༢༠༡༣ ཟླ་ ༦ ཚེས་ ༢༧ རེས་གཟའ་ཕུར་བུ།
༄༅། །ཕྱི་ལོ་ ༢༠༡༣ ཟླ་ ༦ ཚེས་ ༢༧ ཉིན་རྡ་ས་ནང་ཆོས་ངོ་སྤྲོད་ཚོགས་ཆུང་དང་རྡ་སྟེང་བོད་ཁྱིམ་སློབ་གྲྭ་གཉིས་ཀྱི་གོ་སྒྲིག་ཐོག་རྡ་སྟེང་བོད་ཁྱིམ་ཚོགས་ཁང་དུ་མཐོ་སློབ་ཁག་གི་སློབ་ཕྲུག་གཙོ་བོར་གྱུར་པའི་བོད་རིགས་གཞོན་སྐྱེས་ནང་ཆོས་དོན་གཉེར་བ་ཚོར་རྒྱལ་བའི་གསུང་འབུམ་ལེགས་བཤད་བློ་གསར་མིག་འབྱེད་ཀྱི་བཀའ་ཁྲིད་དབུ་འཛུགས་མ་བསྐྱངས་གོང་ནང་ཆོས་ངོ་སྤྲོད་ཐོག་བཀའ་སློབ་སྩལ་དོན།
ཚང་མར་བཀྲ་ཤིས་བདེ་ལེགས་ཡོད། འདི་གར་ཉིན་གཉིས་རིང་ཚོགས་རྒྱུར་ཁྱེད་རྣམས་ཡོང་ཡོད་པར་ཡོང་གོ་ཆོད་པ་ཞིག་བྱེད་དགོས། ཁྱེད་རྣམས་འདི་གར་སྒྲུང་ཉན་པར་ཡོང་མེད་ལ་ལྟད་མོ་ལྟ་བར་ཡང་ཡོང་མེད། འོ་ན་འདིར་འཛམ་གླིང་འདིའི་སྟེང་གི་རིག་གཞུང་རྙིང་ཤོས་ཤིག་དང་། ང་ཚོ་བོད་པར་ཆ་བཞག་ན་འདས་པའི་ལོ་ངོ་སྟོང་ཕྲག་ལྷག་གི་རིང་ལ་ང་ཚོའི་མེས་པོ་ཚོས་སྐུ་ངལ་ཆེན་པོ་བརྒྱབ་སྟེ་བསགས་པའི་རིག་གཞུང་ཞིག་ཆགས་ཡོད། སྤྱིར་འཛམ་གླིང་འདིའི་སྟེང་ཆོས་ལུགས་དང་རིག་གཞུང་རྙིང་པ་མང་པོ་ཡོད། འོན་ཀྱང་དུས་རབས་ཉེར་གཅིག་འདིའི་ནང་དགོས་མཁོ་དང་འབྲེལ་བ། ཕན་ཐོགས་ཡོད་པ་ནི་ཕལ་ཆེར་ང་ཚོའི་བོད་ནང་ཡོད་པའི་སངས་རྒྱས་པའི་ལྟ་གྲུབ། དེ་དང་འབྲེལ་བའི་ང་ཚོ་བོད་མིའི་གོམས་གཤིས་འདི་ད་ལྟའི་འཛམ་གླིང་འདིའི་སྟེང་འབྲེལ་བ་ཡོད་པ་ཞིག་དང་ཕན་ཐོགས་ཡོད་པ་ཞིག་ཆགས་ཡོད། དེ་ལྟ་བུའི་ལྟ་གྲུབ་ཁུངས་དང་ལྡན་པ་ཞིག་ཆགས་ཡོད། ཆོས་ལུགས་གང་དང་གང་ཡིན་པ་དང་ལྟ་གྲུབ་གང་དང་གང་ཡིན་རུང་། ཕྱོགས་གཅིག་ནས་མིའི་རྣམ་དཔྱོད་གོང་འཕེལ་ཕྱིན་པ་དང་ལྷག་པར་འཕྲུལ་ཆས་གོང་འཕེལ་སོང་སྟེ་དཔེར་ན། འཛམ་གླིང་སའི་གོ་ལ་སོགས་ལ་སྔ་མོ་ཚོད་དཔག་བྱས་པ་དེ་དག་དེ་རིང་ཁ་སང་མིག་མཐོང་ལག་ཟིན་གྱི་ཐོག་ནས་གཏན་འབེབས་བྱས་པ་ཞིག་ཡོང་གི་ཡོད། དེའི་རིགས་ནི་དེ་སྔར་ཡོངས་སུ་མ་གྲགས་པ་དང་མཐོང་ཐོས་མེད་པ་དེ་རིང་སང་གཞི་ནས་གསར་པ་ཤེས་རྒྱུ་ཞིག་ཡོང་གི་ཡོད། ནང་བསམ་བློ་དང་འབྲེལ་བ་དེ་དག་དེ་རིང་སང་འཕྲུལ་ཆས་ཀྱི་ཐོག་ནས་རིག་པ་གསར་པ་རྙེད་ཟེར་རྒྱུ་དེ་ཕལ་ཆེར་མེད།
