༢༠༡༣ ཟླ་ ༦ ཚེས་ ༡༡ རེས་གཟའ་མིག་དམར།
༄༅། །ཕྱི་ལོ་ ༢༠༡༣ ཟླ་ ༦ ཚེས་ ༡༠ རེས་གཟའ་ཟླ་བའི་ཉིན་ཐོག་མར་༸གོང་ས་༸སྐྱབས་མགོན་ཆེན་པོ་མཆོག་གིས་ནིའུ་ཛི་ལེན་ཌིའི་ཆོས་ལུགས་མཐུན་སྒྲིལ་གོང་འཕེལ་གཏོང་མཁན་གྱི་གཞོན་སྐྱེས་སྐུ་ཚབ་འཐུས་མི་ཁག་གཅིག་ལ་མཇལ་ཁ་དང་བཀའ་སློབ་སྩལ་དོན། ཆོས་ནི་སེམས་ནང་ཞི་བདེ་སྐྲུན་ཆེད་ཡིན། དེར་བརྟེན་ཆོས་དེ་གལ་ཏེ་རྙོག་གྲ་བཟོ་མཁན་གྱི་རྐྱེན་རྩ་ཆགས་པ་ཡིན་ན་ཧ་ཅང་ཐབས་སྡུག་རེད། ཆོས་ལུགས་གཙོ་གྲས་ཚང་མས་བྱམས་པ་དང་བརྩེ་བ། བཟོད་བསྲན་སོགས་བཟང་པོའི་རིན་ཐང་ཐོག་བསླབ་བྱ་རྒྱག་བཞིན་ཡོད་པ་གཅིག་མཚུངས་ཡིན། བཟོད་བསྲན་བྱས་པ་ཡིན་ན་རྙོག་གྲ་ཡོང་གཞི་མེད། ཅེས་སོགས་ཀྱི་བཀའ་སློབ་སྩལ་བསྟུན། ནིའུ་ཛི་ལེན་ཌིའི་བོད་དོན་རྒྱབ་སྐྱོར་གནང་མཁན་གྱི་གྲོས་ཚོགས་འཐུས་མི་བཅུ་གཉིས་དང་མཇལ་འཕྲད་མཛད།
སྐབས་དེར་༸གོང་ས་མཆོག་གིས་ཁོང་རྣམ་པར་བོད་དོན་ལ་རྒྱབ་སྐྱོར་གནང་བར་བཀའ་དྲིན་ཆེ་ཞུས་པ་དང་སྦྲགས། རྒྱ་ནག་རྒྱལ་ཁབ་དང་རྒྱ་མི་རིགས་ལ་མཚོན་ན་ངོ་མཚར་ལྡན་པ་ཞིག་ཡིན། འོན་ཀྱང་དཀའ་ངལ་འཕྲད་ས་དེ་རྒྱ་ནག་གཅིག་བསྡུས་དབང་འཛིན་ལམ་ལུགས་གུ་དོག་པོ་དེར་ཐུག་ཡོད། རྒྱ་ནག་མི་དམངས་དུང་ཕྱུར་བཅུ་གསུམ་རྣམས་ལ་དངོས་ཡོད་གནས་ཚུལ་ཤེས་རྒྱུའི་ཐོབ་ཐང་ཆ་ཚང་ཡོད་པ་མ་ཟད། དངོས་ཡོད་གནས་ཚུལ་ལ་གཞི་བཅོལ་ཏེ་བདེན་རྫུན་གྱི་རྣམ་དབྱེ་འབྱེད་རྒྱུའི་རྣམ་དཔྱོད་ཀྱང་ལྡན་ཡོད། དེར་བརྟེན་དེང་སྐབས་རྒྱ་ནག་གཞུང་གིས་གསར་འགྱུར་བརྒྱུད་ལམ་སོགས་ལ་དམ་བསྒྲགས་བྱ་རྒྱུ་དེ་བཟང་སྤྱོད་དང་ཡོངས་སུ་འགལ་ཡོད། ཕྱོགས་མཚུངས་དེང་སྐབས་རྒྱ་ནག་ནང་ཁྲིམས་ལུགས་སྟངས་འཛིན་བྱེད་མཁན་ཁྲིམས་ཞིབ་ལས་ཁུངས་ཀྱི་ལས་དོན་གཙོ་བོ་དེ་རྒྱ་ནག་གུང་ཁྲན་ཚོགས་པའི་ལས་དོན་བསྒྲུབ་རྒྱུ་དེ་ཡིན།
