༢༠༡༣ ཟླ་ ༥ ཚེས་ ༡༣ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ཟླ་ ༥ ཚེས་ ༡༠ རེས་གཟའ་པ་སངས་ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་པོར་ཊི་ལེན་ཌི་ Portland མངའ་སྡེའི་གྲོང་ཁྱེར་ཨོ་རེ་གོན་ Oregon ནང་རྟེན་གཞི་བྱས་པའི་མེ་ཏི་རི་པ་ནང་པའི་སློབ་གཉེར་ཁང་དུ་ Maitripa College ཆིབས་སྒྱུར་བསྐྱངས། སྐབས་དེར་སེར་བྱེས་གཙང་པ་ཁང་མཚན་གྱི་ཡང་སྲིད་རིན་པོ་ཆེས་ཕེབས་བསུ་གཟབ་རྒྱས་དང་སྦྲགས་གདན་འདྲེན་ཞུས་ཡོད། སློབ་གཉེར་ཁང་འདི་ནི་ཐོག་མར་ཕྱི་ལོ་ ༢༠༠༥ ལོར་གསར་འཛུགས་གནང་བ་དང་། དེ་རྗེས་ཕྱི་ལོ་ ༢༠༠༨ ནས་བསླབ་པ་མཐར་སོན་པའི་སློབ་གཉེར་བ་རྣམས་ལ་ཕྱག་འཁྱེར་སྤྲོད་རྒྱུའི་ཐོབ་ཐང་རག་པར་བརྟེན། ད་ཐེངས་༸གོང་ས་མཆོག་དབུ་ཞུགས་ཐོག་བསླབ་པ་མཐར་སོན་གྱི་ཕྱག་འཁྱེར་འབུལ་ལམ་ཞུ་རྒྱུའི་མཛད་སྒོ་ཚོགས་ཡོད།
དེ་ཡང་༸གོང་ས་མཆོག་སློབ་གཉེར་ཁང་དེའི་ཚོགས་ཁང་ཆེན་མོའི་ནང་༸ཞབས་སོར་མ་འཁོད་གོང་རྒྱལ་བ་སྲས་དང་བཅས་པའི་སྟེན་མཆོག་སྤྱན་སྔར་གནས་གཟིགས་མཛད། དེ་ནས་ཞབས་སྟེག་སྟེང་༸ཞབས་སོར་འཁོད་བསྟུན། སློབ་གཉེར་ཁང་གི་ཕྱག་འཁྱེར་ཚོགས་ཆུང་གི་སྐུ་ཚབ་སྐུ་ཞབས་ཇེ་ནི་ཕར་ཌི་ཡ་ལོ་ Jennifer Diallo ལགས་ཀྱིས་ངོ་སྤྲོད་ཀྱི་གསུང་བཤད་མདོར་ཙམ་སྙན་
སྒྲོན་ཞུས་པའི་ནང་། མེ་ཏི་རི་པ་སློབ་གཉེར་ཁང་གི་བྱུང་རབས་ལོ་རྒྱུད་མདོར་ཙམ་དང་། དེ་རྗེས་སྐྱེ་བ་སྔ་ཕྱི་ཡོད་མེད་དང་འབྲེལ་བའི་བརྗོད་གཞིའི་ཐོག་ཚན་རིག་དང་ནང་པའི་ལྷན་ཚོགས་ཐོག་༸གོང་ས་མཆོག་གིས་བཀའ་སློབ་སྩལ། སྐབས་དེར་ཐོག་མར་ཀླད་ཁམས་ཚན་རིག་པ་སྐུ་ཞབས་ཨེ་བྷེན་ཨེ་ལེག་ཛན་ཊར་ Dr Eben Alexander མཆོག་གིས་ལོ་ངོ་བཞི་དང་ཕྱེད་ཙམ་གོང་རང་ཉིད་ཀླད་པའི་སྐྱི་ཚད་ཀྱི་ནད་ meningitis མནར་སྐབས་ཀླད་རྩར་མ་རྟེན་པའི་སེམས་ཀྱི་མྱོང་བ་ཁྱད་པར་བ་ཞིག་ཡོད་པ་ར་སྤྲོད་བྱུང་ཡོད་སྐོར་དང་། མྱོང་ཚོར་དེས་ཁོང་གི་སྐྱེ་བ་སྔ་ཕྱིའི་ཐོག་ལ་ལྟ་ཚུལ་དེར་ཧ་ཅང་འགྱུར་བ་ཐེབས་ཡོད་པ་ཙམ་མ་ཟད། སེམས་ཀྱི་ནུས་པའི་ཐོག་ལྟ་ཚུལ་དེར་ཧ་ཅང་འགྱུར་བ་ཕྱིན་ཡོད་སྐོར་སོགས་གསུངས།
ཕྱོགས་མཚུངས་སྐབས་དེར་ནང་པའི་མཁས་དབང་སྐུ་ཞབས་ཧོ་སི་ཀེ་བྷི་ཛོན་ལགས་ཀྱིས་ནང་ཆོས་ནས་ཡང་སྲིད་སྐོར་གསུང་སྐབས། ཡང་སྲིད་སྐོར་རྒྱ་གར་གསོལ་རྒྱུན་རིག་གནས་ནང་ཡི་ཆེས་ཤུགས་ཆེན་པོ་བྱེད་བཞིན་ཡོད་ཀྱང་། རྒྱ་གར་གནའ་བོའི་རིག་བྱེད་ཀྱི་གཞུང་ལུགས་ (Vedas) ནང་དེའི་སྐོར་དེ་ཙམ་གསུང་མེད་ལུགས་དང་། ཡེ་ཤུ་མ་འདས་སྔོན་གྱི་དུས་རབས་བརྒྱད་པ་ཙམ་ནས་ཡང་སྲིད་སྐོར་ཟུར་ཙམ་གསལ་ཡོད། འོན་ཀྱང་ཕྱིས་སུ་ནང་པའི་གཞུང་ལུགས་ནང་ཡང་སྲིད་སྐོར་གསུང་མང་པོ་རིམ་བཞིན་ཐོན་ཡོད་སྐོར་གསུངས། དེ་བཞིན་ཁོང་གིས་སྐབས་དེར་རྒྱ་གར་ན་ལེཎྜའི་མཁས་དབང་སློབ་དཔོན་ཆོས་གྲགས་ཀྱིས་རྒྱང་འཕེན་པ་རྣམས་ཚར་གཅོད་སྐབས་རྒྱབ་རྟེན་ལུང་ཙམ་ལ་ཆ་མ་བཞག་པར་དངོས་སུམ་མྱོང་བའི་ཐོགས་ནས་སྐྱེ་བ་ཕྱི་མ་ཡོད་པའི་བསྒྲུབ་བྱེད་གཏན་ལ་འབེབས་ཐབས་མཛད་སྐབས། ནང་གི་རྣམ་པར་ཤེས་པ་ནི་ཕྱི་དངོས་པོ་གཟུགས་ཅན་རག་པའི་ངོ་བོ་དང་མི་མཚུངས་པར། ཤེས་པའི་རྒྱུན་སྔ་ཕྱི་ལ་རྟེན་ནས་འགྲོ་དགོས་ཚུལ་སོགས་ཞིབ་ཕྲ་གསལ་བཤད་གནང་ཡོད།
སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱོགས་གཅིག་ནས་ཚན་རིག་པ་ཚོས་སྐྱེ་བ་ཕྱི་མ་ཡོད་མེད་ཐོག་ཚན་རིག་གི་ལམ་ནས་ཉམས་ཞིབ་ཀྱི་ལས་ལ་བསྔགས་བརྗོད་མཛད་པ་དང་སྦྲགས། སྐྱེ་བ་སྔ་ཕྱི་ཡོད་མེད་ལྟ་བུ་གནས་ཚུལ་རིགས་གཅིག་ལྐོག་འགྱུར་གྱི་གནད་ལུགས་ཆགས་ཡོད་པར་བརྟེན། ཚན་རིག་