༢༠༡༣ ཟླ་ ༥ ཚེས་ ༢༠ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ཟླ་ ༥ ཚེས་ ༡༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མེ་ཌི་སན་ཁུལ་གྱི་མཛད་འཆར་ཉིན་མཐའ་མར་ཁུལ་དེའི་ནང་རྟེན་གཞི་བྱས་པའི་རི་དྭགས་ནགས་ཀྱི་སྐྱེད་མོ་ཚལ་ཞེས་པ་ནང་པའི་བསྟི་གནས་ཁང་ (Deer Park Buddhist Center) ནང་བོད་པའི་སློབ་ཕྲུག་ ༢༠༠ ཙམ་དང་གཞན་ཡང་རྒྱ་རིགས་གཞོན་སྐྱེས་ཁག་གཅིག་ལ་ཟུར་དུ་དམིགས་བསལ་མཇལ་ཁ་དང་བཀའ་སློབ་སྩལ་ཡོད།
དེ་ཡང་རྒྱ་རིགས་ཚོར་སྩལ་བའི་བཀའ་སློབ་ཀྱི་ལས་རིམ་དེའི་ཐོག་གཙོ་བོ་མེ་ཌི་སན་དང་ཆི་ཁ་གོ་བཅས་ནས་རྒྱ་རིགས་སློབ་ཕྲུག་དང་སློབ་དཔོན་ཆེན་མོ། དེ་བཞིན་ཤེས་ཡོན་ཅན་བཅས་ཁྱོན་མི་གྲངས་ ༨༠ བརྒལ་བ་ཆེད་བཅར་ཞུས་ཡོད་འདུག སྐབས་དེར་༸གོང་ས་མཆོག་གིས་རྒྱ་རིགས་རྣམས་ལ་གཙོ་བོ་བོད་ནང་དེང་སྐབས་དཀའ་ངལ་འཕྲད་དགོས་དོན་དང། ལྷག་པར་དཔལ་ན་ལེནྡྲ་ཀྱི་ཆོས་བརྒྱུད་ནས་མཆད་པའི་བོད་ཀྱི་ཐུན་མིན་ཆོས་དང་རིག་གཞུང་དེ་བོད་རིགས་ཙམ་མ་ཟད། ད་ལྟའི་དུས་ཚོད་འདིར་འཛམ་གླིང་ལ་ཕན་ཐོགས་ཡོད་པའི་རིག་གཞུང་ཞིག་ཡིན་པ། དེ་བཞིན་རིག་གཞུང་འདི་སྲུང་སྐྱོབ་བྱེད་དགོས་རྒྱུ་དེ་བོད་མི་རིགས་ཀྱི་དམིགས་བསལ་ལས་འགན་ཆགས་ཡོད་སྟབས། ང་ཚོས་ལོ་རྒྱུས་ཐོག་ཡོད་པའི་ཐོབ་ཐང་རང་བཙན་མ་རྩོད་པར་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ནང་ཡོད་པའི་བོད་མིར་མིང་དོན་མཚུངས་པའི་རང་སྲིད་རང་སྐྱོང་གི་ཐོབ་ཐང་་རྩོད་བཞིན་པའི་སྔ་རྗེས་ཀྱི་གནས་ཚུལ་ཞིབ་ཕྲ་ངོ་སྤྲོད་མཛད་ཡོད་པ་མ་ཟད། བོད་ཀྱི་ཁོར་ཡུག་གནས་སྟངས་དང་བོད་ཀྱི་ཁོར་ཡུག་ལ་གནོད་སྐྱོན་ཕོག་ཚེ་འདིས་བོད་ཙམ་མ་ཟད་ཁྱིམ་མཚེས་རྒྱལ་ཁབ་དང་འཛམ་གླིང་ཁྱོན་ཡོངས་ལ་དེའི་ཤུགས་རྐྱེན་ཇི་ལྟར་ཐེབས་མིན་སྐོར་བཀའ་སློབ་སྩལ་ཡོད།
