༢༠༡༣ ཟླ་ ༦ ཚེས་ ༢༨ རེས་གཟའ་པ་སངས།
༄༅། །ཕྱི་ལོ་ ༢༠༡༣ ཟླ་ ༧ ཚེས་ ༦ ཉིན་རང་ཅག་གངས་ཅན་པ་ཡོངས་ཀྱི་མགོན་སྐྱབས་དཔུང་གཉེན་བླ་ན་མ་མཆིས་པ་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༧༨ ཕེབས་པའི་གཞུང་འབྲེལ་སྐུའི་འཁྲུངས་སྐར་དུས་ཆེན་རྒྱ་གར་ལྷོ་ཕྱོགས་སེར་བྱེས་གྲྭ་ཚང་དུ་སྲུང་བརྩི་ཞུ་རྒྱུའི་གཞུང་འབྲེལ་མཛད་སྒོ་དང་སྟབས་བསྟུན་ལྷོ་ཕྱོགས་ཁུལ་དུ་ཉིན་གྲངས་ ༢༠ རིང་མཛད་འཕྲིན་ཆེད་ཆིབས་སྒྱུར་བསྐྱང་གཏན་འཁེལ་འདུག
དེ་ཡང་མགོན་པོ་གང་ཉིད་མཆོག་དང་སྟོན་འཁོར་ལྷན་རྒྱས་འདི་ཟླའི་ཕྱི་ཚེས་ ༥ ཉིན་ག་གྷལ་ནས་མཁའ་ལམ་བརྒྱུད་ལྷོ་ཕྱོགས་གྲོང་ཁྱེར་དུ་སྦེང་ལོར་དུ་༸ཞབས་སོར་འཁོད་རྗེས་སྔ་དྲོ་སྦེང་ལོར་ཁུལ་དུ་རྟེན་གཞི་བྱས་པའི་སྙན་གྲགས་ཅན་གྱི་རྒྱ་གར་དགོན་པའི་དབུ་ལས་རྣམས་ཀྱིས་ཇི་ལྟར་གདན་ཞུའི་གསོལ་འདེབས་ཞུས་དོན་ལྟར། བཀའ་བཞེས་ཟབ་མོ་ཐོབ་སྟེ་ཁུལ་དེའི་ཆོས་ཚོགས་ནས་ཉམ་ཐག་རྣམས་ལ་ཉིན་གུང་ཁ་ལག་སྦྱིན་གཏོང་གི་ལས་གཞི་དབུ་འབྱེད་མཛད་རྒྱུ་གྲུབ་མཚམས་རྒྱ་གར་ལྷོ་ཕྱོགས་སུ་ཆགས་པའི་བོད་མིའི་གཞིས་ཆགས་སྦེལ་ཀོབ་ཁུལ་དུ་རྟེན་གཞི་བྱས་པའི་སེར་ར་ཐེག་ཆེན་གླིང་དུ་༸ཞབས་སོར་འཁོད་རྒྱུ་ཡིན་འདུག ཕྱི་ཚེས་ ༦ ཉིན་གྱི་སྔ་དྲོ་༸གོང་ས་མཆོག་གིས་སེར་སྐྱ་མང་ཚོགས་ལ་སྒྲོལ་དཀར་ཡིད་བཞིན་འཁོར་ལོའི་ཚེ་དབང་སྩལ་གྲུབ་མཚམས་མགོན་པོ་གང་ཉིད་མཆོག་དགུང་གྲངས་ ༧༨ ཕེབས་པའི་གཞུང་འབྲེལ་སྐུའི་འཁྲུངས་སྐར་དུས་ཆེན་གྱི་མཛད་སྒོར་དབུ་བཞུགས་མཛད་རྒྱུ་ཡིན་པ་མ་ཟད། དེ་ཉིན་སྐུ་མགྲོན་གཙོ་བོ་ཀར་ན་ཊ་ཀའི་གཞུང་གི་མངའ་སྡེའི་སྤྱི་ཁྱབ་བློན་ཆེན་མཆོག་གིས་དབུས་མངའ་སྡེ་གཞུང་གི་དཔོན་རིགས་ཁག་གཅིག