༢༠༡༣ ཟླ་ ༥ ཚེས་ ༦ རེས་གཟའ་ཟླ་བ།
༄༅། །བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། རྒྱ་ནག་གཞུང་གིས་རྨ་ལྷོ་སོག་རྫོང་གི་རྩོམ་པ་པོ་ཨ་རི་འཇིགས་མེད་ལགས། ལོ་གསུམ་དང་ཟླ་གཅིག་རིང་བཙོན་འཇུག་བྱས་ཏེ་ཉེ་ལམ་གློད་བཀྲོལ་བཏང་འདུག
དེ་ཡང་རྒྱ་ནག་གཞུང་གིས་སྔ་ལོའི་ཧོར་ཟླ་ ༡ ནང་རྒྱལ་ཁབ་ཀྱི་གསང་བ་ཕྱིར་བསྒྲགས་བྱེད་མཁན་གྱི་ཉེས་མིང་འོག་བོད་མདོ་སྨད་རྨ་ལྷོ་སོག་རྫོང་གི་རྩོམ་པ་པོ་ཨ་རི་འཇིགས་མེད་ལགས་སུ་ལོ་ ༣ དང་ཟླ་ ༡ རིང་རྒྱ་ནག་ལན་ཀྲུ་གྲོང་ཁྱེར་གྱི་བཙོན་ཁང་ཨང་དང་པོའི་ནང་བཙོན་འཇུག་བཀག་ཉར་བྱས་ཡོད་པ་ལྟར། ཟླ་སྔོན་མའི་ཕྱི་ཚེས་ ༢༧ ཉིན་རྒྱ་གཞུང་གིས་ཁོང་ཀློད་གྲོལ་བཏང་ཡོད་འདུག་ཀྱང་། བཙོན་ཁང་ནང་སྡུག་སྦྱོང་མནར་གཅོད་སྣ་ཚོགས་ཤིག་བཏང་ཡོད་སྟབས། ཁོང་གི་སྒལ་ཚིགས་དང་མཁལ་མ་ནད་པ་ཆགས་ཡོད་པ་མ་ཟད། བཙོན་ཁང་དུ་ཚེམ་བཟོའི་ལས་ཀ་བྱེད་བཅུག་སྟེ་མིག་སྐྱོ་བོ་ཆགས་པ་སོགས་གཟུགས་པོའི་གནས་སྟངས་སྐྱོ་བོ་ཆགས་ཡོད་འདུག དེ་སྔོན་ཁོང་དང་འགྲོགས་འདྲིས་ཟབ་པའི་གྲོགས་པོ་ཚོས་ངོས་མི་ཟིན་པའི་གནས་སུ་གྱུར་ཡོད་པ་དང་། ཁ་སང་ཁོང་ལ་ལྟ་རུ་བསྐྱོད་པའི་བོད་མི་ཞིག་གིས་ཁོང་གི་ཀླད་པ་དང་སེམས་ཁམས་ཀྱང་ཅུང་ཟད་མི་བདེ་བ་ཆགས་ཡོད་པའི་ཚོར་སྣང་བྱུང་ཡོད་སྐོར་བརྗོད་འདུག
རང་ལོ་ ༢༨ ལ་སོན་པའི་རྩོམ་པ་པོ་ཨ་རི་འཇིགས་མེད་དམ་འཇིགས་མེད་རྒྱ་མཚོ་ལགས་ནི། བོད་མདོ་སྨད་རྨ་ལྷོ་སོག་རྫོང་ཁུ་སུན་ཡུལ་ཚོ་བེ་སི་ཆུང་བ་སྡེ་བའི་ཕ་ཤེས་རབ་དང་མ་སྒྲོལ་དཀར་གཉིས་ཀྱི་བུ་རུ་སྐྱེས་པ་དང་། ཕྱི་ལོ་ ༡༩༩༥ ལོར་བླ་བྲང་བཀྲ་ཤིས་འཁྱིལ་གྱི་རྨད་བྱུང་ཐོས་བསམ་གླིང་གི་ཆོས་སྒོར་ཞུགས་ཏེ་སློབ་གཉེར་གནང་ཡོད་འདུག རིམ་གྱིས་ཤིང་དཔར་ཆེན་མོར་ལས་ཀ་ཡང་བྱས་ཡོད་འདུག ཕྱི་ལོ་ ༢༠༠༦ ཟླ་ ༨ ནང་ཀན་སུའུ་ཞིང་ཆེན་ནང་བསྟན་སློབ་གླིང་དུ་ཞུགས་ཡོད་པ་དང་། སློབ་གྲྭར་སྡོད་སྐབས་ཁོང་གིས་ཕྱི་ཕྱོགས་ཀྱི་བརྒྱུད་ལམ་ཁག་གཅིག་ཏུ་མགོ་ལོག་འཇིགས་མེད་དང་འཇིགས་མེད་མགོ་རིལ། འགར་རྩེ་འཇིགས་མེད་བཅས་ཀྱི་ལོ་རྒྱུས་དང་གནས་སྟངས་ངོ་སྤྲོད་གནང་ཡོད་འདུག ཕྱི་ལོ་ ༢༠༡༠ ལོར་སློབ་མཐར་ཕྱིན་རྗེས་སྐྱ་སར་བབས་ཡོད་པ་དང་། སྐབས་དེར་ཁོང་གྲོགས་པོ་ཞིག་དང་མཉམ་དུ་རྨ་ལྷོ་ཁུལ་སྐལ་བཟང་མེ་ཏོག་གླུ་གར་ཚོགས་པའི་ཟབ་སྦྱོང་འཛིན་གྲྭ་བསྡུ་རུ་ཕྱིན་ཏེ། དེར་ཡོད་གྲོགས་པོ་དང་ངོ་ཤེས་བརྒྱུད་སློབ་ཕྲུག་ཚོར་ཡར་སྐུལ་བྱས་ཡོད་པ་མ་ཟད། ལོ་དེའི་ཕྱི་ཟླ་ ༡༠ རེབ་གོང་སློབ་མའི་ཡར་ལངས་སྐབས་ཀྱི་སྣེ་འཁྲིད་བྱས་ཡོད་འདུག ཕྱི་ཟླ་ ༡༠ བའི་ཚེ་ཤར་ཕྱིར་ཀན་ལྷོ་གཙོད་གྲོང་ཁྱེར་དུ་ཡོང་སྟེ་སློབ་མའི་ཡར་ལངས་སྐོར་གྱི་གནས་ཚུལ་ཕྱིར་བསྒྲགས་བྱེད་སྐབས་གཙོད་ཉེན་རྟོག་པས་འཛིན་བཟུང་བྱས་ཏེ། ཕྱི་ལོ་ ༢༠༡༢ ཧོར་ཟླ་ ༡ ཚེས་ ༡༤ ཉིན་རྒྱལ་ཁབ་ཀྱི་གསང་བ་ཕྱིར་བསྒྲགས་བྱེད་མཁན་གྱི་ཉེས་མིང་འོག་ལོ་ ༣ གྱི་བཙོན་འཇུག་ཁྲིམས་ཐག་བཅད་དེ་ཀན་སུའུ་ཞིང་ཆེན་ལན་ཀྲུ་གྲོང་ཁྱེར་གྱི་བཙོན་ཁང་ཨང་དང་བོར་བཙོན་འཇུག་བྱས་ཡོད་འདུག
ཁོང་གིས་དེ་སྔོན་ཨ་རི་དང་ཨ་རི་འཇིགས་མེད། རྣམ་མཁྱེན། སྟོབས་ལྡན་སོགས་ཀྱི་སྨྱུག་མིང་སྤྱད་དེ་བོད་ནང་གི་དུས་དེབ་དང་ཚགས་པར་ཁག་ཏུ་རྩོམ་ཡིག་མང་པོ་སྤེལ་མྱོང་ཡོད་འདུག རྩོམ་ཡིག་དེ་དག་ཁྲོད་ཀྱི་༼མིག་ཆུ་སར་ལྷུང་དུས།༽ ཞེས་པའི་རྩོམ་ཡིག་དེ་འཐུས་ཚབ་རང་བཞིན་གྱི་རྩོམ་ཡིག་ཅིག་ཏུ་བགྲང་གི་ཡོད་པ་དང་། ཕྱི་ཕྱོགས་ཀྱི་དུས་དེབ་༼མཐོ་སྒང་གི་རྒྱབ་མདུན།༽ དུའང་ཁོང་གི་རྩོམ་པ་པོ་རྒན་པ་ཞིག་ཁ་བརྡ་བྱས་པའི་རིགས་དང་གཞན་གྱི་རྩོམ་ཡིག་དང་གནས་ཚུལ་སོགས་མཁོ་སྤྲོད་བྱས་ཡོད་འདུག་པ་བཅས།།