དེ་བཞིན་གོང་ཚེས་ཉིན་གྱི་སྔ་དྲོ་བྱང་ཨ་རི་སྐུ་ཚབ་དོན་གཅོད་ཁང་གིས་གོ་སྒྲིག་ཐོག་མེ་ཌི་སན་གྲོང་ཁྱེར་ནང་རྟེན་གཞི་བྱས་པའི་དགེ་བཤེས་ལྷུན་གྲུབ་བཟོས་པ་ལགས་ཀྱི་ཆོས་ཚོགས་རི་དྭགས་ནགས་ཀྱི་སྐྱེད་མོ་ཚལ་ཞེས་པ་ནང་པའི་བསྟི་གནས་ཁང་ནང་ཨ་རི་ཝིསི་ཀོན་སིན་དང། མེ་ནི་སོ་ཊ། དེབཞིན་ཨི་ལི་ནོ་ཡི་བཅས་མངའ་སྡེ་གསུམ་ནས་འབྱོར་བའི་བོད་པའི་མཐོ་རིམ་སློབ་མ་ཁྱོན་ ༢༠༠ བརྒལ་བར་བོད་ཀྱི་གནད་དོན་ཐོག་བཀའ་སློབ་སྩལ་རྒྱུའི་ལས་རིམ་ཞིག་གོ་སྒྲིག་ཞུས་ཡོད་པ་ལྟར། ཉིན་འཁྱོངས་གཅིག་རིང་གི་ཚོགས་འདུ་དེའི་ཚོགས་མགོན་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་མཛད་དེ་སློབ་མ་རྣམས་ལ་བོད་ཀྱི་བླ་སྲོག་ཏུ་གྱུར་པའི་བོད་ཀྱི་སྐད་ཡིག་དང་དེའི་ནང་གསེས་སངས་རྒྱས་པའི་ཆོས་དང་ལྟ་གྲུབ། ཚན་རིག་བཅས་ལ་བདག་གཅེས་དང་དོ་སྣང་བྱ་རྒྱུ་ཧ་ཅང་གལ་ཆེན་པོ་ཡིན་པ་དང་འབྲེལ་བོད་མི་རིགས་ཀྱི་ངོ་མཚར་ཆེ་ཤོས་དེ་ནི་བོད་མི་རིགས་ཀྱི་སྐད་དང་ཆོས་དང་རིག་གཞུང་བཅས་ཡིན་སྐོར་བཀའ་སློབ་ནན་པོ་ཕེབས་ཡོད་པ་མ་ཟད། སློབ་མ་གཞོན་སྐྱེས་རྣམས་ལ་དམིགས་སུ་བཀར་ནས་བཙན་བྱོལ་ནང་ལས་འགུལ་རིགས་སྤེལ་སྐབས་ཡིད་གཟབ་བྱེད་དགོས་པ་དང་ལྷག་པར་ལས་འགུལ་སྤེལ་སྟངས་ལ་དབྱེ་བ་འབྱེད་དགོས་པའི་ལམ་སྟོན་བཀའ་སློབ་ཕེབས་དོན།
འདི་ཕྱོགས་སྐད་འབོད་རིགས་བྱེད་སྐབས་བོད་ལ་གང་ཡོང་གི་འདུག་ཅེ་ན། བོད་ནང་རྒྱ་མིའི་དམག་མི་དང་བདེ་སྲུང་ལས་ཀ་བྱེད་མཁན་མང་དུ་འགྲོ་གི་ཡོད་པ་དང་ཆབས་ཅིག བོད་མི་གར་སོན་ཆ་མེད་དུ་འགྱུར་རྒྱུ་དང་འཛིན་བཟུང་བྱེད་རྒྱུ་སོགས་མང་དུ་འགྲོ་གི་ཡོད་སྟབས་ཧ་ཅང་ཁག་པོ་ཡོད། ང་ཚོ་ཕྱི་ཕྱོགས་སུ་རང་དབང་ལུང་པར་བསྡད་ནས་སྐད་འབོད་སོགས་བརྒྱབ་བྱས་ན་ཞེ་སྣང་གང་ཡང་མེད་དེ། འོན་ཀྱང་རྒྱ་མིའི་དཔོན་རིགས་ཚོ་འཚིག་པ་ང་ཚོ་ཕྱི་ཕྱོགས་སུ་ཡོད་མཁན་ཚོར་བཟའ་སྡུག་པོ་བཏང་ས་དེ་བོད་ནང་གི་གཞིས་ལུས་རྒྱ་ཆེའི་མི་དམངས་ཚོར་སྡུག་པོ་གཏོང་གི་ཡོད། རང་ལུས་མེར་སྲེག་གཏོང་རྒྱུ་ལྟ་བུ་དེ་འུ་ཐུག་ཐབས་ཟད་ནས་རང་ལུས་མེར་སྲེག་བཏང་བ་ཞིག་རེད་མ་གཏོགས། ཁོང་ཚོ་སྨྱོན་པ་དང་ར་བཟི་ནི་མ་རེད། སངས་རྒྱས་ཀྱི་བསྟན་པའི་དོན་དུ་དེ་ལྟར་བྱས་པ་ཞིག་རེད། དེར་བརྟེན་ང་ཚོས་འདིར་གཟབ་གཟབ་བྱས་ཏེ་བསམ་བློ་བཏང་ན་མ་གཏོགས། ད་ང་ཚོར་རང་བཙན་དགོས་ཡོད་ཅེས་སེམས་འཚོར་དྲག་པོ་བྱས་ནས་ཕྱིན་ན་དེའི་དགེ་སྐྱོན་གང་ཡོད་མེད་བསམ་བློ་ཡག་པོ་ཞིག་གཏོང་དགོས།