དེར་བརྟེན་སྔ་མོ་རྒྱ་གར་དུ་ལོ་ངོ་སྟོང་ཕྲག་གསུམ་གྱི་རིང་ལ་སེམས་ཀྱི་ཡར་རྒྱས་སྐོར་ལ་དོ་སྣང་ཧ་ཅང་ཆེན་པོ་བྱེད་པའི་སྤྱི་ཚོགས་ཀྱི་མི་སྡེའི་ནང་ཇེན་གྱི་ཆོས་ལུགས་དང་སངས་རྒྱས་པའི་ཆོས་ལུགས་གཉིས་དུས་རབས་གཅིག་པའི་ཐོག་བྱུང་ཡོད། སངས་རྒྱས་པས་དེའི་ཚེ་དེའི་དུས་རྒྱ་གར་འཕགས་པའི་ཡུལ་དུ་ཡོད་པའི་ཆོས་བརྒྱུད་དེ་དག་གི་ལེགས་ཆ་རྣམས་ཆ་ཚང་བཞེས། དེའི་ནང་རིག་པའི་གནོད་པ་ཡོད་པའི་ལྟ་གྲུབ་དེ་དག་བསྒྱུར་བཅོས་གཏོང་གནང་མཛད་དེ་བྱུང་བའི་སངས་རྒྱས་བཅོམ་ལྡན་འདས་ཀྱི་ལྟ་གྲུབ་ཞིབ་ཚགས་པོའི་ཐོག་ད་དུང་བརྡར་ཤ་བཅད་དེ་གཏན་འབེབས་གནང་རྒྱུ་དེ་དག་དཔལ་ན་ལེནྡྲའི་མཁས་པ་པཎ་གྲུབ་བཅུ་བདུན་ད་ལྟ་རི་མོར་ཡོད་པ་འདི་དག་གཙོ་བོ་ཆགས་ཡོད། གྲུབ་ཆེན་ཚོས་གདམ་པ་མང་པོ་མཛད་ཡོད། འོན་ཀྱང་རྩ་བ་དེ་པཎ་གྲུབ་བཅུ་བདུན་གཙོ་བོར་འགྱུར་བའི་མཁས་པའི་དབང་པོ་དེ་དག་གིས་སྒྲོམ་གཞི་གཏིང་བཞག་པ་དེ་དག་དང་། བྱེ་བྲག་ཏུ་གསང་བསྔགས་ཀྱི་ཆོ་ག་དང་འབྲེལ་བའི་ལྷག་པའི་ལྷ་བྱེ་བྲག་པ་དང་འདྲེས་ཏེ་ཉམས་ལེན་བྱེང་སྟངས་སྐོར་གསུངས་པ་མང་ཆེ་བ་རེད། གང་ལྟར་ཡང་སྙིང་ན་ལེནྡྲའི་གཙུག་ལག་སློབ་གྲྭ་དེ་ནི་དེའི་ཚེ་དེའི་དུས་སུ་རྒྱ་གར་ནང་སྙན་གྲགས་ཡོད་པ་ཞིག་ཆགས་ཡོད། ང་ཚོའི་བོད་ལ་ཡོད་པའི་ཆོས་དེ་ནི་དེ་ནས་དར་བ་ཞིག་ཆགས་ཡོད།
ང་ཚོ་བོད་པར་བོད་ནང་དུ་སྔ་མོ་ནས་ཡོད་པའི་ཞང་ཞུང་བོན་ལུགས་ཀྱི་གཞུང་ནང་ཡོད་པའི་ལེགས་ཆ་ཡང་མཉམ་དུ་ཉམས་ལེན་བྱེད་ཀྱི་ཡོད་པའི་བཟོ་རེད། དེ་འདྲ་ཡིན་དུས་ཧ་ལམ་འཛམ་གླིང་འདིའི་སྟེང་ཁུངས་ལྡན་ལ་གཏིང་ཟབ་པོ་ཡོད་པའི་ད་ལྟ་བོད་ལ་འབྲེལ་བ་ཡོད་པའི་ལྟ་གྲུབ་རིག་གཞུང་ཞིག་ཆགས་ཡོད། སྤྱིར་སློབ་གྲྭ་ཁག་གི་ནང་དེང་དུས་ཀྱི་སློབ་ཚན་འགྲོ་བཞིན་ཡོད་ཀྱང་དུས་དུས་སུ་རུག་རུག་བྱས་ཏེ་ང་ཚོ་བོད་ཀྱི་ཕ་མེས་ནས་ཡོད་པའི་གཅེས་ནོར་ལྟ་བུ་ཆགས་པ། ད་ལྟ་ད་ལྟ་འཛམ་གླིང་འདིའི