༢༠༡༣ ཟླ་ ༥ ཚེས་ ༡ རེས་གཟའ་ལྷག་པ།
༄༅། །ཕན་རན་སིའི་གྲོས་ཚོགས་གོང་མའི་འཐུས་མི་ཁག་གཅིག་རིང་མིན་བཙན་བྱོལ་བོད་མིིའི་བསྟི་གནས་བཞུགས་སྒར་ཁུལ་དུ་ཕེབས་འཆར་ཡོད་འདུག
གནས་ཚུལ་དེའི་སྐོར་ཕྱི་ལོ་ ༢༠༡༣ ཟླ་ ༤ ཚེས་ ༣༠ ཉིན་ཕ་རན་སིའི་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་ཀྱིས་བརྒྱུད་ལམ་ཁག་གཅིག་ནང་གསུང་གསལ། སྤྱིར་བཏང་ཕན་རན་སིའི་ཁུལ་དུ་བོད་དོན་ལ་ཁ་ཞེ་གཉིས་མེད་ཐོག་རྒྱབ་སྐྱོར་གནང་མཁན་གྱི་གྲོས་ཚོགས་འཐུས་མི་ཧ་ཅང་མང་དག་ཅིག་ཡོད། དེར་བརྟེན་འདི་ལོ་གྲོས་ཚོགས་གོང་འོག་གཉིས་ཀའི་འཐུས་མི་བཞུགས་སྒར་ཁུལ་དུ་ཕེབས་གཏན་འཁེལ་ཡོད་ཀྱང་།
ད་རེས་གྲོས་ཚོགས་གོང་མའི་འཐུས་མི་ལྔ་བཞུགས་སྒར་ཁུལདུ་འཚམས་གཟིགས་ལ་ཕེབས་གཏན་འཁེལ་ཡོད། ང་ཚོས་དུས་རྟག་ཏུ་བོད་ཀྱི་ཆོས་དང་རིག་གཞུང་བོད་མི་རིགས་ཀྱི་སྲོག་རྩ་ཡིན་སྐོར་ཕན་རན་སིའི་གྲོས་ཚོགས་གོང་འོག་གཉིས་ཀྱི་འཐུས་མིར་ཡིག་ངག་གཉིས་ནས་གསལ་བཤད་ཞུས་དང་ཞུ་མུས་ཡིན་པར་བརྟེན། གཞིས་ལུས་བོད་མི་སྤྱི་དང་ཡང་སྒོས་བཙན་བྱོལ་བོད་མིའི་གནས་སྟངས་གང་ཙམ་ཤེས་རྟོགས་ཡོད་ངེས་རེད། འོན་ཀྱང་ས་གནས་ས་ཐོག་ཏུ་ཕེབས་ནས་ཞིབ་གཟིགས་གནང་རྒྱུ་ཧ་ཅང་གལ་ཆེན་པོ་ཆགས་ཀྱི་ཡོད། ཕྱོགས་མཚུངས་ཕན་རན་སིའི་གྲོས་ཚོགས་གོང་འོག་གཉིས་ཀྱི་འཐུས་མི་མང་དག་ཅིག་འདི་ལོ་གསར་དུ་འོས་འདེམས་བྱུང་ཡོད། གསར་དུ་འོས་འདེམས་བྱུང་བའི་གྲོས་ཚོགས་འཐུས་མིའི་ནང་དེ་སྔ་ནས་བོད་དོན་ལ་རྒྱབ་སྐྱོར་གནང་མཁན་ཡང་ཡོད། ད་ཐེངས་སྔོན་ལ་གྲོས་ཚོགས་གོང་མའི་འཐུས་མི་ཁག་གཅིག་བཞུགས་སྒར་དུ་འཚམས་གཟིགས་རྗེས་ད་ལྟའི་ཆར་རིམ་བཞིན་གྲོས་ཚོགས་འོག་མའི་འཐུས་མི་རྣམས་ཀྱང་བཞུགས་སྒར་དུ་འཚམས་གཟིགས་ལ་ཕེབས་འཆར་ཡོད་པ་རེད། ཅེས་འགྲེལ་བརྗོད་གནང་འདུག་པ་བཅས། །
