༢༠༡༣ ཟླ་ ༦ ཚེས་ ༡༤ རེས་གཟའ་པ་སངས།
༄༅། །ཕྱི་ལོ་ ༢༠༡༣ ཟླ་ ༦ ཚེས་ ༡༢ དང་ ༡༣ བཅས་ཉིན་གྲངས་གཉིས་རིང་སེར་བྱེས་མཁས་སྙན་གྲྭ་ཚང་གིས་གོ་སྒྲིག་འོག་བཀའ་བློན་ཁྲི་ཟུར་མཁས་དབང་ཟམ་གདོང་རིན་པོ་ཆེ་མཆོག་དབུ་བཞུགས་ཐོག་སེར་བྱེས་མཁས་སྙན་གྲྭ་ཚང་གི་ཚོགས་ཁང་དུ་དུས་རབས་དང་མཐུན་པའི་དགེ་འདུན་པའི་མཛད་ཕྱོགས་ཞེས་པའི་བརྗོད་གཞིའི་ཐོག་མཁས་པའི་བགྲོ་གླེང་ཚོགས་ཆེན་སྐོང་ཚོགས་གནང་འདུག སྐབས་དེར་བཀའ་བློན་ཁྲི་ཟུར་མཁས་དབང་ཟམ་གདོང་རིན་པོ་ཆེ་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་མཐར་ཐུག་གང་ཡིན་པ་དང་ཤེས་ཡོན་གྱི་ཐོག་ནས་ཕྱི་ནང་ཀུན་ལ་འགྲེལ་བ་བྱེད་དགོས་གལ་ཆེ་ཡིན་སྐོར་གྱི་བརྗོད་གཞིའི་ཐོག་གསུང་བཤད་གནང་ཡོད།
དེ་ཡང་བཀའ་བློན་ཁྲི་ཟུར་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་ནི་ཧ་ཅང་གཏིང་ཟབ་པ་དང་རྒྱ་ཆེ་བ་ཡིན་སྟབས། མགོན་པོ་གང་ཉིད་མཆོག་གི་དགོངས་གཞི་མཐར་ཐུག་གང་ཡིན་པ་རྟོགས་ཐུབ་རྒྱུ་ཁག་པོ་རེད་ཅེས་དང། ཡིན་ནའང་ང་ཚོ་ཐུན་མོང་སྣང་བར་༸གོང་ས་མཆོག་གི་དགོངས་གཞི་ནི་སྡུག་བསྔལ་བའི་སེམས་ཅན་ཐམས་ཅད་ལ་ཕན་བདེ་བསྐྲུན་རྒྱུ་དེ་ཡིན་པ་སོགས་ཀྱི་གསུང་བཤད་གནང་ཡོད། གཞན་ཡང་ཤེས་ཡོན་གྱི་ཐོག་ཕྱི་ནང་ཀུན་ལ་འགྲེལ་བ་བྱེད་དགོས་པའི་གལ་ཆེའི་སྐོར་གྱི་གསུང་བཤད་གནང་སྐབས། ང་ཚོའི་གདན་ས་ཁག་གི་སློབ་གཉེར་བའི་གནས་ཚད་དང་ཤེས་ཡོན་དེ་ནང་ཆོས་ལ་བརྒྱུད་མངའ་རྩ་བ་ནས་མེད་པའི་ནུབ་ཕྱོགས་པ་དང་རྒྱ་གར་གྱི་མཐོ་རིམ་སློབ་གྲྭའི་སློབ་དཔོན་དང་སློབ་ཕྲུག་ལ་བསྟུན་དགོས་བྱུང་ན་དེ་ཕྱོགས་བསྡོམས་བྱེད་རྒྱུ་ཧ་ཅང་ཁག་པོ་རེད་ཅེས་དང། གཞན་ཡང་སྐྱེ་འགྲོ་ཡོངས་ལ་ཕན་བདེ་སྒྲུབ་པར་ནང་པ་སངས་རྒྱས་པའི་ཆོས་ཚུལ་ལ་བཞུགས་ནས་ཉམས་སུ་བླངས་མ་ཐུབ་ན་ནང་ཆོས་ཀྱི་ཕན་ཐོགས་ཐུབ་ཀྱི་མེད་པའི་རྒྱུན་ལྡན་གྱི་བསམ་ཚུལ་དེ་དོར་ཏེ་ཆོས་དད་ཡོད་མེད་གང་ཡིན་ཡང་ནང་ཆོས་ནས་བསྟན་པའི་བླང་དོར་གྱི་གནས་དེ་དག་ཉམས་སུ་བླངས་ཐུབ་ན་རང་རང་གི་མི་ཚེ་དང་གཏན་གྱི་མདུན་མར་ཕན་ཐོགས་ཡོད་པ་སོགས་ཀྱི་གསུང་བཤད་གནང་བ་དང་ལྷན་དྲི་བ་དྲིས་ལན་ཡང་གནང་ཡོད་འདུག དེ་བཞིན་རྒྱ་གར་ལྷོ་ཕྱོགས་ཏ་མིན་ན་ཌུ་མངའ་སྡེའི་མ་ཌ་ར་སི་གཙུག་ལག་སློབ་གཉེར་ཁང་གི་སློབ་དཔོན་ཆེན་མོ་མཁས་དབང་ར་མུ་མ་ནི་ཝར་ནན་མཆོག་གིས། ནང་པའི་དགེ་འདུན་པ་རྣམས་ནས་སྤྱིའི་སྐྱེ་འགྲོ་རྣམས་ལ་ཕན་བདེ་གང་སྒྲུབ་ཐུབ་མིན་སྐོར་གྱི་བརྗོད་གཞིའི་ཐོག་གསུང་བཤད་དང་དྲི་བ་དྲིས་ལན་གནང་ཡོད།
ཕྱོགས་མཚུངས་རྣམ་གྲྭ་མཁན་པོ་ཁྲོམ་ཐོག་རིན་པོ་ཆེ་མཆོག་གིས་དགོན་སྡེའི་ངོས་ནས་རྒྱ་གར་དང་བོད་པའི་མཐོ་སློབ་ཁག་གི་དབར་འབྲེལ་བྱེད་རྒྱུ་དང། གཞུང་འབྲེལ་དང་གཞུང་འབྲེལ་མིན་པའི་སྤྱ་ཚོགས་ཁག་དང་འབྲེལ་བ་དང་མཉམ་གནས་བྱེད་དགོས་པའི་གལ་ཆེའི་རང་བཞིན། དེ་བཞིན་བོད་མི་མང་སྤྱི་འཐུས་རོང་པོ་བློ་བཟང་སྙན་གྲགས་ལགས་ཀྱིས་དུས་རབས་ཉེར་གཅིག་པའི་སྤྱི་ཚོགས་ནང་ཤེས་ཡོན་སྤེལ་རེས་བྱ་རྒྱུའི་གལ་གནད་སྐོར། བློ་བཟང་ནོར་བུ་ཤཱསྟྲི་ལགས་ཀྱིས་ཁོར་ཡུག་སྲུང་སྐྱོབ་དང་ཤེས་ཡོན་དང་འབྲེལ་བའི་སྤྱི་ཚོགས་ཞབས་ཞུ་ཐོག་དགེ་འདུན་པའི་ངོས་ནས་ཆ་ཤས་ལེན་ཕྱོགས་ཐད་གསུང་བཤད་དང་དྲི་བ་དྲིས་ལན་གནང་ཡོད་པ་བཅས།།
