཚོགས་ཀྱི་སྐུ་ཚབ་འཐུས་མིས་སྤོས་སྣེས་སྔོན་བསུས་ཏེ་༸གོང་ས་མཆོག་ཕོ་བྲང་གཟིམ་ཆུང་ནས་གདན་ཞུས་ཀྱི་ཐེག་ཆེན་ཆོས་གླིང་གཙུག་ལག་ཁང་གི་བཞུགས་ཁྲིར་༸ཞབས་སོར་འཁོད་རྗེས་ལེགས་སྦྱར་སྐད་ཐོག་ཤེས་རབ་སྙིང་པོ་དང་པཎ་གྲུབ་བཅུ་བདུན་གྱི་གསོལ་འདེབས་གསུང་འདོན་གྲུབ་མཚམས་སྔོན་འགྲོའི་ཆོས་འབྲེལ་གྱི་བཀའ་སློབ་ཕེབས་དོན།
དེ་རིང་ཆེད་དུ་བྱས་པའི་འདུལ་བྱ་དེ་འཕགས་པའི་ཡུལ་གྱི་ཆོས་གྲོགས་ཚོ་ཆགས་ཡོད། ཆོས་འཆད་པ་པོ་བོད་པ་ཡིན་ཀྱང་། འཆད་བྱའི་ཆོས་དང་འཆད་སའི་ཡུལ་དེ་གང་ལྟར་རྒྱ་གར་འཕགས་པའི་ཡུལ་གྱི་རྒྱ་གར་བའི་རྣམ་དཔྱོད་ལས་ཐོན་པའི་ལྟ་གྲུབ་ཟབ་ཅིང་བརླིང་བ། དེ་ཡང་རིག་པའི་ལམ་ནས་གཏན་ལ་ཕབ་བཞག་པ་དེ་འདྲའི་ཆོས་བརྒྱུད་ཞིག་དེ་རིང་ཁྱེད་རྣམས་འཕགས་པའི་ཡུལ་གྱི་ཆོས་གྲོགས་ཚོར་ཞུ་རྒྱུ་རེད། གང་ལྟར་ཕྱོགས་གཅིག་ནས་ཁྱེད་རང་ཚོའི་མེས་པོ་དམ་པ་ཚོའི་ཤེས་ཡོན་ཞིག་དུས་རབས་གསར་པའི་ནང་གི་འཕགས་པའི་ཡུལ་གྱི་མི་རབས་ལ་རྩིས་སྤྲད་པ་ལྟ་བུ་ཆགས་ཀྱི་ཡོད། དེར་བརྟེན་ཧ་ཅང་གི་དགའ་པོ་བྱུང་། ཞེས་དང་གཞན་ཡང་། ཁྱེད་རང་ཚོ་མང་ཆེ་ཞིག་གིས་འཆར་ཅན་ངོས་ཀྱི་ཤོད་ཀྱི་ཡོད་སྟབས་གོ་ཡོད་པ་རེད འོན་ཀྱང་ཁྱེད་རྣམ་པའི་ནང་མི་གསར་པ་ཡང་གང་ཙམ་ཡོད་ངེས་རེད་དེར་བརྟེན་སྔོན་ལ་ནང་ཆོས་ཀྱི་སྤྱི་བཤད་ཞུ་གི་ཡིན ང་ཚོས་རྒྱུ་མཚན་བཀོད་མི་དགོས་པ་རང་ གཞན་སུ་དང་སུ་ཡིན་ཀྱང་མཐའ་མ་སྲོག་ཆགས་གྲོག་འབུ་ཡན་ཆད་བདེ་བ་དང་སྡུག་བསྔལ་གྱི་ཚོར་བ་མྱོང་རྒྱུ་ཡོད་པ་ཞིག་ཡིན་ཕྱིན་ཆད་ལ་བདེ་བ་འདོད་པ་དང་སྡུག་བསྔལ་མི་འདོད་པ་རང་བཞིན་གྱི་ཡོད་དེ་བསྙོན་དུ་མེད་པ་རེད