རྒྱ་མི་མང་པོ་ཞིག་གིས་བརྗོད་བྱུང། ཅང་ཙེ་མིན་བསམ་བློ་གུ་ཡང་ཡོད། ང་ཚོ་བར་སྐབས་རྒྱ་ནག་གཞུང་དང་འབྲེལ་བ་ཆད་ཡོད་ཀྱང། ཅང་ཙེ་མིན་ཡར་བསླེབས་ནས་འབྲེལ་བ་སླར་ཡང་མཐུད་ཐུབ་པ་རེད། དེ་བཞིན་ཅང་ཙེ་མིན་སྐབས་འབྲེལ་བ་མཐུད་པ་གང་ཞིག་ལ་དེ་ཙམ་གྱི་གྲུབ་འབྲས་སོན་མེད་པ་དེ། ང་ཚོ་བོད་པས་རྒྱ་མིའི་དཔོན་རིགས་ཁག་ཕྱི་རྒྱལ་ལ་བསླེབས་སྐབས་ངོ་རྒོལ་བྱེད་མཁན་བྱུང་ཡོད། དེ་འདྲའི་ཐོག་ནས་ཁོང་ཚོ་ཁ་ཤས་རྒྱ་མིའི་ཐོག་འཚིག་པ་བཟའ་ཡི་འདུག ངོས་ཀྱིས་སྔོན་མ་ནས་འདི་ལྟར་ཤོད་ཀྱི་ཡོད། རྒྱ་མིའི་དཔོན་པོ་བསླེབས་སྐབས་ངོ་རྒོལ་བྱེད་སྟངས་དེ་དཔོན་པོ་དང་རྒྱལ་ཁབ་མི་འབོར་ཆེ་ཤོས་ཡིན་པའི་ཆ་ནས་དང་རྒྱལ་ཁབ་གཅིག་གི་གཙོ་འཛིན་ཡིན་པའི་ཆ་ནས་ང་ཚོས་དགའ་བསུ་ཞུས་ཀྱི་ཡོད བོད་ཐོག་འཛིན་པའི་གདུག་རྩུབ་དང་དྲག་གནོན། གདུང་འདེགས་ཚ་ནན་གྱི་སྲིད་བྱུས་དེར་ང་ཚོས་ངོ་རྒོལ་བྱེད་ཀྱི་ཡོད་ཅེས་ཡག་པོ་བྱས་ན་དེ་ཕྲན་བུ་གནད་འགག་འདུག གཞན་མི་སྒེར་པ་དེར་ངོ་རྒོལ་བྱེད་པ་ལྟ་བུ་ཆགས་དུས་རྒྱ་མིའི་དཔོན་པོ་མང་པོ་ཞིག་དེ་འདྲའི་ཐོག་ནས་ཁོང་ཁྲོ་བཟའ་ནས་ཕར་བསླེབས་པ་དང་གདུང་འདེགས་དང་དྲག་གནོན་བྱེད་རྒྱུ་སོགས་ཡོང་གི་མེད་དམ་སྙམ་གྱི་འདུག དེར་བརྟེན་དེ་ཚོའི་ཐོག་གཟབ་གཟབ་བྱེད་དགོས། ཞེས་དང།
ཕྱོགས་མཚུངས་༸གོང་ས་མཆོག་གིས་མགོན་པོ་གང་ཉིད་མཆོག་ནས་ད་བར་རྒྱ་ནག་གི་རྩ་ཁྲིམས་ཀྱི་སྒྲོམ་གཞིའི་འོག་བོད་ཆོལ་གསུམ་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་གི་ཐོབ་ཐང་རྩོད་བཞིན་པའི་རྒྱབ་ལྗོངས་དང་སྔ་རྗེས་བརྒྱུད་རིམ་བཅས་པ་ངོ་སྤྲོད་སྐོར་བཀའ་སློབ་སྩལ་ཡོད་པ་མ་ཟད། མགོན་པོ་གང་ཉིད་མཆོག་གིས་སློབ་མ་རྣམས་ནས་དབུ་མའི་ལམ་དང་ཁོར་ཡུག་སོགས་ཀྱི་གནད་དོན་དང་འབྲེལ་བའི་དྲི་བ་ཁག་ལ་བཀའ་ལན་སྩལ་ཡོད་པ་བཅས།།
