༢༠༡༣ ཟླ་ ༥ ཚེས་ ༡༦ རེས་གཟའ་ཕུར་བུ།
༄༅། །ཕྱི་ལོ་ ༢༠༡༣ ཟླ་ ༥ ཚེས་ ༡༤ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཝིསི་ཀོན་སིན་མངའ་སྡེའི་གྲོས་ཚོགས་འཐུས་མི་རྣམས་ལ་བཀའ་སློབ་སྩལ་ཡོད།
དེ་ཡང་༸གོང་ས་མཆོག་གིས་གོང་ཚེས་ཉིན་དེའི་ཕྱེད་ཡོལ་མངའ་སྡེའི་གྲོས་ཚོགས་གོང་འོག་གཉིས་ཀྱི་འཐུས་མི་ཁྱོན་ ༡༣༢ བརྒལ་བར་བཀའ་སློབ་སྩལ་དོན། དེ་རིང་ངོས་ནས་མངའ་སྡེ་འདིའི་མི་མང་གི་འཐུས་མི་རྣམས་ལ་གཏམ་བཤད་བྱ་རྒྱུ་བྱུང་བར་ཧ་ཅང་གཟོ་བརྗིད་ཐོབ་པ་ཞིག་བྱུང། ངོས་རང་ཆུང་དུས་ནས་དམངས་གཙོའི་ཁེ་ཕན་དང་ཁྲིམས་ལུགས་དབང་བསྒྱུར་ཐོག་ཡིད་སྨོན་ཡོད་པར་བརྟེན། དམངས་གཙོའི་ལམ་ལུགས་ལ་ཡི་རང་ཐོག་རྒྱབ་སྐྱོར་བྱེད་མཁན་ཞིག་ཡིན། ངོས་ཀྱིས་ཕྱི་ལོ་ ༡༩༥༡ ལོར་ཆབ་སྲིད་ཀྱི་འགན་དབང་ལེན་ཡོད་པ་དང། ཕྱི་ལོ་ ༡༩༥༢ ལོར་ངོས་ཀྱིས་བོད་ནང་ལེགས་བཅོས་ཚོགས་ཆུང་ཞིག་བཙུགས་ཡོད། འོན་ཀྱང་སྐབས་དེར་རྒྱ་ནག་དམར་ཤོག་གི་དབང་ཤུགས་གང་ཙམ་ཞིག་བོད་ནང་ཁྱབ་ཚར་བར་བརྟེན། ལེགས་བཅོས་དེ་ཡང་རྒྱ་ནག་གཞུང་གི་འདོད་པ་ཡོད་པ་ཁོ་ནར་བསྟུན་དགོས་པ་ལས་དོན་དམ་གྱི་ལེགས་བཅོས་ཤིག་བྱུང་མེད། ཕྱི་ལོ་ ༡༩༥༩ ལོར་ང་ཚོ་རྒྱ་གར་ལ་སྐྱབས་བཅོལ་དུ་བསླེབས་རྗེས་བཙན་བྱོལ་བོད་མིའི་སྤྱི་ཚོགས་དེ་མང་གཙོའི་ལམ་ལུགས་ཐོག་གོམ་པ་རིམ་སྤོས་ཀྱིས་ཕྱི་ལོ་ ༢༠༠༡ ལོར་བོད་མི་མང་གིས་འོས་བསྡུའི་ལམ་ནས་འགོ་ཁྲིད་འོས་འདེམས་གནང་ཡོད། དེ་ནས་བཟུང་ངོས་རང་ཕྱེད་རྒས་ཡོལ་གྱི་ཚུལ་དུ་གནས་ཡོད་པ་དང་། ཕྱི་ལོ་ ༢༠༡༡ ལོར་མང་གཙོའི་ལམ་ནས་མི་མང་གིས་འགོ་ཁྲིད་འོས་འདེམས་བྱས་པ་དེ་ནས་བཟུང་ངོས་རང་རྒས་ཡོལ་ཆ་ཚང་ཞུས་རྒྱུ་ཙམ་མ་ཟད། ཏཱ་ལའི་བླ་མའི་བླ་བྲང་གིས་ཆབ་སྲིད་ཀྱི་འགན་དབང་བཞེས་རྒྱུའི་ལོ་ངོ་ ༤༠༠ ཙམ་ཡོད་པའི་སྲོལ་རྒྱུན་དེ་བཞིན་རྒྱལ་ཁའི་ངང་ནས་མཇུག་སྒྲིལ་བྱས་ཡོད། ཅེས་བཀའ་སློབ་སྩལ་ཡོད་པ་དང།
