༢༠༡༣ ཟླ་ ༥ ཚེས་ ༡༤ རེས་གཟའ་མིག་དམར།
༄༅། །ཕྱི་ལོ་ ༢༠༡༣ ཟླ་ ༥ ཚེས་ ༡༡ ཉིན་གྱི་ཕྱེད་ཡོལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རའི་ནུབ་བྱང་པོ་ཌི་ལེན་ཌི་གྲོང་ཁྱེར་ནང་མང་ཚོགས་ ༡༠༠༠༠ བརྒལ་བར་གོ་ལའི་ཁོར་ཡུག་བདག་གཅེས་བྱེད་རྒྱུར་ཀུན་སློང་འཁྱེར་སྟངས་དང་སྙིང་རྗེ་དང་འབྲེལ་བའི་སྐོར་བཀའ་སློབ་སྩལ་ཡོད། སྐབས་དེར་མགོན་པོ་གང་ཉིད་མཆོག་གིས་སྙིང་རྗེ་ཞེས་པ་དེ་ཆོས་ཁས་ལེན་མཁན་ཁོ་ནས་ཉམས་ལེན་བྱེད་རྒྱུ་ཞིག་མ་རེད་ཅེས་བཀའ་སློབ་སྩལ་དོན། འཛམ་གླིང་འདིའི་སྟེང་མི་ཐེར་འབུམ་བདུན་ལྷག་ཙམ་ཡོད་པ་ནས་མི་ཐེར་འབུམ་གཅིག་ལྷག་དེ་ཆོས་ཁས་མ་ལེན་མཁན་རེད།
འོན་ཀྱང་ཁོང་ཚོའང་འགྲོ་བ་མིའི་ཁྱིམ་ཚང་ཆེན་པོ་འདིའི་ཆ་ཤས་རེད། སྤྱི་ཚོགས་ནང་སོ་སོའི་མི་ཚེ་འདི་ཡ་རབས་ཚུལ་མཐུན་དང་བདེ་སྐྱིད་ལྡན་པ་སྐྱེལ་ཐུབ་རྒྱུར་སྙིང་རྗེའི་ཉམས་ལེན་དགོས་ཀྱི་རེད། གང་ལྟར་སྙིང་རྗེ་འདི་རང་དང་སྒེར་གཉིས་ཀའི་མི་ཚེའི་ནང་འབྲེལ་བ་ཆེན་པོ་ཆགས་ཡོད། དེར་བརྟེན་བྱམས་པ་དང། སྙིང་རྗེ། བཟོད་སྲན་གྱི་ཉམས་ལེན་དེ་དག་ཆོས་ལུགས་ཀྱི་གནད་དོན་གཅིག་ལ་ངོས་བཟུང་རྒྱུ་མེད། ཆོས་ཁས་མི་ལེན་མཁན་དང་ཆོས་ལ་དོ་སྣང་མེད་མཁན་ཚོས་སྙིང་རྗེ་དང་བཟོད་སྲན་ཞེས་པ་དེ་ཆོས་ཀྱི་སྐད་ཆ་རེད་ཅེས་བཞག་ན་དེ་
ནོར་འཁྲུལ་རེད། སྙིང་རྗེ་ཞེས་པ་དེ་རང་དང་གཞན་གཉིས་ཀྱི་བདེ་སྐྱིད་ཀྱི་རྨང་གཞི་དེ་རེད། བྱམས་པ་དང་སྙིང་རྗེ་ངོ་མ་སོ་སོའི་བརྒྱུད་ལ་སྐྱེས་རྒྱུར་འབད་བརྩོན་བྱེད་དགོས། སྤྱིར་བྱམས་པ་དང་སྙིང་རྗེ་ཞེས་པ་ནི་འགྲོ་བ་སེམས་ཅན་ཐམས་ཅད་ཀྱི་བརྒྱུད་ལ་ཡོད་པ་དེའི་འགྲིག་གི་མེད། བདེ་སྐྱིད་ངོ་མ་ཞིག་སྒྲུབ་དགོས་ན་ཕྱོགས་རིས་སཔང་པའི་ཕྱོགས་ལྷུང་མེད་པའི་བྱམས་པ་དང་སྙིང་རྗེ་དེ་དགོས་ཀྱི་རེད། རང་བཞིན་ལྷན་སྐྱེས་སུ་ཡོད་པའི་ཕྱོགས་སུ་ལྷུང་པའི་སྙིང་རྗེ་དེ་རྨང་གཞིར་བཞག་ནས་རྒྱུ་མཚན་ལ་བསམ་བློ་བཏང་སྟེ་དེ་ལྟ་བུའི་སྙིང་རྗེ་དེ་ཚད་གཞིའམ་མཐའ་མེད་པ་ཞིག་བཟོ་ཐུབ་ཀྱི་རེད། རྒྱུ་མཚན་དཔྱད་པ་བྱས་ཏེ་རྨང་གཞི་སྙིང་རྗེ་དེ་གོང་སྤེལ་གཏོང་རྒྱུ་ལྟ་བུ་འགྲོ་བ་མིའི་རིགས་ཀྱི་མ་གཏོགས་དུད་འགྲོའི་བྱེད་ཐུབ་ཀྱི་མེད། ཕྱོགས་སུ་ལྷུང་བའི་བྱམས་པ་དང་སྙིང་རྗེ་དེ་རང་ཉིད་ཀྱི་དགའ་ཕྱོགས་ལ་མ་གཏོགས་དགྲ་བོའི་ཕྱོགས་ལ་ཕྱོགས་སུ་ལྷུང་བའི་སྙིང་རྗེ་དེ་ཉམས་ལེན་ཡོང་གི་མེད། ཅེས་དང།
