༢༠༡༣ ཟླ་ ༤ ཚེས་ ༡༢ རེས་གཟའ་པ་སངས།
༄༅། །བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། རྒྱ་གཞུང་གིས་ཁམས་སྐྱེ་རྒུ་མདོའི་བོད་མི་ཚོའི་ས་ཆ་བཙན་འཕྲོག་དང་སྡོད་ཁང་བཤིག་པ་སོགས་ཀྱི་དཀའ་ངལ་བར་མ་ཆད་པར་བཟོས་ཡོད་པ་མ་ཟད། རྒྱ་གཞུང་གིས་ཁམས་སྐྱེ་རྒུ་མདོའི་བོད་མིའི་ཁང་པ་མང་པོ་གཏོར་བཤིག་བཏང་རྐྱེན་ཕྱི་ལོ་ ༢༠༡༣ ཟླ་ ༤ ཚེས་ ༩ ཉིན་ས་གནས་བོད་མི་བརྒྱ་ལྷག་ཙམ་གྱིས་ངོ་རྒོལ་བྱེད་སྐབས་རྒྱ་གཞུང་གིས་དམག་མི་བཏང་ནས་དྲག་གནོན་བྱས་ཡོད་འདུག དེ་བཞིན་ས་གནས་བོད་མི་དང་དམག་མིའི་བར་འཐབ་འཛིང་ཤོར་ནས་བོད་མི་ ༦ ཙམ་ལ་རྨས་སྐྱོན་དང་། རྒྱ་གཞུང་གི་དམག་མི་ ༤ ཙམ་ལ་རྨས་སྐྱོན་བྱུང་ཡོད་འདུག
གནས་ཚུལ་དེ་བྱུང་རྗེས་རྒྱ་གཞུང་གི་ཉེན་རྟོག་པས་བོད་མི་ ༢༡ འཛིན་བཟུང་བཀག་ཉར་དང་། ད་དུང་རྒྱ་གཞུང་གིས་མི་མང་གི་ཁང་པ་ ༢༠༠ ལྷག་གཏོར་རྒྱུ་ཡིན་སྐོར་གྱི་གསལ་བསྒྲགས་བྱས་འདུག
ཉེ་ཆར་ས་ཆའི་བདག་དབང་དོན་དུ་བོད་པའི་སྐྱེ་དམན་གཉིས་ཀྱིས་སྔ་ཕྱིར་རང་ལུས་མེར་སྲེག་གིས་རྒྱ་གཞུང་ལ་ངོ་རྒོལ་བྱས་པའི་གནས་ཚུལ་བྱུང་ཡོད་ནའང་། བོད་ནང་དུ་རྒྱ་གཞུང་གིས་དམ་བསྒྲགས་ཤུགས་ཆེ་བྱེད་བཞིན་ཡོད་སྟབས། གནས་ཚུལ་ཁ་གསལ་རྒྱུས་ལེན་བྱེད་ཐུབ་ཀྱི་མེད་པ་བཅས། །
