༢༠༡༣ ཟླ་ ༥ ཚེས་ ༡༠ རེས་གཟའ་པ་སངས།

༄༅། །ཕྱི་ལོ་ ༢༠༡༣ ཟླ་ ༥ ཚེས་ ༨ ཉིན་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་རྒྱ་གར་བྱིས་པའི་སློབ་གྲྭ་བྷལ་བྷར་ཏི་ (Bal Bharti Public School Pitampura) ཞེས་པའི་ནང་བོད་ཀྱི་ཉིན་མོ་སྲུང་བརྩི་ཞུས་ཡོད།
དེ་ཡང་གོང་ཚེས་ཉིན་སློབ་གྲྭའི་འཛིན་རིམ་བཅུ་གཅིག་དང་བཅུ་གཉིས་ཀྱི་དགེ་ལས་སློབ་ཕྲུག་ཁྱོན་ ༧༠༠ ཙམ་ལ་ལྡི་ལི་སྐུ་ཚབ་དོན་གཅོད་ལས་ཁུངས་ཀྱི་གསར་འགོད་འབྲེལ་མཐུད་པ་བསྟན་འཛིན་ལེགས་བཤད་ལགས་ཀྱིས་བོད་དོན་ངོ་སྤྲོད་དང་སློབ་མ་ཚོའི་དྲི་བར་ལན་འདེབས་གནང་ཡོད། སྐབས་དེར་ཁོང་གིས་ད་ལྟའི་བོད་ནང་གི་ཛ་དྲག་གནས་སྟངས་སྤྱི་དང་། ཡང་སྒོས་རྒྱ་དཀར་ནག་གི་འབྲེལ་ལམ་ནང་ས་ཆའི་གནས་བབ་ཀྱི་ཆ་ནས་བོད་དེ་ཧ་ཅང་གནད་འགག་ཆེན་པོ་ཆགས་ཡོད་སྐོར་ངོ་སྤྲོད་དང་གསུང་བཤད་གནང་ཡོད། དེ་ནས་སློབ་ཕྲུག་ཚོས་བོད་མིའི་རང་དབང་གི་འཐབ་རྩོད་ཐོག་རྒྱ་གར་གྱི་ངོས་ནས་ཅི་ཞིག་བྱེད་དགོས་སྐོར་དང་། པཎ་ཆེན་རིན་པོ་ཆེ་མཆོག་གི་གནས་སྟངས་སོགས་ཀྱི་སྐོར་དྲི་བ་དྲིས་ཡོད་པར་ལེགས་བཤད་ལགས་ཀྱིས་ལན་འདེབས་ཁ་གསལ་གནང་ཡོད།

བོད་ཀྱི་ཉིན་མོ་སྲུང་བརྩི་དེ་ནི་ལྡི་ལིར་རྟེན་གཞི་བྱས་པའི་འཕགས་བོད་འབྲེལ་མཐུད་ལས་ཁུངས་ཀྱིས་ལྡི་ལི་ཁུལ་གྱི་མཐོ་སློབ་དང་སློབ་གྲྭ་ཁག་ནང་ཤེས་ཡོན་དང་འབྲེལ་བའི་ལས་རིམ་གོ་སྒྲིག་ཞུས་པ་ཞིག་ཡིན། ཤེས་ཡོན་དང་འབྲེལ་བའི་ལས་རིམ་དེའི་ཐོག་གཏམ་བཤད་ཙམ་མ་ཟད། དངོས་བྱུང་གློག་བརྙན་སྟོན་རྒྱུ། དེ་བཞིན་པར་རིགས་འགྲེམས་སྟོན་གྱི་ལམ་ནས་༸གོང་ས་མཆོག་དང་བོད་སྐོར་གོ་རྟོགས་རྒྱ་ཆེ་སྤེལ་རྒྱུ་ཡིན་འདུག་པ་བཅས། །