དེ་ལྟར་སྡུག་བསྔལ་མི་འདོད་པ་དང་བདེ་བ་འདོད་པ་ཡིན་དུས་འབུ་ཆུང་ངུ་ཞིག་ཡིན་ཀྱང་ཁོང་རང་འཚོ་རྒྱུའི་དོན་དུ་ཐབས་ཤེས་བྱས་ཏེ་འགྲོ་གི་ཡོད། དེར་བརྟེན་བདེ་བ་དོན་དུ་གཉེར་བ་དང་སྡུག་བསྡལ་མི་འདོད་པའི་ཐར་འདོད་ཀྱི་བློ་མེད་ན་འགུལ་སྐྱོད་རྒྱག་གི་མ་རེད་དེ་གསལ་པོ་ཞེ་དྲག་རེད། འོན་ཀྱང་ང་ཚོ་འགྲོ་བ་མི་དང་ཁྱད་པར་གང་ཡོད་དམ་ཞེ་ན། འགྲོ་བ་མིར་བསམ་བློ་མང་པོ་བཏང་རྒྱུ་ཡོད་པ་ཞིག དེར་བརྟེན་སྡུག་བསྔལ་གསལ་རྒྱུ་དང་བདེ་བ་སྒྲུབ་རྒྱུ་ཟེར་བ་དེའང་འཕྲལ་སེལ་ངོ་གདོང་གང་གི་བདེ་བ་དང་སྡུག་བསྡལ་ཙམ་མ་ཡིན་པ་འབྱུང་འགྱུར་གྱི་ཟླ་བ་དང་ལོ་བཅུ་ཕྲག་མི་རབས་ནས་མི་རབས་ལོ་བརྒྱ་ཕྲག་བྱས་ཏེ་བསམ་བློ་གཏོང་རྒྱུ་ཞིག་མིས་ཐུབ་ཀྱི་ཡོད། མཐོང་ཆོས་དུ་ཡོད་པའི་འགྲོ་བ་མི་འཛམ་གླིང་འདིའི་སྟེང་དུང་ཕྱུར་བདུན་ཅུ་ཙམ་ཡོད་པ་དེ་དག་ཚང་མ་སྡུག་བསྔལ་མི་འདོད་པ་དང་བདེ་བ་འདོད་པ་གཅིག་གྱུར་ཡིན་པའི་ཐོག་ལ་མིས་རྣམ་དཔྱོད་དེའི་ཐོག་ནས་སོ་སོའི་འདོད་པའི་བདེ་བ་སྒྲུབ་རྒྱུ་དང་སྡུག་བསྔལ་སེལ་རྒྱུ་ཡི་སོ་སོའི་བློ་ངོར་ཐབས་ཤེས་ཡག་ཤོས་དེ་རེད་བསམས་ཏེ་འགྲོ་གི་ཡོད། མི་ལ་རྣམ་དཔྱོད་ཡོད་དུས་འཛམ་བུ་གླིང་འདིའི་སྟེང་སྲོག་ཆགས་མི་འདྲ་བ་མང་པོ་ཞིག་ཡོད་པའི་ནང་ནས་མིའི་སྤྱི་ཚོགས་ལ་འཕེལ་རྒྱས་ཞེ་དྲག་འགྲོ་རྒྱུ་ཞིག་ཆགས་འདུག གང་རེད་དམ་ཟེར་ན་མིའི་རྣམ་དཔྱོད་ཐོག་ནས་ཡོང་གི་ཡོད། མདོ་དོན་སྙིང་པོ་ཚང་མ་སྡུག་བསྔལ་མི་འདོད་པ་དང་བདེ་བ་འདོད་པ་དེ་འདྲ་ཞིག་ཐོག་ནས་རང་རང་གི་བདེ་བ་སྒྲུབ་རྒྱུ་དང་སྡུག་བསྔལ་སེལ་རྒྱུའི་ཐབས་ལམ་ཡག་ཤོས་དེ་སོ་སོའི་བློ་ངོར་སྒྲུབ་ཀྱི་ཡོད།