པ་ཚོས་མཐོང་བ་མངོན་འགྱུར་གྱི་ཆོས་ཙམ་ལ་དཔྱད་པ་བྱེད་མཁན་ཡིན་པར་བརྟེན། དེ་རིགས་ལ་ཚན་རིག་པས་དཔྱད་པའི་མཚམས་ལས་བརྒལ་བ་ཡིན་སྐོར་བཀའ་སློབ་སྩལ་བ་མ་ཟད། ༸གོང་ས་མཆོག་གིས་སྐབས་དེར་ནང་ཆོས་ནས་མཐོང་བ་མངོན་འགྱུར་དང་། ཅུང་ཟད་ལྐོག་འགྱུར། ཤིན་ཏུ་ལྐོག་འགྱུར་ལྟ་བུའི་རྣམ་གཞག་གསུང་པའི་ནང་ནས་ཚན་རིག་པ་ཚོས་གཙོ་བོ་མཐོང་བ་མངོན་འགྱུར་གྱི་ཆོས་ལ་དཔྱད་པ་བྱ་རྒྱུ་དང་། སྐབས་རེ་རྗེས་དཔག་ལ་རྟེན་ནས་ལྐོག་འགྱུར་གྱི་ཆོས་ལའང་ཞིབ་རྟོག་བྱེད་བཞིན་ཡོད་པ་མ་གཏོགས། ཤིན་ཏུ་ལྐོག་འགྱུར་གྱི་ཆོས་ལ་དཔྱད་པ་བྱེད་སྐབས་དེ་ཉམས་སུ་མྱོང་བའི་ཤེས་པ་རྐྱང་པའི་སྟེང་ནས་འགྲོ་དགོས་དུས། མྱོང་བ་པོ་དེ་ཁོ་ནས་ཤེས་ཐུབ་པའི་གནས་སྟངས་ཤིག་ཆགས་ཡོད། ངོས་ཀྱི་བསམ་ཚུལ་ལྟར་ན། ཤེས་པའི་རིམ་པ་ཕྲ་རག་མང་པོ་ཡོད་པ་དེ་དག་ལ་ཚན་རིག་པ་ཚོས་གཞི་ནས་དོ་སྣང་བྱེད་འགོ་ཚུགས་བཞིན་ཡོད།
དེར་བརྟེན་ངོས་ཀྱིས་འདས་པའི་ལོ་ངོ་གསུམ་ཅུ་ཙམ་གྱི་ནང་ཚན་རིག་པ་མང་པོ་ཞིག་དང་ཐུག་འཕྲད་ཀྱིས་ཁོང་ཚོ་དང་ལྷན་ཤེས་པའི་རྣམ་གཞག་ཐོག་བགྲོ་གླེང་ཤུགས་ཆེན་པོ་བྱས་ཡོད་ཀྱང་། ད་ལྟའི་འཆར་གནད་དོན་དེ་དག་ཐོག་གཞི་རིམ་གྱི་གནས་སྟངས་ཙམ་ལས་ད་དུང་ཉམས་ཞིབ་གཏིང་ཟབ་པོ་ཡོང་རྒྱུ་རེད། ཀླད་པའི་རྫས་གཟུགས་ཅན་རག་པ་དེ་ཙམ་ལ་རྟེན་ནས་སེམས་ཀྱི་རྣམ་གཞག་གཏན་ལ་འབེབས་དགོས་བྱུང་ན་དཀའ་ངལ་འཕྲད་རྒྱུ་ཉག་གཅིག་ཡིན། སེམས་ནི་ཧ་ཅང་ཕྲ་བའི་ཆོས་ཤིག་ཡིན། ལྷག་པར་དུད་འགྲོའི་ཀླད་པར་ཚན་རིག་པའི་ཉམས་ཞིབ་བྱ་རྒྱུ་ལྟ་བུར་མཚོན་ན། དུད་འགྲོའི་ཀླད་པ་ནི་མིའི་ཀླད་པ་ལས་ཧ་ཅང་བོང་གཟུགས་ཆུང་བ་མ་ཟད། ཧ་ཅང་ཐ་དད་ཡིན། ཞེས་སོགས་ཀྱི་གསུང་བཤད་གནང་།