དེ་བཞིན་༸གོང་ས་མཆོག་གིས་ཆོས་ལུགས་མཐུན་སྒྲིལ་དང་འགྲོ་བ་མིའི་ལྷན་སྐྱེས་སུ་ཡོད་པའི་བཟང་པོའི་ཡོན་ཏན་གོང་མཐོར་གཏོང་རྒྱུ་བཅས་མགོན་པོ་གང་ཉིད་མཆོག་གིས་སྐུ་ཚེ་ཧྲིལ་པོའི་མཛད་ཁུར་གཙོ་བོ་གཉིས་པོའི་ཐོག་བཀའ་སློབ་སྩལ་བ་དང་འབྲེལ་གྲོས་ཚོགས་འཐུས་མི་རྣམས་ལ་མི་ཚེ་དོན་དང་ལྡན་པ་ཞིག་ཡོང་རྒྱུར་གཙོ་བོ་ནང་སེམས་འདུལ་ཐབས་བྱེད་དགོས་པ་ལས། དངུལ་དང་སྟོབས་ཤུགས་ཁོ་ནས་མི་ཚེ་དོན་དང་ལྡན་པ་ཞིག་ཡོང་ཐབས་མེད་སྐོར་སོགས་བཀའ་སློབ་སྩལ་ཡོད།
གཞན་ཡང་༸གོང་ས་མཆོག་གིས་ཝིསི་ཀོན་སིན་མངའ་སྡེའི་སྲིད་སྐྱོང་སི་ཀོ་ཊི་ཝལ་ཀར་མཆོག་དང་ལྷན་མཇལ་འཕྲད་མཛད་ཡོད། རྩ་བའི་༸གོང་ས་མཆོག་འདི་ཟླའི་ཕྱི་ཚེས་ ༨ ནས་བཟུང་བྱང་ཨ་རིའི་ནང་གི་མཛད་འཆར་དབུ་འཛུགས་ཀྱིས་ཐོག་མར་མེ་རི་ལེན་ཌི་ཁུལ་དུ་ཉིན་གྲངས་གཅིག་དང། དེ་རྗེས་ཨོ་རི་གྷན་ནང་ཉིན་གྲངས་བཞི་རིང་མཛད་འཕྲིན་བསྐྱངས་ཡོད་པ་མ་ཟད། ཝིསི་ཀོན་སིན་ཁུལ་དུ་ཆིབས་སྒྱུར་མ་བསྐྱངས་གོང་མེ་ནི་སོ་ཊ་ཁུལ་རོ་ཆེཅེ་སི་ཊར་གྲོང་ཁྱེར་ནང་རྟེན་གཞི་བྱས་པའི་མ་རི་ཡོ་སྨན་ཁང་དུ་ལོ་ལྟར་སྐུའི་འཕྲོད་བཞེས་ལ་བརྟག་དཔྱད་མཛད་བཞིན་ཡོད་ལ་ལྟར། ད་ཐེངས་ཡང་སྨན་ཁང་དེར་མགོན་པོ་གང་ཉིད་མཆོག་སྐུ་གཟུགས་བརྟག་དཔྱད་མཛད་གྲུབ་རྗེས་སྨན་པ་རྣམས་ཀྱིས་༸གོང་ས་མཆོག་གི་སྐུ་ཁམས་སྔ་ལོ་ལས་ལྷག་པ་ཡོད་སྐོར་གསུངས་ཡོད།
༸གོང་ས་མཆོག་གིས་ཕྱི་ཚེས་ ༡༤ ཉིན་གཡི་སྔ་དྲོ་རི་དྭགས་ནགས་ཀྱི་སྐྱེད་མོ་ཚལ་ཞེས་པའི་ནང་པའི་བསྟི་གནས་ཁང་ (Deer Park Buddhist Center) ནས་ཇི་ལྟར་སྔོན་ནས་གསོལ་འདེབས་ཞུས་དོན་བཞིན་བཀའ་བཞེས་སྨིན་སྩལ་གྱིས་ཁུལ་དེར་མང་ཚོགས་ ༣༥༠༠ ལྷག་ལ་རྗེ་གཙོང་ཁ་པ་ཆེན་པོས་མཛད་པའི་རྟེན་འབྲེལ་བསྟོད་པའི་ཆོས་འབྲེལ་མཛད་སྐབས་སྨན་ཁང་དེའི་སྨན་པ་ཚོས་གསུངས་པའི་བཀའ་མོལ་དེ་མང་ཚོགས་ལ་ཡོངས་གྲགས་མཛད་པ་དང་སྦྲགས། ཆོས་ལུགས་ཕན་ཚུན་དབར་མཐུན་འབྲེལ་དང་ཆོས་ཁས་ལེན་མིན་ལ་མ་ལྟོས་པར་ཕན་ཚུན་གུས་བཀུར་དང་སྦྱང་བཤད་གནང་རྒྱུ་གལ་ཆེན་པོ་ཡིན་སྐོར་བཀའ་སློབ་བཀའ་དྲིན་སྩལ་ཡོད་པ་བཅས།།