དེར་བརྟེན་རྒྱ་ནག་ནང་ཁྲིམས་ལུགས་དབང་བསྒྱུར་དང་འབྲེལ་བའི་ཁྲིམས་ཞིབ་ཁང་གི་ལས་དོན་བྱེད་ཕྱོགས་དེ་རྒྱལ་སྤྱིའི་གནས་ཚད་ཐོག་བསླེབ་ཐུབ་པ་དགོས་རྒྱུ་ཧ་ཅང་གལ་ཆེན་པོ་ཆགས་ཡོད། ཅེས་སོགས་ཀྱི་བཀའ་སློབ་སྩལ་རྗེས་༸གོང་ས་མཆོག་གིས་དུས་རབས་གསར་པའི་རྒྱ་ནག་གི་འཕོ་འགྱུར་དེ་བཞིན་མའོ་དང་ཏེང། ཅང་ཙེ་མིན། ཧུའུ་ཅིན་ཐའོ། དེ་བཞིན་ཞི་ཅིན་ཕིང་སོགས་འགོ་ཁྲིད་ལྔའི་ལྟ་གྲུབ་དང་ལངས་ཕྱོགས། དེ་བཞིན་གྲུབ་འབྲས་བཅས་ཀྱི་ཐོག་བཀའ་སློབ་སྩལ་དོན། མའོ་ཙེ་ཏུང་གིས་གུང་ཁྲན་རིང་ལུགས་ཀྱི་ལྟ་གྲུབ་གཙོ་འདོན་བྱས་ནས་ཕྱིན་པ་དང། ཏེང་ཞའོ་ཕིང་སྐབས་དཔལ་འབྱོར་གུ་ཡངས་ཀྱི་སྲིད་བྱུས་བཟུང་ནས་རྒྱ་ནག་དེ་བཞིན་འཛམ་གླིང་ཕྱི་ལ་སྒོ་མོ་ཕྱེ་པ་དང། ཅང་ཙེ་མིན་སྐབས་གཙོ་བོ་མང་ཚོགས་ཀྱི་ཁེ་ཕན་གཙོ་འདོན་བྱས་ཡོད། དེ་རྗེས་ཧུའུ་ཅིན་ཐའོ་སྐབས་འཆམ་མཐུན་གྱི་སྤྱི་ཚོགས་གཙོ་འདོན་བྱས་ཡོད་ཀྱང་ལམ་ལྷོང་བྱུང་མེད། ལྟ་གྲུབ་ལ་སྐྱོན་གང་ཡང་མེད། འོན་ཀྱང་ཐབས་ལམ་དེ་དྲག་པོའི་ཐོག་ནས་འཆམ་མཐུན་བསྐྲུན་ཐབས་བྱས་པ་དེས་ནོར་བ་རེད། དྲག་པོ་ནི་ཕན་ཚུན་ཡིད་ཆེས་གཏོར་བཤིག་གཏོང་མཁན་གཙོ་བོ་དེ་ཡིན། ཧུའི་ཅིན་ཐའོའི་དམིགས་ཡུལ་ཧ་ཅང་ཡག་པོ་ཡོད་ཀྱང་ཐབས་ལམ་ནོར་བ་རེད། ད་ཆ་ཞི་ཅིན་ཕིང་རྒྱ་ནག་དམར་ཤོག་ཚོགས་པའི་འགོ་ཁྲིད་ལྔ་པ་དེ་ཆགས་ཡོད། རྒྱ་ནག་མི་དམངས་དུང་ཕྱུར་བཅུ་གསུམ་ཡོད་པའི་ནང་འཆམ་མཐུན་དགོས་རྒྱུ་ཧ་ཅང་གལ་ཆེན་པོ་ཆགས་ཡོད། དེར་བརྟེན་རྒྱ་ནག་གི་སྲིད་བློན་ཟུར་པ་སྐུ་ཞབས་ཝུན་ཅཱ་པའོས་རྒྱ་ནག་ནང་ཆབ་སྲིད་ལམ་ལུགས་ལ་བཅོས་བསྒྱུར་དགོས་གལ་ཆེ་སྐོར་གསུངས་ཡོད། ཅེས་བཀའ་སློབ་སྩལ། ཡང་༸གོང་ས་མཆོག་གིས་མུ་མཐུད་བོད་དོན་འཐབ་རྩོད་ཐད་བཀའ་སློབ་སྩལ་དོན།
