༢༠༡༣ ཟླ་ ༥ ཚེས་ ༣ རེས་གཟའ་པ་སངས།
༄༅། །ཕྱི་ལོ་ ༢༠༡༣ ཟླ་ ༥ ཚེས་ ༢ ནས་ ༣ བར་ཉིན་གྲངས་གཉིས་རིང་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་རྒྱ་གར་རྒྱལ་སྤྱིའི་བསྟི་གནས་ཀྱི་ཚོགས་ཁང་ནང་བོད་མིའི་ཚོང་ལས་སྡེ་ཚོགས་ཐེངས་བདུན་པའི་ལོ་འཁོར་ཚོགས་འདུ་དབུ་འཛུགས་གནང་ཡོད།
དེ་ཡང་ཐོག་མར་བོད་མིའི་ཚོང་ལས་སྡེ་ཚོགས་ཀྱི་ཕྱི་ལོ་ ༢༠༡༢ ནས་ ༢༠༡༣ ཀྱི་ལས་བསྡོམས་སྙིང་བསྡུས་ཤིག་སྒྲོགས་སྦྱང་གནང་གྲུབ་མཚམས་ཚོགས་འདུ་དབུ་འཛུགས་ཐོག་བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་ཚེ་རིང་དོན་གྲུབ་མཆོག་གིས་བོད་མིའི་ཚོང་ལས་སྡེ་ཚོགས་ཀྱི་བྱུང་རིམ་ངོ་སྤྲོད་སྙིང་བསྡུས་དང་འབྲེལ་གསུང་བཤད་གནང་དོན། དེ་རིང་འདི་གར་ཕེབས་པའི་རྣམ་པ་ལྷན་རྒྱས་ལ་ངས་ཐོག་མར་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། སྤྱིར་བཏང་བཙན་བྱོལ་བོད་མིའི་སྒྲིག་འཛུགས་ཀྱི་དཔལ་འབྱོར་གནས་སྟངས་ཡག་པོ་ཡོད་པ་ཁོ་ནས་ཕན་ཐོགས་མེད། དེ་ལས་གལ་ཆེ་བ་ཞིག་ལ་སྒྲིག་འཛུགས་འདི་འཚོ་རྒྱུའི་སྤྱི་ཚོགས་འདིའི་མི་དམངས་ཀྱི་དཔལ་འབྱོར་གནས་སྟངས་ཡག་པོ་དགོས་རྒྱུ་ནི་ཧ་ཅང་གལ་ཆེན་པོ་རེད། དེ་བཞིན་སྤྱི་ཚོགས་ཚགས་ཚུད་པོ་ཡོང་བར་ཤེས་ཡོན་དང་དཔལ་འབྱོར་རྒྱབ་རྟེན་གལ་ཆེན་པོ་ཆགས་ཀྱི་ཡོད། ཕྱོགས་མཚུངས་བཟང་སྤྱོད་དང་ལྡན་པའི་ཐོག་ནས་ཚོང་ལས་གཉེར་རྒྱུ་ནི་ཧ་ཅང་གལ་ཆེན་པོ་རེད། དེར་བརྟེན་ཁྱེད་རྣམ་པས་ཚོང་ལས་གཉེར་སྐབས་མི་གཞན་ལ་བཟང་སྤྱོད་བརྗོད་པ་དང་དུས་མཚུངས་སོ་སོས་ལག་བསྟར་བྱེད་རྒྱུ་གཉིས་འགལ་ཟླ་ཕྱིན་ན་ཧ་ཅང་ཉེན་ཁ་ཆེན་པོ་རེད། ང་ཚོར་བཟང་སྤྱོད་ཀྱི་ལྟ་གྲུབ་ཡག་པོ་ཞིག་ཡོད་ཀྱང། ང་ཚོས་ལག་བསྟར་ཡག་པོ་མ་བྱས་པའི་རྐྱེན་གྱིས་མི་གཞན་ནས་ང་ཚོར་སྐྱོན་འཛུགས་བྱེད་གཞི་ཆགས་ན་ཡག་པོ་མེད། ཅེས་སོགས་ཀྱི་གསུང་བཤད་གནང་ཡོད།
ཐེངས་འདིའི་ཚོགས་འདུར་དཔལ་འབྱོར་བཀའ་བློན་མཆོག་གིས་དབུས་བོད་མིིའི་ཚོང་ལས་སྡེ་ཚོགས་ཀྱི་ཚོགས་གཙོ་སྐལ་བཟང་ནོར་བུ་ལགས་དང་། ལྡི་ལི་ས་གནས་འགོ་འཛིན། ཚོགས་པ་སྐྱིད་སྡུག་ཁག་གི་སྐུ་ཚབ། དེ་བཞིན་ཚོང་ལས་སྡེ་ཚོགས་ཀྱི་ཚོགས་མི་རྣམ་པ་བཅས་ཚོགས་བཅར་བ་ཁྱོོན་མི་གྲངས་སུམ་ཅུ་ལྷག་མཉམ་ཞུགས་གནང་འདུག །
