༢༠༡༣ ཟླ་ ༥ ཚེས་ ༢༨ རེས་གཟའ་མིག་དམར།
༄༅། །ཕྱི་ལོ་ ༢༠༡༣ ཟླ་ ༥ ཚེས་ ༢༧ ཉིན་རྡོར་གླིང་ས་གནས་འགོ་འཛིན་ལས་ཁུངས་ཀྱིས་གོ་སྒྲིག་འོག རྡོར་གླིང་ཁུལ་གནས་སྡོད་བོད་རིགས་རྣམས་ལ་བཀའ་ཟུར་རྐིརྟི་རིན་པོ་ཆེ་བློ་བཟང་བསྟན་འཛིན་འཇིགས་མེད་ཡེ་ཤེས་རྒྱ་མཚོ་མཆོག་གིས་རྡོར་གླིང་གཏན་སློབ་ཏུ་གསུང་བཤད་གནང་ཡོད།
དེ་ཡང་རིན་པོ་ཆེ་མཆོག་སློབ་གྲྭར་ཕེབས་འབྱོར་སྐབས་སློབ་གྲྭའི་རེཀ་ཊར་གྱིས་གཙོས་ཚོགས་སྐྱིད་ཁག་གི་ཚོགས་གཙོ་དང་མི་མང་བཅས་ཀྱིས་ཕེབས་བསུ་གཟབ་རྒྱས་ཞུས་ཡོད། དེ་ནས་ཀིརྟི་རིན་པོ་ཆེ་མཆོག་གིས་ད་ལྟའི་བོད་ནང་གི་གནས་སྟངས་སྤྱི་དང་། ལྷག་པར་ད་ལྟའི་ཆར་བོད་ནང་རང་ལུས་མེར་སྲེག་གཏོང་མཁན་གྱི་གྲངས་ཚད་ཧ་ཅང་མཐོན་པོར་བསླེབས་ཡོད་པ་མ་ཟད། དེ་ཁོངས་ནས་མང་ཆེ་བ་རྔ་པ་ཀིརྟི་ཁུལ་ནས་བྱུང་ཡོད་སྐོར་དང། དེ་བཞིན་རིན་པོ་ཆེ་མཆོག་གིས་བོད་མི་མི་རེ་ངོ་རེ་ནས་བོད་དོན་ཐོག་འགན་འཁྱེར་དགོས་པ་དང་༸གོང་ས་མཆོག་གི་བཀའ་དགོངས་སྒྲུབ་དགོས་པ། སོ་སོའི་སྐད་ཡིག་བདག་གཅེས་བྱེད་རྒྱུ་
གལ་ཆེན་པོ་ཡིན་སྐོར་སོགས་གསུང་བཤད་གནང་བ་དང་ཆབས་ཅིག ཀ་རྡོར་སྒང་གསུམ་གྱི་ནང་ཚར་ལོངས་བྱུང་བའི་བོད་ཕྲུག་རྣམས་བོད་སྐད་རྒྱག་རྒྱུར་ཕྲན་བུ་དཀའ་ངལ་ཡོད་པར་བརྟེན། ཕ་མའི་ངོས་ནས་སོ་སོའི་ཁྱིམ་ནང་ཕྲུ་གུ་དང་མཉམ་བོད་སྐད་རྒྱག་རྒྱུ་ཧ་ཅང་གལ་ཆེན་པོ་སྐོར་ནན་པོ་གསུངས་ཡོད།
དེ་བཞིན་སྐབས་དེར་རྡོར་གླིང་ས་གནས་འགོ་འཛིན་བསོད་ནམས་བཟང་མོ་ལགས་ཀྱིས་རིན་པོ་ཆེ་མཆོག་མི་མང་ལ་ངོ་སྤྲོད་སྙིང་བསྡུས་དང་ས་གནས་ཀྱི་ལས་བསྡོམས་སྙིང་བསྡུས་ཤིག་སྒྲོགས་སྦྱང་གནང་ཡོད། ཐེངས་འདིའི་ཀིརྟི་རིན་པོ་ཆེ་མཆོག་གི་གསུང་བཤད་ཀྱི་ལས་རིམ་དེ་བཞིན་རྡོར་གླིང་ཁུལ་དུ་གནས་སྡོད་བོད་རིགས་མང་ཚོགས་རྣམས་ལ་ད་ལྟའི་བོད་ནང་གི་གནས་སྟངས་སྐོར་སྤེལ་སླད་གོ་སྒྲིག་ཞུས་པ་ཞིག་ཡིན་འདུག་པ་བཅས།།
