༢༠༡༣ ཟླ་ ༦ ཚེས་ ༥ རེས་གཟའ་ལྷག་པ།
༄༅། །ཕྱི་ལོ་ ༢༠༡༣ ཟླ་ ༥ ་ཚེས་ ༢༠ ནས་ཕྱི་ཟླ་ ༧ ཚེས་ ༢༠ བར་ཟླ་བ་གཉིས་ཀྱི་རིང་བོད་མིའི་མདུན་ལམ་བསྟི་ཁང་གིས་སཱ་ར་བོད་ཀྱི་མཐོ་སློབ་ཁང་དུ་བོད་མི་གཞོན་སྐྱེས་གྲངས་ ༤༠ ཙམ་ལ་ཇ་ཝེ་ཌི་ཧ་བིབ་ལགས་ཀྱིས་སྐྲའི་མཛེས་བཟོའི་ཆེད་ལས་ཀྱི་སྦྱོང་བརྡར་ཞིག་གནང་བཞིན་ཡོད་པ་ལྟར། ཕྱི་ལོ་ ༢༠༡༣ ཟླ་ ༦ ཚེས་ ༤ ཉིན་དངོས་སུ་སྐྲའི་མཛེས་བཟོ་བ་གྲགས་ཅན་ཇ་ཝེ་ཌི་ཧ་བིབ་ (Jawed Habib) ལགས་ཆེད་ཕེབས་ཀྱིས་བོད་ཕྲུག་སློབ་མ་རྣམས་ལ་ཁོང་རང་ཉིད་ཀྱིས་མཛེས་བཟོའི་ཉམས་མྱོང་དང་འབྲེལ་བའི་སློབ་སྟོན་གནང་ཡོད།
དེ་ཡང་ཕྱི་ཚེས་ ༤ ཉིན་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཁྱབ་ཁོངས་སུ་ཡོད་པའི་བོད་མིའི་མདུན་ལམ་སློབ་སྟོན་བསྟི་གནས་ཁང་གི་ངོས་ནས་དེ་ཉིན་སཱ་ར་བོད་ཀྱི་མཐོ་སློབ་ཁང་དུ་སྔ་དྲོ་ཆུ་ཚོད་ ༡༠ ཐོག་སྐུ་མགྲོན་གཙོ་བོ་ཇ་ཝེ་ཌི་ཧ་བིབ་ལགས་ཀྱིས་གཙོས་ཇ་ཝེ་ཌི་ཧ་བིབ་མཛེས་བཟོ་ཁང་གི་ཉམས་མྱོང་ཡོད་པའི་སྐྲའི་མཛེས་བཟོ་བ་བོད་པའི་བུད་མེད་ཀརྨ་གཡུང་དྲུང་ལགས་དང་། རྡ་ས་ས་གནས་འགོ་འཛིན་བསོད་ནམས་རྡོ་རྗེ་ལགས། བོད་མིའི་མདུན་ལམ་སློབ་སྟོན་བསྟི་གནས་ཁང་གི་འབྲེལ་ཡོད་ལས་བྱེད་སོགས་ལྷན་འཛོམས་ཐོག་སྐུ་མགྲོན་གཙོ་བོས་སྐྲའི་མཛེས་བཟོའི་ལས་རིགས་འདི་ནི་གཞན་དང་མི་འདྲ་བར་རང་ངོས་ནས་སྤྲོ་བར་ཆེ་ཞིང་བློ་ངར་ལྡན་པ་དང་མི་མང་ཁྲོད་ཡིད་དབང་འཕྲོག་པའི་སྡིང་ཆ་གལ་ཆེན་ཞིག་ཆགས་ཀྱི་ཡོད་སྟབས་སྐྲའི་མཛེས་བཟོའི་ལས་རིགས་ལ་དོ་དབྱིངས་ཡོད་པའི་བོད་རིགས་གཞོན་སྐྱེས་རྣམས་ཀྱིས་འདི་ལྟ་བུའི་སྦྱོང་བརྡར་གྱི་གོ་སྐབས་བླངས་ཏེ་འབད་བརྩོན་གནང་དགོས་པ་མ་ཟད། དེའི་ཐོག་ཆེད་ལས་གནང་འདོད་ཡོད་ན་ངེས་པར་དུ་ལས་རིགས་འདི་དང་འབྲེལ་བའི་སློབ་སྦྱོང་གནང་དགོས་གལ་ཡིན་པའི་ལམ་སྟོན་གནང་འདུག
དེ་བཞིན་ཕྱི་ཚེས་ ༣ ཉིན་སཱ་ར་བོད་ཀྱི་མཐོ་སློབ་ཁང་དུ་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས་ཇ་ཝེ་ཌི་ཧ་བིབ་ལགས་དང་ལྷན་ཐུགས་འཕྲད་གནང་ཡོད། སྐབས་དེར་ནང་སྲིད་དྲུང་འཕར་འཆི་མེད་རིག་འཛིན་ལགསདང་དྲུང་གཞོན་དཀོན་མཆོག་དོན་འགྲུབ་ལགས་རྣམ་གཉིས་ཀྱང་ལྷན་བཅར་ཞུས་ཡོད།
རྩ་བའི་ད་ཐེངས་ཀྱི་ལས་གཞི་འདི་བཞིན་ཐོག་མར་ཇ་ཝེ་ཌི་ཧ་བིབ་ལགས་ཀྱི་སྐྲའི་མཛེས་བཟོའི་ཚོང་ལས་ཁང་དུ་ལོ་ལྔ་ཙམ་མཛེས་བཟོའི་ཆེད་ལས་གནང་མྱོང་བའི་བོད་པའི་བུད་མེད་ཀརྨ་གཡུང་དྲུང་ལགས་ཀྱིས་བོད་པའི་གཞོན་སྐྱེས་དོ་དབྱིངས་ཡོད་པ་རྣམས་ལ་བསམ་ཚུལ་བཏོན་གནང་གི་རྡ་སའི་བོད་མིའི་མདུན་ལམ་སློབ་སྟོན་བསྟི་གནས་ཁང་ལ་འབྲེལ་བ་གནང་བ་ཞིག་ཡིན་འདུག་པ་དང། ཚོང་ལས་ཁང་དེའི་སྦྱིན་བདག་ཇ་ཝེ་ཌི་ཧ་བིབ་ལགས་ཁོང་རང་ཉིད་ཀྱིས་བོད་དོན་རྒྱབ་སྐྱོར་དང་བོད་མིའི་རང་གཤིས་ལ་དགའ་མོས་ཀྱི་མཐུན་འགྱུར་རྒྱབ་སྐྱོར་གྱི་ཞལ་བཞེས་ཐོབ་པ་ཞིག་ཡིན་འདུག་པ་བཅས།།