་སྟེང་ཕན་ཐོགས་བྱེད་ཐུབ་རྒྱུ་དང་ནུས་པ་ཡོད་པའི་ལྟ་གྲུབ་རིག་གཞུང་ཞིག་ལ་ང་ཚོས་བགྲོ་གླེང་བྱེད་རྒྱུ་དང་ངོ་སྤྲོད་བྱེད་རྒྱུ་ཆགས་ཡོད། ད་རེས་ཉིན་གཉིས་ཚོགས་བཞིན་ཡོད་པའི་རིང་ལ་ཁྱེད་རང་ཚོས་སྔར་མ་ཐོས་པ་གསར་དུ་ཐོས་རྒྱུ་དང་། དེ་སྔ་ཐོས་ཀྱང་གོ་བ་ཡག་པོ་མ་ཆགས་པ་རྣམས་གསལ་པོ་ཆགས་ཐུབ་རྒྱུ། སྔར་མ་ཤེས་པ་ཞིག་གསར་པ་ཤེས་རྒྱུ། སྔར་གོ་བ་མ་ཆགས་པ་དང་ཡང་ན་གོ་བ་ཕྱིན་ཅི་ལོག་པ་ལེན་པ་དེ་དག་གསལ་པོ་ཞིག་ངོ་སྤྲོད་རྒྱུ་ཞིག་ཡོང་རྒྱུའི་རེ་བ་ཡོད། གནས་ཚུལ་དེ་ལྟ་བུ་གོ་རྟོགས་བྱུང་བ་དེ་ཤེས་བྱ་རྒྱ་ཆེ་རུ་བཏང་བ་ཙམ་མིན་པར་མི་ཚེའི་ནང་བསམ་བློ་གཏོང་སྟངས་ལ་ལམ་སྟོན་བྱེད་ཀྱི་ཡོད། དེ་རིང་སང་གི་འཛམ་གླིང་འདིའི་སྟེང་ཕྱི་དངོས་པོ་དང་འབྲེལ་བའི་ཤེས་ཡོན་ཧ་ཅང་ཡར་རྒྱས་རྩེར་གསོན་པ་རྣམས་ལའང་སེམས་ཀྱི་དཀའ་ངལ་མང་དག་ཅིག་འཕྲད་བཞིན་ཡོད་པ་དེ་ཁག་མེད།
གང་ཡིན་བརྗོད་ན་དེང་རབས་ཀྱི་ཤེས་ཡོན་ཞེས་པ་དེ་ཕྱི་དངོས་པོ་ཡར་རྒྱས་གཙོ་བོར་དམིགས་པ་ཞིག་ཆགས་ཡོད། དེར་བརྟེན་ནང་སེམས་ཀྱི་ཞི་བདེ་ག་འདྲ་བསྐྲུན་དགོས་མིན་ད་ལྟ་ཡོད་བཞིན་པའི་འཛམ་གླིང་གི་ཤེས་ཡོན་སློབ་གསོའི་ནང་མི་འདུག སོང་ཙང་ཁྱེད་རང་ཚོར་ནམ་རྒྱུན་དེང་དུས་ཤེས་ཡོན་གྱི་གོམས་འདྲིས་ཡོད་པ་དེ་དག་གཅིག་པུས་མི་ཚེ་བདེ་སྐྱིད་ལྡན་པ་ཞིག་ཡོང་རྒྱུར་འགན་ལེན་བྱེད་ཐུབ་རྒྱུ་ཁག་པོ་རེད། དེང་དུས་ཀྱི་ཤེས་ཡོན་རྩེར་སོན་པ་སེམས་འཁྲུག་སྡོད་མཁན་མང་པོ་ཡོང་གི་འདུག དེ་འདྲ་ཡིན་དུས་ང་ཚོས་འདིར་གོ་བསྡུར་བྱེད་ཀྱི་ཡོད་པ་འདིས་སོ་སོའི་ཤེས་ཚད་དང་ཆོས་ཀྱི་གོ་རྟོགས་གོང་མཐོར་བཏང་བ་ཙམ་དུ་མ་ཟད་རང་ཉིད་ཀྱི་མི་ཚེ་སྐྱེལ་སྟངས་ལའང་ཏན་ཏན་ཕན་ཐོགས་ཡོང་རྒྱུའི་རེ་བ་ཡོད། ཅེས་བྱམས་བརྩེའི་ལམ་སྟོན་བཀའ་སློབ་སྩལ་རྗེས་རྒྱུན་ཆགས་གསུམ་པ་འདོན་གནང་མཛད་དེ་ཕྱི་ལོ་ ༡༩༦༣ ལོར་མགོན་པོ་གང་ཉིད་མཆོག་གིས་གསར་དུ་ལྗགས་རྩོམ་མཛད་པའི་ལེགས་བཤད་བློ་གསར་མིག་འབྱེད་ཀྱི་ཆོས་འབྲེལ་དབུ་འཛུགས་མཛད་ཡོད།།