སྤྱིར་བཏང་ང་ཚོར་སྲོག་ཆགས་གཞན་པ་ལྟར་གྱི་བཀྲེས་སྐོམ་གྱི་སྡུག་བསྔལ་སྲོག་ཆགས་གཞན་པར་ཡོད་པ་བཞིན་ང་ཚོར་གཅིག་པ་ཡོད། བཀྲེས་སྐོམ་སྡུག་བསྔལ་སེལ་རྒྱུར་མིའི་སྤྱི་ཚོགས་ནང་ཞིང་ལས་བྱེད་རྒྱུ་ནས་བཟུང་སྟེ་རིམ་པས་ཞིང་ལས་ཡོ་བྱད་ཐོག་མར་ཞིང་ཁ་བཟོ་རྒྱུ་དང་ལྕག་བཞུ་བཏུལ་བྱེད་རྒྱུའི་རིག་པ་རྙེད་དུས་གང་ལྟར་བཟོ་ལས་རིག་པ་རིམ་པས་ཡར་རྒྱས་ཕྱིན་ཏེ་དུས་རབས་ཉི་ཤུ་པའི་ནང་འཕྲུལ་ཆས་ཡར་རྒྱས་ཞེ་དྲག་ཕྱིན་ཏེ་ད་ལྟ་ང་ཚོ་དུས་རབས་ཉེར་གཅིག་པའི་ནང་སླེབས་ཡོད། ཞེས་གཞན་ཡོད་ཆོས་དད་ཡོད་པའི་སྤྱི་ཚོགས་བཟོ་དགོས་པ་གང་ཞིག་ལ ཤེས་ཡོན་ཐོག་ནས་བྱམས་བརྩེའི་སྤྱི་ཚོགས་ཞིག་བཟོ་དགོས་པ་སོགས་ཀྱི་སྔོན་འགྲོའི་ཆོས་འབྲེལ་གྱི་སྤྱི་བཤད་མཛད་རྗེས་སྤྱོད་འཇུག་ཆེན་མོའི་གསུང་ཆོས་དངོས་གཞི་དབུ་འཛུགས་གནང་ཡོད། ད་ཐེངས་ཀྱི་གསུང་ཆོས་འདིར་གཙོ་བོ་རྒྱ་གར་འཕགས་པའི་ཡུལ་གྱི་དད་ལྡན་ཆོས་ཞུ་བ་གྲངས་ ༡༢༠༠ བཅར་ཡོད་པའི་ཐོག་ཨ་རི་ནས་ ༢༩༠ དང་ཇར་མན་ནས་ ༡༤༦ དབྱིན་ཡུལ་ནས་ ༡༢༣ ཨི་སི་རལ་ནས་ ༡༢༣ དེ་བཞིན་རྒྱ་ནག་སྐམ་ས་བཅས་ཕྱིའི་རྒྱལ་ཁབ་ཁག་ ༦༩ ནས་ཆོས་ཞུ་མི་གྲངས་ ༡༩༠༠ དང་བོད་རིགས་སེར་སྐྱ་མི་མང་བཅས་ཁྱོན་མི་གྲངས་ ༧༨༨༥ ཆོས་ཞུར་བཅར་འདུག ཐེངས་འདིའི་ཆོས་འབྲེལ་འདི་ཕྱི་ཚེས་ ༣ བར་སྡ་དྲོ་ ༩།༣༠ ནས་ཕྱག་ཚོད་ ༡༡།༣༠ བར་དང་ཕྱི་དྲོ་ ༡ ནས་ ༣ བར་ཆོས་ཐུན་གཉིས་རེ་དང་། ཕྱི་ཚེས་ ༤ ཉིན་སྔ་དྲོ་ཆོས་ཐུན་གཅིག་གནང་མཛད་རྒྱུ་ཡིན་འདུག་པ་བཅས།
