༢༠༡༣ ཟླ་ ༥ ཚེས་ ༢༡ རེས་གཟའ་མིག་དམར།
༄༅། །ཕྱི་ལོ ༢༠༡༣ ལོའི་ཟླ་ ༥ ཚེས ༡༩ ཉིན་སུད་སི་ས་གནས་མདོ་སྨད་རྒྱུན་ལས་སྐབས་བརྒྱད་པའི་གོ་སྒྲིག་འོག་སུད་སི་ས་གནས་ཤི་ཝེ་ཙིར་བཀའ་བློན་ཁྲི་ཟུར་སྐུའི་གཅེན་པོ་རྒྱལ་ལོ་དོན་གྲུབ་མཆོག་ལ་བཀའ་དྲིན་རྗེས་དྲན་ཞུ་སླད་སུད་སི་མདོ་སྨད་མི་མང་གི་བཀའ་དྲིན་རྗེས་དྲན་གསེར་གྱི་གཟེངས་རྟགས་ཞེས་པའི་གཟེངས་རྟགས་ཐེངས་དང་པོ་འབུལ་བཞེས་ཀྱི་མཛད་སྒོ་ཞིག་ཚོགས་ཡོད་འདུག
དེ་ཡང་མཛད་སྒོའི་སྟེང་སུད་སི་སྐུ་ཚབ་དོན་གཅོད་ཆོས་སྐྱབས་པ་ཚེ་བརྟན་བསམ་གྲུབ་ལགས་དང་། སུད་སི་དང་ལེཀ་ཏེན་སིཊཡན་བོད་རིགས་མི་མང་གི་ཚོགས་གཙོ་གང་གཞི་ཚང་བློ་བཟང་ལགས། སུད་སི་ཆོལ་ཀ་གསུམ་གྱི་ཚོགས་གཙོ་རྣམ་པ། གཞུང་འབྲེལ་མ་ཡིན་པའི་ཚོགས་སྡེ་ཁག་གི་ཚོགས་གཙོ་རྣམ་གྱིས་གཙོས། ཕ་རན་སི་དང་། འཇར་མན་བཅས་ནས་ཕེབས་པའི་མདོ་སྨད་མི་སྣ་འགའ་དང་། སུད་སི་གནས་སྡོད་མདོ་སྨད་མི་མང་བརྒྱ་ལྷག་མཉམ་འཛོམས་གནང་ཡོད།
དེ་བཞིན་སྐུ་ངོ་མཆོག་གི་ལོ་རྒྱུས་མདོར་བསྡུས་འཁོད་པའི་དེབ་ཆུང་ཞིག་ས་གནས་རྒྱུན་ལས་ངོས་ནས་པར་བསྐྲུན་གྱིས་དེ་ཉིན་སྐུ་མགྲོན་རྣམས་དང་མི་མང་ལ་འགྲེམས་སྤེལ་གནང་ཡོད་འདུག རྩ་བའི་སུད་སི་མདོ་སྨད་མི་མང་གི་གཟེངས་རྟགས་འདི་ནི་བོད་ཀྱི་ཉེ་རབས་ལོ་རྒྱུས་ཁྲོད་ཆེས་དཀའ་སྡུག་ཆེ་ཞིང། ཆགས་འཇིག་གི་གཉེན་འཕྲང་ཅན་གྱི་བརྒྱུད་རིམ་ཁྲོད་བོད་བསྟན་སྲིད་ལ་མཛད་རྗེས་རླབས་ཆེན་བསྐྱངས་པའི་བོད་ཀྱི་སྲི་ཞུ་བ་ཞིག་ལ་བཀའ་དྲིན་རྗེས་དྲན་ཞུ་སླད་གསེར་གྱི་གཟེངས་རྟགས་ཤིག་འབུལ་གཏན་འཁེལ་པའི་རྟགས་མ་ཞིག་ཡིན། རྟགས་མ་འདིའི་མིང་ལ་༼སུད་སི་མདོ་སྨད་མི་མང་གི་བཀའ་དྲིན་རྗེས་དྲན་གྱི་གསེར་གྱི་གཟེངས་རྟགས་༽ ཞེས་ཡིན་འདུག་པ་བཅས།།
