༢༠༡༣ ཟླ་ ༥ ཚེས་ ༡༦ རེས་གཟའ་ཕུར་བུ།
༄༅། ཕྱི་ལོ་ ༢༠༡༣ ལོའི་ཟླ་ ༥ ཚེས་ ༡༣ ཉིན་བཀའ་བློན་ཁྲི་ཟུར་བཀྲས་མཐོང་བསྟན་འཛིན་རྣམ་རྒྱལ་མཆོག་གིས་ཨེ་ཤི་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་གྱི་དབུ་འཛིན་གྱི་ཐུགས་འགན་བཞེས་ཏེ་ལས་དོན་སྤེལ་འགོ་བཙུགས་ཡོད་པ་ལྟར། ཕྱི་ཚེས་ ༡༥ ཉིན་བོད་སྐད་སྡེ་ཚན་གྱི་ལས་བྱེད་རྣམ་པ་ལྷན་འཛོམས་ཐོག་ལས་འཁུར་གཙང་བཞེས་ཀྱི་རྟེན་འབྲེལ་མཛད་སྒོ་ཚུགས་པའི་གནས་ཚུལ་རླུང་འཕྲིན་ཁང་དེའི་དྲ་རྒྱའི་སྟེང་སྤེལ་འདུག་པ་ལྟར། མཛད་སྒོ་དེའི་ཐོག་རྟེན་འབྲེལ་གྱི་གསོལ་ཇ་འབྲས་སིལ་འདེགས་འབུལ་ཞུས་པ་དང་འབྲེལ། དབུ་འཛིན་ཟུར་པ་འབེན་པ་སྟོབས་རྒྱལ་ལགས་དང་། དབུ་འཛིན་གཞོན་པ་ལས་ཐོག་ཀརྨ་རྡོ་རྗེ་ལགས་རྣམ་གཉིས་ནས་ཕེབས་བསུའི་གསུང་བཤད་གནང་ཡོད། དེ་རྗེས་ཨེ་ཤི་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་ནང་ལས་བྱེད་ ༤༠ ཙམ་ཡོད་པ་རྣམས་ཀྱིས་རང་རང་སོ་སོའི་མཚན་དང་ལས་དོན་གང་དང་གང་་གནང་གི་ཡོད་པ་རྣམས་རེ་རེ་བཞིན་ངོ་སྤྲོད་སྙན་སེང་ཞུས་འདུག བཀྲས་མཐོང་བསྟན་འཛིན་རྣམ་རྒྱལ་མཆོག་གིས་འགན་འཛིན་གྱིས་ཕྱག་ལས་གནང་བའི་ཐོག་མའི་ལས་བྱེད་ཚོར་གནང་བའི་ཐོག་མའི་གསུང་བཤད་དེའི་ནང་། ཨེ་ཤི་ཡ་རང་དབང་རླུང་འཕྲིན་ཁང་གི་འཛིན་སྐྱོང་གི་གནད་ཡོད་མི་སྣ་ཚོས་བོད་སྐད་སྡེ་ཚན་གྱི་ལས་བྱེད་རྣམ་པའི་ལས་དོན་དང་ལྷག་བསམ་ལ་བསྔགས་བརྗོད་དང་རྗེས་སུ་ཡི་རང་གནང་བ་དང་འབྲེལ། རླུང་འཕྲིན་ཁང་འདིའི་ནང་སྐད་ཡིག་གཞན་ཁག་བརྒྱད་ཡོད་པ་ཚོ་དང་བསྡུར་ན། ཕྱོགས་གང་ཐད་ནས་གནས་ཚད་མཐོ་བ་ཡོད་པ་ཞིག་བཟོ་དགོས་པའི་ལམ་སྟོན་གནང་ཡོད།
ཁོང་གིས་ད་དུང་བོད་སྐད་སྡེ་ཚན་ནང་ཡོད་པའི་ལས་བྱེད་རྣམས་ནས་གང་ཐུབ་ཀྱིས་ཨེ་ཤི་ཡ་རང་དབང་རླུང་འཕྲིན་ཁང་སྤྱི་ཡོངས་ཀྱི་ལས་བྱེད་ཆེ་འབྲིང་ཆུང་གསུམ་དང་ལྷན་དུ་འབྲེལ་ལམ་བཟང་པོ་དགོས་པ་གལ་ཆེན་པོ་ཡིན་པའི་ལམ་སྟོན་གནང་འདུག ཡང་ལས་བྱེད་རྣམ་པའི་གླ་ཕོགས་དེ་དག་ནི་མི་མང་གི་ཁྲལ་གྱི་ཐོག་ནས་བསླེབས་པ་ཞིག་ཡིན་པ་དེ་མཁྱེན་པའི་ཐོག་རྒྱུན་གཏན་གྱི་ཕྱག་ལས་ལྷག་བསམ་རྣམ་དག་གནང་དགོས་པའི་ལམ་སྟོན་ཡང་གནང་ཡོད།
དབུ་འཛིན་བཀྲས་མཐོང་བསྟན་འཛིན་རྣམ་རྒྱལ་མཆོག་གིས་ད་དུང་། རླུང་འཕྲིན་གྱི་ལས་རིམ་དེ་མི་བྱེ་བྲག་པ་ཁ་ཤས་ཀྱི་མ་ཡིན་པར། མི་མང་འཕོན་ཆེན་པོ་ཞིག་གི་ནང་ཁྱབ་འཕེལ་འགྲོ་ཡི་ཡོད་དུས། གནད་དོན་སྤྱི་དང་ཚིག་རེ་གཉིས་ཀྱི་བེད་སྤྱོད་བྱེད་སྟངས་ཐོག་ལའང་གཟབ་གཟབ་བྱེད་དགོས་པའི་བཀའ་སློབ་ནན་པོ་ཕེབས་འདུག མཐའ་བསྡོམས་སུ་ལས་བྱེད་ཡོངས་ནས་དགའ་བསུའི་ཐལ་སྒྲ་སྒྲོག་བཞིན་བོད་སྐད་སྡེ་ཚན་གྱི་དབུ་འཛིན་གསར་པར་ཕེབས་བསུ་གཟབ་རྒྱས་ཞུས་འདུག་པ་བཅས
