༢༠༡༣ ཟླ་ ༤ ཚེས་ ༡༩ རེས་གཟའ་པ་སངས།

༄༅། །ཕྱི་ལོ་ ༢༠༡༣ ཟླ་ ༤ ཚེས་ ༡༨ རེས་གཟའ་ཕུར་བུའི་ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ཕ་རན་སིའི་རྒྱལ་ཡོངས་གྲོས་ཚོགས་ (French National Assembly) སུ་ཕེབས་སྐབས་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཇེན་པེ་ཊིཀ་གྷིལ་ (Mr Jean-Patrick Gille) མཆོག་གིས་གཙོས་གྲོས་ཚོགས་བོད་དོན་རྒྱབ་སྐྱོར་བ་རྣམས་ཀྱིས་ཕེབས་བསུ་གཟབ་རྒྱས་ཞུས་ཡོད། སྐབས་དེར་སྲིད་སྐྱོང་མཆོག་གིས་ཕ་རན་སིའི་གྲོས་ཚོགས་འོག་མའི་འཐུས་མི་རྣམས་ཀྱིས་བོད་དོན་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་སྦྲགས། སྲིད་སྐྱོང་མཆོག་ལ་གྲོས་ཚོགས་འོག་མའི་ནང་ཆེ་མཐོང་ལྡན་པའི་ཐོག་ནས་ཕེབས་བསུ་གནང་བར་དམིགས་བསལ་བསྔགས་བརྗོད་དང་བཀའ་དྲིན་ཆེ་ཞུས་ཡོད།

ཕྱོགས་མཚུངས་སྲིད་སྐྱོང་མཆོག་གིས་དེང་སྐབས་བོད་ནང་དུ་བོད་མི་ཚོས་རང་ལུས་མེར་སྲེག་གི་ལས་འགུལ་སྤེལ་བཞིན་པའི་ཛ་དྲག་གནས་སྟངས་སྐོར་གསུང་བཤད་གནང་རྗེས། གྲོས་ཚོགས་འཐུས་མི་རྣམས་ཀྱིས་བོད་དོན་དང་འབྲེལ་བའི་དྲི་བ་ཁག་ལ་ལན་འདེབས་དང་གསལ་བཤད་ཞིབ་ཕྲ་གནང་ཡོད། སྲིད་སྐྱོང་མཆོག་གིས་དེ་སྔ་གྲོས་ཚོགས་གོང་མའི་ནང་བོད་མིའི་སྒྲིག་འཛུགས་ཀྱི་རང་ལུས་མེར་སྲེག་ཐོག་ལངས་ཕྱོགས་ཇི་འདྲ་འཛིན་བཞིན་ཡོད་པ་དང། བོད་ཀྱི་གནད་དོན་སེལ་ཆེད་འཚེ་མེད་ཞི་བར་གཞི་བཅོལ་བའི་དབུ་མའི་ལམ་གྱི་སྲིད་བྱུས་ཐོག་གྲོས་མོལ་གྱི་ལམ་ནས་བོད་རྒྱ་མི་རིགས་གཉིས་སྨན་གྱི་ཐབས་ལམ་འཚོལ་བཞིན་ཡོད་སྐོར་གསལ་བཤད་གནང་ཡོད། དེ་བཞིན་སྲིད་སྐྱོང་མཆོག་གིས་བོད་རྒྱ་གྲོས་མོལ་བསྐྱར་མཐུད་ཡོང་སླད་ཕ་རན་སིའི་གྲོས་ཚོགས་ཀྱི་ཚོགས་མི་རྣམས་ལ་རྒྱབ་སྐྱོར་གནང་རྒྱུའི་རེ་འདུན་ཤུགས་ཆེ་བཏོན་སྟེ། གལ་ཏེ་བོད་ལ་རང་དབང་སླར་གསོ་བྱུང་མཚམས་བོད་མིའི་སྒྲིག་འཛུགས་ཀྱིས་བོད་ནང་མུ་མཐུད་སྲིད་དབང་འཛིན་རྒྱུ་དེ་འདྲ་རྩ་བ་ནས་མིན་སྐོར་གསལ་བཤད་གནང་ཡོད། ལྷན་ཚོགས་གྲོལ་རྗེས་སྲིད་སྐྱོང་མཆོག་གིས་གྲོས་ཚོགས་ནང་ལས་དོན་འགྲོ་བཞིན་པ་དེར་གཟིགས་སྐོར་གནང། དེ་རྗེས་སྲིད་སྐྱོང་མཆོག་གིས་ས་གནས་བོད་མི་གྲངས་ ༣༠༠ ཙམ་ལ་ཐུག་འཕྲད་གནང་སྟེ་གསུང་བཤད་གནང་དོན། བོད་མི་རྣམས་རྡོག་རྩ་ཆིག་སྒྲིལ་ཐོག་ནས་རང་གི་ཕ་མེས་ཀྱི་ཐུན་མིན་ཆོས་དང་རིག་གཞུང་མི་ཉམས་རྒྱུན་འཛིན་དང་ཉམས་པ་སླར་གསོ་ཡོང་ཐབས་བྱེད་དགོས་པ་མ་ཟད། ལྷག་པར་བོད་མིའི་དྲང་བདེན་དང་ཡ་རབས་བཟང་སྤྱོད་ཀྱི་གཤིས་ཀར་འཛམ་གླིང་མི་མང་ཚོས་ཧ་ཅང་དགའ་མོས་བྱེད་བཞིན་ཡོད་པར་བརྟེན། རིན་ཐང་དེ་དག་ངེས་པར་དུ་བདག་གཅེས་བྱེད་དགོས་སྐོར་སོགས་ཀྱི་གསུང་བཤད་གནང་ཡོད། །