དེ་བཞིན་ཨ་རུ་ན་ཅལ་མངའ་སྡེའི་སྤྱི་ཁབ་བློན་ཆེན་མཆོག་དང་ཡུལ་སྐོར་བློན་ཆེན་པདྨ་མཁའ་འགྲོ་མཆོག་གིས་གཙོས་དཔོན་རིགས་ཁག་གཅིག ཕྱོགས་མཚུངས་འབྲས་ལྗོངས་གཞུང་གི་སྤྱི་ཁྱབ་བློན་ཆེན་མཆོག་གིས་གཙོས་དཔོན་རིགས་ཁག་གཅིག་སོགས་ཕེབས་གཏན་འཁེལ་ཡོད་འདུག
ལྷག་པར་དེ་ཉིན་སྦེལ་ཀོབ་སེར་སྐྱ་མང་ཚོགས་ཡོངས་ནས་༸གོང་ས་མཆོག་ལ་བཀའ་དྲིན་རྗེས་དྲན་མཚོན་ཆེད་འཇིག་རྟེན་མུན་སེལ་ཞེས་པའི་གཟེངས་རྟགས་འབུལ་ལམ་ཞུ་རྒྱུ་ཡིན་འདུག ཕྱི་ཚེས་ ༧ ནས་ ༡༡ བར་མགོན་པོ་གང་ཉིད་མཆོག་གིས་སེར་སྨད་ཐོས་བསམ་ནོར་གླིང་གྲྭ་ཚང་དུ་སེར་ར་བྱེས་སྨད་གཉིས་ཀྱི་དགེ་འདུན་པ་ལྔ་བརྒྱ་བརྒལ་བར་བསྙེན་རྫོགས་ཀྱི་སྡོམ་པ་སྩལ་རྒྱུ་དང་། དེ་བཞིན་ལུགས་བསམ་བསམ་གྲུབ་གླིང་གི་བོད་མིའི་གཞིས་ཆགས་ཀྱི་མཉམ་འབྲེལ་མི་དམངས་ཚོགས་ཁང་གསར་པ་དབུ་འབྱེད་རབ་གནས་མཛད་རྒྱུ་མ་ཟད། ཁུལ་དེར་རྟེན་གཞི་བྱས་པའི་ས་སྐྱའི་དགོན་པ་དང་བཀྲས་ལྷུན་སོགས་ཀྱི་དགོན་སྡེ་ཁག་ལ་གནས་གཟིགས་མཛད་རྒྱུ་ཡིན་འདུག དེ་ནས་ཧུན་སུར་རབ་རྒྱས་གླིང་དུ་རྟེན་གཞི་བྱས་པའི་རྫོང་ཆོས་གྲྭ་ཚང་གིས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར། བཀའ་བཞེས་ཟབ་མོ་ཐོབ་སྟེ་ཕྱི་ཚེས་ ༡༣ ནས་ ༡༤ བར་རྫོང་ཆོས་གྲྭ་ཚང་དུ་བཀའ་དབང་སྩལ་རྒྱུ་དང་། ཕྱི་ཚེས་ ༡༦ ཉིན་མོན་གྷོ་འདོད་རྒུ་གླིང་བོད་མིའི་གཞིས་ཆགས་ཁུལ་དུ་༸ཞབས་སོར་འཁོད་རྗེས་ཕྱི་ཚེས་ ༢༤ བར་གདན་ས་དགའ་ལྡན་དང་འབྲས་སྤུངས་གཉིས་ཀྱི་དགེ་འདུན་པར་བསྙེན་རྫོགས་ཀྱི་སྡོམ་པ་སྩལ་རྒྱུ་ཡིན་འདུག་པ་བཅས། །
