༢༠༡༣ ཟླ་ ༥ ཚེས་ ༧ རེས་གཟའ་མིག་དམར།
༄༅། །བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ཕྱི་ལོ་ ༢༠༡༣ ཟླ་ ༥ ཚེས་ ༦ ཉིན་ཨ་རིའི་རྒྱལ་སའི་ (Reagan) རེ་གན་གནམ་ཐང་དུ་ཕེབས་འབྱོར་གནང་སྐབས། ས་གནས་བོད་རིགས་སྤྱི་མཐུན་ཚོགས་པའི་ཚོགས་གཙོ་ཀརྨ་ཟུར་ཁང་ལགས་ཀྱིས་གཙོས་ཚོགས་མི་རྣམ་པས་ཕེབས་བསུ་གཟབ་རྒྱས་ཞུས་ཡོད།
དེ་ཡང་སྲིད་སྐྱོང་མཆོག་གིས་ཨ་རིའི་ནང་གནང་རྒྱུའི་ལས་དོན་གཙོ་བོ་ནི། ཨ་རིའི་གྲོས་ཚོགས་གོང་འོག་གཉིས་ཀྱི་མི་སྣ་མཇལ་འཕྲད་ཀྱིས་གསུང་མོལ་དང་། ཕྱི་ཚེས་ ༨ ཉིན་གྱི་དགོང་དྲོ་རྒྱལ་ས་ཝ་ཤིང་ཊོན་ནང་རྟེན་གཞི་བྱས་པའི་ཨ་རིའི་ཕྱི་འབྲེལ་གནད་དོན་ཐོག་ཞིབ་འཇུག་ཁང་ནས་སྐུ་མགྲོན་དུ་གདན་ཞུ་གནང་བ་ལྟར་ཆེད་ཕེབས་ཀྱིས་གསུང་བཤད་གནང་རྒྱུ་དང་། དེ་ནས་སི་སེ་པན་བརྙན་འཕྲིན་ལས་ཁང་དུ་ཆེད་ཕེབས་གནང་རྒྱུ་ཡིན་འདུག
ལྷག་པར་སྲིད་སྐྱོང་མཆོག་གིས་ཨ་རིའི་རྒྱལ་ས་ཝ་ཤིང་ཊོན་ནང་ཕྱི་ཚེས་ ༦ ནས་ ༡༠ བར་བཞུགས་རིང་འགྲོ་བ་མིའི་ཐོབ་ཐང་ཚོགས་པ་ཁག་དང་མཇལ་འཕྲད། དེ་བཞིན་སྐུ་ཚབ་དོན་ཁང་ཝ་ཤིང་ཊོན་དུ་སྤོ་ཞུགས་བྱ་རྒྱུའི་ལས་རིམ་འགྲོ་བཞིན་པར་གཟིགས་ཞིབ་གྲུབ་མཚམས་ཕྱི་ཚེས་ ༡༠ ཉིན་ཡུ་རོབ་ཀྱི་ལས་དོན་ཆེད་ཝ་ཤིང་ཊོན་ནས་ཕེབས་ཐོན་གནང་རྒྱུ་ཡིན་འདུག་པ་བཅས། །
