༢༠༡༣ ཟླ་ ༥ ཚེས་ ༧ རེས་གཟའ་མིག་དམར།
༄༅། །ཕྱི་ལོ་ ༢༠༡༣ ཟླ་ ༥ ཚེས་ ༤ ཉིན་རྒྱ་རིགས་རྩོམ་པ་པོ་ལིའུ་ཡི་ཝུ་ལགས་ཇར་མན་གྱི་རྒྱལ་ས་སྦར་ལེན་ནང་ཇར་མན་བོད་དོན་རྒྱབ་སྐྱོར་ཚོགས་པའི་འགན་འཛིན་ལྷན་ཚོགས་ཐོག་མགྲོན་འབོད་ལྟར་ཆེད་ཕེབས་གནང་ཡོད།
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཁོང་གིས་དེ་འདུར་ཚོགས་མི་བརྒྱད་ཅུ་བརྒལ་བར་ད་ལྟའི་བོད་ནང་གི་གནས་སྟངས་སྐོར་ལ་གསུང་བཤད་གནང་དོན། འཛམ་གླིང་འདིའི་ནང་རང་དབང་སོགས་ཀྱི་ཆེད་རང་ལུས་མེར་སྲེག་གཏོང་མཁན་བོད་མི་ལྟར་བྱུང་མྱོང་མེད། དེ་ནི་ཧ་ཅང་ཡ་ང་བའི་གནས་ཚུལ་སྐྱོ་པོ་ཞིག་ཆགས་ཡོད། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ཕྱི་ལོ་ ༡༩༥༩ ལོར་བཙན་བྱོལ་དུ་ཆིབས་སྒྱུར་བསྐྱངས་པ་ནས་བཟུང་དུས་ད་ལྟར་བར་བོད་ལ་ཕྱིར་ཆིབས་སྒྱུར་བསྐྱངས་ཐུབ་མེད། རྒྱལ་བ་ཀརྨ་པ་རིན་པོ་ཆེ་མཆོག་ཀྱང་ཕྱི་ལོ་ ༡༩༩༩ ལོར་བཙན་བྱོལ་དུ་ཕེབས་དགོས་ཐུག་ཡོད། དེ་བཞིན་པཎ་ཆེན་སྐུ་ཕྲེང་བཅུ་གཅིག་པ་མཆོག་རྒྱ་ནག་གཞུང་གིས་བཙན་སྦས་བྱས་ཏེ་གནས་ཡོད།
ཕྱི་ལོ་ ༡༩༨༩ ལོར་པེ་ཅིང་དུ་རྒྱ་རིགས་སུམ་སྟོང་བརྒལ་བ་དམར་གསོད་གཏོང་སྐབས། འཛམ་གླིང་ནང་ཆབ་སྲིད་ཀྱི་འགྱུར་ལྡོག་ཆེན་པོ་འགྲོ་བ་དང་དུས་མཚུངས་ཡོད། སྦར་ལེན་གྱི་བརྩིགས་པ་བཤིགས་ནས་ཇར་མན་ཤར་ནུབ་གཉིས་ཟླ་སྒྲིལ་བྱུང་ཡོད། པེ་ཅིང་དུ་དམར་གསོད་བཏང་བའི་ལོ་དེར་རྒྱལ་ས་ལྷ་སར་ཞི་རྒོལ་གནང་མཁན་གྲྭ་བཙུན་མང་དག་ཅིག་དམར་གསོད་བཏང་ཡོད། ལྷག་པར་ཕྱི་ལོ་ ༢༠༠༩ དུས་ད་ལྟ་བར་བོད་ཆོལ་ཁ་གསུམ་དང་རྒྱ་ནག་རྒྱལ་ས་པེ་ཅིང་བཅས་སུ་བོད་མི་བརྒྱ་ཕྲག་བརྒལ་བས་བོད་ནང་རང་དབང་དང་། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་བོད་ལ་ཕེབས་འཇུག་དགོས་པ་སོགས་ཀྱི་དགོས་འདུན་གྱི་འབོད་སྒྲ་བསྒྲགས་དང་སྒྲོག་བཞིན་ཡོད། དེར་བརྟེན་ངས་པེ་ཅིང་དུ་གནས་སྡོད་བྱེད་བཞིན་པའི་རྒྱ་ནག་གཞུང་གི་འགོ་ཁྲིད་ཚོར་བརྗོད་རྒྱུར། ས་གནས་ཀྱི་འགོ་ཁྲིད་ཚོས་ནང་ཁུལ་ལ་ཞི་བདེ་དང་འཕེལ་རྒྱས་མེད་བཞིན་དུ་རྫུན་གཏམ་ཤོད་མཚམས་འཇོག་དགོས། བོད་ཀྱི་ས་ཁུལ་ཁག་གི་མི་དམངས་དཀྱུས་མའི་དཀའ་སྡུག་རྣམས་སེལ་དགོས། བོད་མིའི་རང་ལུས་མེར་སྲེག་གི་འགན་འཁྲི་ངེས་པར་འཁྱེར་དགོས། ཞེས་སོགས་ཀྱི་གསུང་བཤད་གནང་འདུག་པ་བཅས། །
