༢༠༡༣ ཟླ་ ༥ ཚེས་ ༨ རེས་གཟའ་ལྷག་པ།
༄༅། །འདི་གར་འཕྲོད་བསྟེན་ལས་ཁུངས་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་གོ་སྒྲིག་འོག་མོན་གྷོ་འདོད་རྒུ་གླིང་སྨན་ཁང་གི་སོའི་སྨན་པ་ཚེ་དབང་ལགས་ཀྱིས་ཕྱི་ལོ་ ༢༠༡༣ ཟླ་ ༤ ཚེས་ ༡༤ ནས་ཚེས་ ༢༤ བར་རྒྱ་གར་བྱང་ཤར་ས་ཁུལ་མེའོ་དང་ཏི་ཛུ། བསྟན་འཛིན་སྒང་བཅས་ནང་གནས་སྡོད་བོད་མི་གྲངས་ ༧༥༠ ཙམ་ལ་ལུས་པོའི་འཕྲོད་བསྟེན་སྤྱི་དང་། ལྷག་པར་སོ་ལ་བདག་གཅེས་བྱེད་སྟངས་སོགས་ཀྱི་སྐོར་གཏམ་བཤད་དང་གློག་བརྙན་བསྟན་པ་ཙམ་མ་ཟད། དངོས་སུ་མི་གྲངས་ ༣༡༡ ཙམ་ལ་སོ་ལ་བརྟག་དཔྱད་དང་སྨན་བཅོས་ཀྱང་གནང་ཡོད།སྐབས་དེར་མི་མང་དང་ས་གནས་སློབ་གྲྭ་ཁག་གི་སློབ་ཕྲུག་རྣམས་ལའང་འཕྲོད་བསྟེན་སྐོར་ངོ་སྤྲོད་གནང་ཡོད།
ཕྱོགས་མཚུངས་འཕྲོད་བསྟེན་ལས་ཁུངས་ནས་རྡ་སའི་ཁུལ་དུ་བོད་ཁྱིམ་སློབ་གྲྭའི་སློབ་ཕྲུག་དང། གོ་པལ་པུར་བོད་ཁྱིམ་སློབ་ཕྲུག་བཅས་ལ་ཕྱི་ཟླ་ ༤ ཚེས་ ༢༢ ནས་ཕྱི་ཟླ་ ༥ ཚེས་ ༢ བར་སྨན་པ་བསྟན་འཛིན་དགྲ་འདུལ་ལགས་ཀྱིས་ཁ་ནང་གི་སྐྲན་ནད་རིགས་ཇི་ལྟར་བཅོས་དགོས་པའི་གཏམ་བཤད་གནང་བ་མ་ཟད། སྐྲན་ནད་སྔོན་འགོག་ཇི་ལྟར་ཐུབ་མིན་སོགས་ངོ་
སྤྲོད་གནང་ཡོད། ཁོང་ནི་རྒྱ་གར་ལྷོ་ཕྱོགས་ཅེན་ནའི་སྨན་གྱི་སློབ་གྲྭ་ནས་ཐོན་པ་དང། ཐེངས་འདིར་ཁོང་དང་ལྷན་ཨ་རིའི་སྨན་ཁང་ནང་སྨན་ཞབས་པའི་ཕྱག་ལས་གནང་མཁན་བསྟན་འཛིན་བདེ་ཆེན་ལགས་ཀྱང་ཕེབས་ཡོད། ཁོང་གཉིས་ཀྱིས་བོད་ཁྱིམ་སློབ་གྲྭ་གསུམ་གྱི་ནང་ཁྱོན་དགེ་ལས་སློབ་ཕྲུག་གྲངས་ ༣༠༥༢ ཡོད་པ་རྣམས་ལ་སྨན་བཅོས་གོ་རྟོགས་དང་བརྟག་དཔྱད་གནང་ཐུབ་པ་བྱུང་ཡོད། །