ང་ཚོས་རང་བཙན་རྩོད་ཀྱི་མེད། དུས་རབས་བདུན་པ་དང། བརྒྱད་པ། དགུ་པའི་སྐབས་ནས་བོད་དེ་རང་བཙན་གཙང་མའི་རྒྱལ་ཁབ་གཅིག་ཡིན་པ་ནི་རྒྱ་ནག་གི་ཡིག་ཆ་དེ་དག་ནང་དུའང་ཧ་ཅང་གསལ་པོ་བཀོད་ཡོད། འོན་ཀྱང་དུས་ཚོད་རིམ་བཞིན་བརྗེ་འགྱུར་འགྲོ་གིན་ཡོད། རྒྱ་གར་ལ་མཚོན་ན། དབྱིན་ཇིས་དབང་བསྒྱུར་མ་བྱས་སྔོན་རྒྱ་གར་ནང་རྒྱལ་ཕྲན་སིལ་བུ་ཆེ་ཆུང་མང་པོ་ཡོད། རྒྱལ་ཕྲན་སིལ་བུ་དེ་དག་གིས་སོ་སོའི་ས་གནས་ཐོག་རང་བཙན་གྱི་ངོ་བོའི་ཐོག་ནས་དབང་བསྒྱུར་བྱས་ཡོད། འོན་ཀྱང་རང་བཙན་ཐོབ་རྗེས་རྒྱལ་ཕྲན་སིལ་བུ་ཡོངས་རྫོགས་ཟླ་སྒྲིལ་བཏང་ནས་རྒྱ་གར་ཞེས་རྒྱལ་ཁབ་གཅིག་ཆགས་ཡོད། དེ་ལྟར་ནའང་རྒྱ་གར་ནང་ལུང་མཚན་འདྲ་མིན་ཡོད་པ་དེ་དག་ནང་སོ་སོའི་སྐད་ཡིག་དང་རིག་གཞུང་དེ་དག་རྒྱུན་སྐྱོང་ཐོག་ནས་ཡར་རྒྱས་ཀྱི་ཕྱོགས་སུ་གོམ་སྟབས་སྤོ་བཞིན་ཡོད།
ང་ཚོ་བོད་མི་ཚོ་ལའང་ཡར་རྒྱས་དགོས། དེང་སྐབས་བོད་མི་ཚོས་ཉེན་ཁར་མ་འཛེམས་པར་ནུབ་ཕྱོགས་སུ་འགྲོ་བཞིན་ཡོད། ཁོང་ཚོས་ནུབ་ཕྱོགས་སུ་ལས་ཀ་དང་དཔལ་འབྱོར་ལས་ཆོས་དོན་དུ་གཉེར་ཆེད་འགྲོ་གི་མེད། དེར་བརྟེན་གལ་ཏེ་ང་ཚོར་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ནང་གསལ་བ་ལྟར། བོད་མི་ཚོར་དོན་དམ་གྱི་མིང་དོན་མཚུངས་པའི་རང་སྐྱོང་གི་གནས་བབ་ཚད་ལྡན་ཞིག་ཐོབ་སྟེ། བོད་མི་ཚོས་རང་གི་ཆོས་དང་རིག་གཞུང། སྐད་ཡིག སོགས་འཛིན་སྐྱོང་སྤེལ་གསུམ་བྱ་རྒྱུའི་ཐོབ་ཐང་ཆ་ཚང་སྤྲད་པ་ཡིན་ན། རྒྱ་ནག་མི་དམངས་སྤྱི་མཐུན་རྒྱལ་ཁབ་ནང་བསྡད་ནས་བོད་མི་ཚོར་དཔལ་འབྱོར་གྱི་ཁེ་ཕན་ཡང་ཡོད། ཅེས་སོགས་ཀྱི་བཀའ་སློབ་སྩལ་རྗེས་དྲི་བ་ཁག་གཅིག་ལ་བཀའ་ལན་ཡང་སྩལ། དེ་རྗེས་༸གོང་ས་མཆོག་གིས་ཀེན་ཊ་བྷུ་རི་གཙུག་ལག་སློབ་གྲྭའི་སློབ་ཕྲུག་རྣམས་ལ་བཀའ་སློབ་སྩལ་ཡོད།།