དེ་རྗེས་ཡང་སྲིད་རིན་པོ་ཆེ་མཆོག་གིས་༸གོང་ས་མཆོག་ལ་ཆེད་བསྟོད་ཀྱི་ཕྱག་འཁྱེར་འབུལ་ལམ་ཞུས། མཛད་སྒོ་གྲུབ་བསྟུན། ༸གོང་ས་མཆོག་ཁུལ་དེ་ནས་ཨུ་ཇེན་གྲོང་ཁྱེར་དུ་ཆིབས་ཞལ་འགྱུར། ཁུལ་དེར་༸ཞབས་སོར་འཁོད་བསྟུན་འཁོན་རིགས་བསྟན་པའི་མངའ་བདག་དཔལ་ས་སྐྱ་གོང་མ་བདག་ཁྲི་རིན་པོ་ཆེ་མཆོག་གིས་ཕེབས་བསུ་གཟབ་རྒྱས་ཞུས། སྐབས་དེར་འཇིག་མེད་རིན་པོ་ཆེ་མཆོག་སོགས་ཀྱང་ཕེབས་བསུར་བཅར་ཡོད། དེ་རྗེས་༸གོང་ས་མཆོག་སྟོན་འཁོར་དང་བཅས་པ་གནམ་ཐང་ནས་ཨོ་རེ་གོན་གྲོང་ཁྱེར་དུ་ཆིབས་སྒྱུར་བསྐྱངས། ཞུགས་གནས་མགྲོན་ཁང་དུ་༸ཞབས་སོར་འཁོད་བསྟུན། ཨོ་རེ་གོན་གཙུག་ལག་སློབ་གྲྭ་དང་རྙིང་བརྒྱུད་བསམ་གཏན་ཆོས་གླིང་ཐུན་མོང་གིས་༸གོང་ས་མཆོག་ལ་གསོལ་སྟོན་འབུལ་ལམ་ཞུས་པ་དགྱེས་བཞེས་མཛད་པ་དང་སྦྲགས། ཨོ་རེ་གོན་གཙུག་ལག་སློབ་ཁང་གི་དཔལ་མོ་ཞི་བདེ་ཚོགས་ཁང་གསར་བཞེངས་ལེགས་གྲུབ་བྱུང་བའི་དབུ་འབྱེད་མཛད་སྒོར་ཇི་ལྟར་གདན་ཞུའི་གསོལ་འདེབས་ཞུས་དོན་ལྟར། བཀའ་བཞེས་བཟང་པོ་སྨིན་སྩལ་གྱིས་ཆིབས་སྒྱུར་བཀའ་དྲིན་བསྐྱངས་ཏེ་བཀའ་སློབ་སྩལ་བ་མ་ཟད། དེ་རྗེས་ཨོ་རེ་གོན་གཙུག་ལག་སློབ་ཁང་གི་མེ་ཐིའུ་ན་ཡི་ཊི་་ཨེ་རི་ནེའི་ Matthew Knight Arena ཚོགས་ཁང་དུ་དགེ་ལས་སློབ་ཕྲུག་བཅས་ཁྱོན་མི་གྲངས་ ༡༠༠༠༠ བརྒལ་བར་བཀའ་སློབ་སྩལ།
སྐབས་དེར་༸གོང་ས་མཆོག་གིས་གཙོ་བོ་སེམས་རྒྱུས་བཟང་པོ་བྱེད་དགོས་པ་དང་མི་ཕན་ཚུན་མི་འདྲ་བ་ཕྲན་བུ་ཡོད་ཀྱང་། གཞི་རྩའི་མིའི་ལུས་སེམས། སེམས་ཚོར་གང་གི་ཆ་ནས་འགྲོ་མི་རིགས་གཅིག་པ་ཡིན་པར་བརྟེན། ང་ཚོས་མི་ཕན་ཚུན་མི་དབར་མི་འདྲ་བའི་ཁྱད་པར་ཕྲན་བུ་ཡོད་པ་དེ་དག་ལ་དོ་སྣང་མ་སྤྲད་པར་གཙོ་བོ་ང་ཚོ་མི་ཕན་ཚུན་འདྲ་མཚུངས་ཀྱི་ཆོས་ལ་དོ་སྣང་ཤུགས་ཆེན་པོ་སྤྲོད་རྒྱུ་ཧ་ཅང་གལ་ཆེན་པོ་ཡིན་སྐོར་སོགས་བཀའ་སློབ་གཟབ་རྒྱས་སྩལ།
