༢༠༡༣ ཟླ་ ༥ ཚེས་ ༢༡ རེས་གཟའ་མིག་དམར།
༄༅། །ཕྱི་ལོ་ ༢༠༡༣ ཟླ་ ༥ ཚེས་ ༢༡ ཉིན་རྡ་ས་གངས་སྐྱིད་གསོལ་ཐབས་ཡང་སྟེང་ཚོགས་ཁང་དུ་བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གི་གོ་སྒྲིག་འོག་མཐོ་རིམ་སློབ་གཉེར་བ་རྣམས་ལ་དེང་གི་ན་གཞོན་དང་མ་འོངས་པའི་འགོ་ཁྲིད་ཅེས་པའི་ཟབ་སྦྱོང་ཐེངས་ ༡༢ པའི་ལས་རིམ་ཉིན་དགུའི་རིང་ཚོགས་གནང་གི་ཡོད་འདུག
དེ་ཉིན་སྔ་དྲོ་ཆུ་ཚོད་ ༡༠ ཐོག་སྐུ་མགྲོན་གཙོ་བོ་བོད་མི་མང་སྤྱི་འཐུས་ལྷན་ཁང་གི་ཚོགས་གཙོ་སྤེན་པ་ཚེ་རིང་མཆོག་དང་། བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གི་ངེས་སྟོན་པ་སྤྱི་འཐུས་ཆོས་སྐྱོང་དབང་ཕྱུག་ལགས། ལས་འཆར་འགན་འཛིན་སྤྱི་འཐུས་ཨཅརྱ་ཡེ་ཤེས་ཕུན་ཚོགས་ལགས། འབྲེལ་ལས་བསམ་འཕེལ་རྡོ་རྗེ་ལགས། རྒྱ་གར་གྲོང་ཁྱེར་ས་གནས་དགུ་ནས་མཉམ་བཞུགས་སློབ་ཕྲུག་བཅས་ཁྱོན་མི་གྲངས་ ༦༠ བརྒལ་བ་ལྷན་འཛོམས་ཐོག་ངེས་སྟོན་པ་སྤྱི་འཐུས་ཆོས་སྐྱོང་དབང་ཕྱུག་ལགས་ཀྱིས་ཟབ་སྦྱོང་གི་དམིགས་དོན་ངོ་སྤྲོད་གསུང་བཤད་གནང་གྲུབ་མཚམས་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་མཆོག་གིས་དབུ་འབྱེད་གསུང་བཤད་གནང་བའི་སྙིང་དོན། ཁྱེད་ཚོ་འདིར་ཕེབས་པ་རྣམས་ལ་འཚམས་འདྲི་ཞུ་རྒྱུ་ཡིན།
དེང་གི་ན་གཞོན་ནི་ཁྱེད་རྣམས་ཆགས་ཡོད་ལ་མ་འོངས་འགོ་ཁྲིད་ནི་ཁྱེད་རྣམས་ཆགས་ཡོད། ཟབ་སྦྱོང་འདི་ལྟ་བུ་གོ་སྐབས་ཐོབ་ཏེ་ཚུགས་དགོས་པ་ནི་ང་ཚོ་ཚང་མ་མི་ཚེ་འདིའི་རིང་ཤ་ཁྲག་རུས་གསུམ་གང་ཡིན་ཀྱང་བོད་པ་ཞིག་ཆགས་ཡོད་ལ་བོད་ཡིན་པའི་ལས་འགན་དམིགས་བསལ་བ་ཞིག་ཡོད། མི་རིགས་གཞན་དང་མི་འདྲ་བའི་ང་ཚོ་གནས་སྟངས་མི་འདྲ་བ་ཞིག་ཆགས་ཡོད། ཆབ་སྲིད་ཀྱི་སྐྱབས་བཅོལ་ཆགས་ཡོད་དུས་ལས་འགན་ཡང་གཞན་དང་མི་འདྲ་བ་ཞིག་འཁྱེར་དགོས་བྱེད་ཀྱི་རེད་མ་གཏོགས་གཞན་ལྟར་སོ་སོའི་འཚོ་བ་སྐྱེལ་ཐུབ་ཙམ་དང་སོ་སོའི་ནང་མི་ལྟ་ཐུབ་ཙམ་གྱི་མི་ཚེ་བསྐྱལ་བ་ཡིན་ན་མི་ཚེ་དོན་དང་ལྡན་པ་ཆགས་ཀྱི་ཡོད་མེད་བསམ་བློ་གཏོང་དགོས་རྒྱུ་ཞིག་ཆགས་ཡོད། ཁྱེད་རྣམས་ཚང་མར་ནང་མི་རེར་ཡོད་ཁྱིམ་མི་དེ་དག་ཚང་མ་སྤྱི་ཚོགས་ཀྱི་སྒྲོམ་གཞི་རེའི་ནང་སླེབས་ཡོད། བོད་མིའི་སྒྲིག་འཛུགས་བྱས་ཏེ་ཁྱེད་ཚོའི་ཁྱིམ་ཚང་ནས་བརྩིས་པ་ཡིན་ན་སྤྱི་ཚོགས་ནས་བྱས་ཏེ་ཡར་གཞུང་བར་རྩིས་པ་ཡིན་ན་ཁྱེད་ཚོའི་གཞུང་ཆགས་ཡོད། བློ་བཟང་སེང་གེ་ལགས་སྲིད་སྐྱོང་དང་ང་ཚོགས་གཙོ་རེད་བྱས་ཏེ་གཞུང་ང་དང་སྤྱི་འཐུས་བཀའ་བློན་རྣམ་པར་དག་གི་མེད། གཞུང་འདི་སུའི་རེད་དམ་བརྗོད་ན་ང་རང་ཚོ་ཚང་མའི་རེད། ང་ཚོར་འདིར་སྒྲིག་འཛུགས་གང་ཡོད་པ་དེ་ཤེས་ཐུབ་པ་བྱེད་རྒྱུ་དེ་ཧ་ཅང་གལ་ཆེན་པོ་རེད།
དཔེར་ན་སོ་སོ་སྒེར་དང་ཁྱིམ་ཚང་ཞིག་ལ་ཆ་མཚོན་ནའང་ནང་གི་གནས་སྟངས་ཤེས་པའི་ཐོག་ནས་སོ་སོའི་ནང་འགན་གང་འདྲ་འཁྱེར་དགོས་མིན་བསམ་བློ་ཞིག་གཏོང་དགོས། སྤྱི་ཚོགས་ལ་ཆ་བཞག་ནའང་ཁྱེད་རང་ཚོ་གཞིས་ཆགས་ཁག་དང་བོད་ནས་ཡོང་མཁན་ཡིན་ན་ཡུལ་ལུང་འདྲ་མིན་མང་པོ་ཞིག་ནས་ཡོད། དེ་ཚོའི་གནས་སྟངས་ཤེས་པའི་ཐོག་ནས་སོ་སོའི་སྤྱི་ཚོགས་ཀྱི་ཞབས་ཕྱི་གང་འདྲ་སྒྲུབ་དགོས་ཀྱི་འདུག དེ་ཤེས་པར་དོ་སྣང་བྱེད་དགོས། སོགས་དང་ང་ཚོའི་བཙན་བྱོལ་སྤྱི་ཚོགས་ཀྱི་མང་གཙོ་དེར་གཞན་དང་མི་འདྲ་བའི་ཁྱད་ཆོས་གང་ཡོད་པ་དང་།
ང་ཚོ་ཆབ་སྲིད་ཀྱི་སྐྱབས་བཅོལ་བ་ཞིག་ཡིན་པའི་དབང་གི་ང་ཚོའི་དམིགས་ཡུལ་གཙོ་བོ་ང་ཚོ་བོད་ལ་གང་འདྲ་བྱས་ཏེ་ལོག་གི་ཡིན་ནམ་བརྗོད་ན་དེའི་ཐོག་གླེང་སློང་མང་པོ་ཡོང་གི་ཡོད་ཀྱང་སེམས་ཀྱི་ཚོར་སྣང་ཙམ་མིན་པར་རྩ་བའི་ཐག་གཅོད་ཀྱི་རྒྱུ་མཚན་དང་ལྡན་པའི་དངོས་ཡོད་གནས་ཚུལ་ལ་གཞི་བཅོལ་