དེ་བཞིན་༸གོང་ས་མཆོག་གིས་བཀའ་སློབ་སྩལ་དོན། མི་ཚེ་སྐྱེལ་སྟངས་ཐོག་འདོད་ཡོན་ལོངས་སྤྱོད་དང་དབང་ཆ་གཅིག་པུའི་ཐོག་དོན་གཉེར་བྱས་ནས་བསྡད་ན་ཡོང་གི་མ་རེད། ནང་སེམས་ཀྱི་རིན་ཐང་གསོ་སྐྱོང་བྱེད་རྒྱུའི་ཐོག་དོ་སྣང་རྩ་བ་ནས་མ་བྱས་པར་བཞག་ན་བདེ་སྐྱི༝ད་ངོ་མ་རྩ་བ་ནས་རག་གི་མ་རེད། སྙིང་རྗེ་གོང་སྤེལ་གཏོང་རྒྱུར་ཆོས་ལུགས་ལ་བརྟེན་ནས་ཡོང་དགོས་ཀྱི་མེད་པ་དེ་དེང་སང་ཚན་རིག་པ་ཚོས་བརྟག་དཔྱད་བྱས་ཏེ་སྙིང་རྗེ་སྒོམ་སྟངས་བསླབ་ཏེ་ཁོང་ཚོའི་སེམས་བརྒྱུད་ལ་འགྱུར་བ་ག་ཚོད་འགྲོ་གི་ཡོད་མེད། གང་ལྟར་འགྱུར་བ་ཡག་པོ་ཡོང་གི་ཡོད་པ་གང་འཚམ་གསལ་པོ་ཆགས་ཀྱི་ཡོད། མི་སུ་དང་སུ་ཞིག་ཡིན་རུང་སོ་སོའི་དོན་དག་ཁོ་ན་བསམ་བློ་མ་བ
ཏང་བར་མི་གཞན་གྱི་དོན་དུ་བསམ་བློ་བཏང་ན། རང་དོན་ཞོར་དུ་གྲུབ་ཐུབ་ཀྱི་ཡོད། གང་ལྟར་སྤྱང་པོ་བྱས་ན་སྤྱང་པོ་ངོ་མ་དེ་བྱེད་དགོས། རང་དོན་སྒྲུབ་རྒྱུ་ཡིན་ན་རྒྱུ་མཚན་བསམ་བློ་བཏང་སྟེ་རང་དོན་ཞོར་དུ་སྤྱང་པོ་བྱས་ཏེ་སྒྲུབ་ཐུབ་ཀྱི་རེད། ཅེས་སོགས་ཀྱི་བཀའ་སློབ་སྩལ་གྲུབ་བསྟུན། ༸གོང་ས་མཆོག་གི་ཆིབས་སྒྱུར་གོ་སྒྲིག་གནང་མཁན་སེ་ར་བྱེས་ཡང་སྲིད་རིན་པོ་ཆེ་མཆོག་གིས་དབུས་མེ་ཏྲི་པ་ནང་པའི་མཐོ་སློབ་ཁང་གིས་སྔོན་ཚུད་ནས་མི་རེ་རེར་ཁ་ཏག་གནང་སྟེ་ཚོགས་ཁང་ནང་མི་ཆིག་ཁྲི་ལྷག་ཡོད་པ་རྣམས་ཀྱིས་༸གོང་ས་མཆོག་ལ་ཐུགས་རྗེ་བཀྲིན་ཆེ་ཞུས་ཡོད། དེ་ནས་ཡང་སྲིད་རིན་པོ་ཆེ་མཆོག་གིས་གུས་པ་ཆེན་པོའི་ཐོག་༸གོང་ས་མཆོག་ལ་ཐུགས་རྗེ་ཆེ་ཞུས་པ་དང་ལྷན། མགོན་པོ་གང་ཉིད་མཆོག་སྐུ་ཚེ་ཡུན་རིང་བརྟན་པ་དང་བོད་ལ་མགྱོགས་མྱུར་ཆིབས་སྒྱུར་བསྐྱངས་ཏེ་བོད་པའི་མི་རྣམས་ལ་སླར་ཡང་༸གོང་ས་མཆོག་གིས་ཞལ་མཇལ་གསུང་ཐོས་ཡོང་རྒྱུའི་སྨོན་འདུན་ཡང་ཞུས་ཡོད་པ་བཅས།།