བ་ལས་ཐབས་ལམ་གཞན་མེད་སྐོར་སོགས་ཀྱི་གསུང་བཤད་གནང་རྗེས་སློབ་ཕྲུག་སོ་སོས་རང་ཉིད་ངོ་སྤྲོད་དང་ཟབ་སྦྱོང་ཐོག་རེ་བ་ཇི་ཡོད། མ་འོངས་མདུན་ལམ་སྐོར་གསུང་རྗེས་བོད་མིའི་སྒྲིག་འཛུགས་ཀྱི་སྒྲོམ་གཞི་ཐོག་ཇི་ཤེས་ཀྱི་ཚོད་ལྟའི་དྲི་ཤོག་བཀང་རྗེས་ལས་འཆར་འགན་འཛིན་སྤྱི་འཐུས་ཨཅརྱ་ཡེ་ཤེས་ཕུན་ཚོགས་ལགས་ཀྱིས་བོད་མིའི་སྒྲིག་འཛུགས་ཀྱི་མང་གཙོའི་སྒྲོམ་གཞི་དང་གཞུང་འབྲེལ་མིན་པའི་ཚོགས་པ་ཁག་ངོ་སྤྲོད་སྙིང་བསྡུས་དང་། ལས་བྱེད་བསམ་འཕེལ་རྡོ་རྗེ་ལགས་ཀྱིས་ལམ་སྟོན་གསུང་བཤད་གནང་སྟེ་གྲོལ།
ད་ཐེངས་ཉིན་དགུའི་རིང་གི་ཟབ་སྦྱོང་འདིར་བོད་མིའི་སྒྲིག་འཛུགས་ཀྱི་ཆེད་མཁས་མི་སྣ་ ༢༥ ཙམ་གདན་ཞུས་ཀྱི་བོད་མིའི་ཆབ་སྲིད་གནས་སྟངས་མཚོན་པའི་བརྗོད་གཞི་འདྲ་མིན་ཐད་རྒྱ་གར་ས་གནས་དགུའི་ནང་མཐོ་སློབ་འགྲིམས་བཞིན་པའི་སློབ་ཕྲུག་གྲངས་ ༥༦ མཉམ་བཞུགས་གནང་ཡོད། བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གི་ངེས་སྟོན་པ་སྤྱི་འཐུས་ཆོས་སྐྱོང་དབང་ཕྱུག་ལགས་སུ་ཟབ་སྦྱོང་འདི་ཐེངས་ ༡༢ ཡིན་པས་ད་བར་ཕྱི་མིག་ཞིག་བལྟས་ཏེ་འགྲུབ་འབྲས་ཇི་ཙམ་ཐོན་མིན་སྐོར་ལ་བཅའ་དྲི་ཞུ་སྐབས་གསུང་དོན། དེ་སྔ་ཟབ་སྦྱོང་འདིའི་ནང་མཉམ་བཞུགས་གནང་བ་མང་པོ་ཞིག་བཙན་བྱོལ་བོད་མིའི་གཞུང་འབྲེལ་མིན་པའི་ཚོགས་པ་ཁག་ནང་འགན་འཁྱེར་མཁན་མང་པོ་ཞིག་དང་། ལྷག་པར་དུ་རྡ་སར་བོད་མིའི་སྒྲིག་འཛུགས་ནང་ལས་ཀ་བྱེད་མཁན་མང་དག་མཇལ་རྒྱུ་ཙམ་མ་ཟད། ཕྱོགས་མཐའི་ས་གནས་ཁག་ནང་མང་པོ་མཇལ་རྒྱུ་འདུག བོད་མིའི་སྒྲིག་འཛུགས་དང་བོད་མིའི་སྤྱི་ཚོགས་མ་ཡིན་པར་ཕྱིར་གང་དུ་ཐོན་པ་ཡིན་ནའང་བོད་མིའི་མགྲིན་ཚབ་པ་བྱས་ཏེ་འགྲེལ་བཤད་བྱེད་ཐུབ་པའི་ནུས་པ་ཐོན་འདུག་ཞུ་རྒྱུ་ཡིན། ཞེས་འགྲེལ་བཅོས་གནང་སོང་བ་བཅས།།
