༢༠༡༣ ཟླ་ ༤ ཚེས་ ༨ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ཟླ་ ༤ ཚེས་ ༧ ཉིན་ནི་གོ་ལ་ཡོངས་སུ་འཛམ་གླིང་འཕྲོད་བསྟེན་ཉིན་མོ་ཞེས་སྲུང་བརྩི་ཞུ་ཡི་ཡོད་ཅིང༌། འདི་ལོའི་འཛམ་གླིང་འཕྲོད་བསྟེན་ཉིན་མོའི་བརྗོད་གཞི་ནི་རང་རེའི་ཁྲག་ཤེད་མཐོ་བའི་ནད་གཞི་འདི་བཀག་འགོག་བྱ་རྒྱུ་དེ་ཡིན་པ་རེད། ནད་གཞི་འདི་ནི་དེང་དུས་འཛམ་གླིང་ཡོངས་སུ་ཁྱབ་ཚད་ཤུགས་ཆེ་བའི་གནས་སྟངས་ཤིག་ཏུ་གྱུར་ཡོད་པ་མ་ཟད། སེམས་འཚབ་འོས་པའི་སྤྱི་དམངས་འཕྲོད་བསྟེན་གྱི་གནང་སྟངས་ཤིག་ཏུ་ཡང་གྱུར་ཡོད་པ་རེད།
འཛམ་གླིང་འཕྲོད་བསྟེན་ཚོགས་པའི་སྙན་ཐོ་གཞིར་བཟུང་ན། གོ་ལ་ཁྱོན་ཡོངས་སུ་གང་ཟག་དར་མ་གསུམ་ཆ་གཅིག་ལས་མང་བར་ཁྲག་ཤེད་མཐོ་བའི་ནད་གཞི་ཡོད་པ་དང༌། ཆབས་ཅིག་སྐྱེ་བོ་ལོ་ལྔ་བཅུ་ཡན་ཚོའི་ནང་གྲངས་ཚད་གཉིས་ཆ་གཅིག་ལས་མང་བར་ནད་གཞི་འདི་ཡོད་པ་རེད།
ལོ་ལྟར་མི་གྲངས་ས་ཡ་དགུ་ཙམ་ལ་རྙོག་རྫིང་ཆེ་བའི་ནད་གཞི་འདིའི་རྐྱེན་གྱིས་འདས་གྲོངས་སུ་འགྲོ་བཞིན་པ་རེད། འདིའི་ནང་བརྒྱ་ཆ་ ༥༡ ཙམ་ཞིག་ཀླད་པའི་ཁྲག་རྩ་འགག་པའི་རྐྱེན་དང༌། བརྒྱ་ཆ་ ༤༥ ཙམ་ལ་སྙིང་གི་ནད་གཞིའི་རྐྱེན་པས་འདས་གྲོངས་སུ་འགྱུར་གྱི་ཡོད།
སྤྱིར་ནད་གཞི་འདིར་ནད་རྟགས་དམིགས་བསམ་གང་ཡང་མེད་ཙང༌། མང་པོ་ཞིག་གིས་ནད་གཞི་འདིའི་ཐོག་དོ་སྣང་མེད་པར་ཡང་ནས་ཡང་དུ་ནད་གཞི་འདི་སོ་སོར་ཡོད་མེད་ངོ་རྟགས་སྤྱོད་རྒྱུར་དཀའ་ངལ་འཕྲད་ཀྱི་ཡོད་པ་རེད། དེར་བརྟེན་མི་རྣམས་རྙོག་རྗིང་ཆེ་བའི་ནད་གཞི་དཔེར་ན། སྙིང་ཁྲག་འགག་པ་དང༌། མིག་ལོང་བ༌། མཁའ་མ་གཅོང་ནད་ཆགས་པ། ཀླད་པའི་ཁྲག་རྩ་འགག་པ་བཅས་ཀྱི་ནང་ལྷུང་ཉེན་ཡོད། དེ་ལྟར་ན་ནད་གཞི་འདིས་མངོན་གསལ་མེད་པའི་ཐོག་ནས་ཚང་མར་གནོད་སྐྱོན་ཚབས་ཆེ་གཏོང་གི་ཡོད། ཁྲག་ཤེད་མཐོ་བའི་ནད་གཞི་འདི་ནི་སྤྱིར་གང་ཟག་སོ་སོའི་ཉིན་རེའི་འཚོ་བའི་ནང་ལ་གཟུགས་པོར་ལུས་རྩལ་ཉུང་བ་དང༌། ཟས་རིགས་ནང་ཚྭ་དང་ཞག་ཚི་མང་པོ་བེད་སྤྱོད་པ། ནང་མིའི་རིགས་རྒྱུད་ནང་ཁྲག་ཤེད་ཀྱི་ནད་གཞི་ཡོད་པ། གཟུགས་པོ་རྒྱགས་པོ་ཡོད་པ། ཐ་མ་འཐེན་པ། ཆང་རག་འཐུང་བ་དང༌། སེམས་ངལ་ཆེ་བའི་འཚོ་གནས་བཅས་ལ་ནད་རིགས་འདི་འཕེལ་རྒྱུའི་ཉེན་ཁ་ཆེ་བ་ཡོད།
འོན་ཀྱང༌། ཁྲག་ཤེད་མཐོ་བའི་ནད་གཞི་འདི་སྔོན་འགོག་ཐུབ་ལ་བཅོས་ཐབས་ཀྱང་ཡོད་པའི་ནད་གཞི་ཞིག་རེད། ནད་གཞི་འདི་ཟློག་ཐབས་སླད། སོ་སོའི་གཟུགས་པོའི་ལྗིད་ཚད་རན་པོ་སོར་གནས་བྱེད་པ། ཟས་རིགས་ནང་ཚྭ་དང་ཞག་ཚི་ཉུང་དུ་གཏོང་བ། ཤིང་ཏོག་དང་ཚལ་རིགས་མང་དུ་གཏོང་བ། དུས་རྟག་ཏུ་ལུས་རྩལ་མང་ཙམ་རྩེད་པ། ཆང་རག་དང་ཐ་མག་རིགས་མི་འཐེན་པ་བཅས་བྱ་རྒྱུ་གལ་ཆེ། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་འཕྲོད་བསྟེན་གྲངས་ཐོ་ལས་གཞི་གཞིར་བཟུང་ན། ཉེ་སྔོན་བོད་པའི་སྤྱི་ཚོགས་ནང་ཁྲག་ཤེད་མཐོ་བའི་ནད་གཞི་འདིའི་གྲངས་ཚད་འཕེལ་བཞིན་པར་སེམས་ཁུར་བྱ་འོས་པའི་གནང་སྟངས་སུ་གྱུར་ཡོད་པ་རེད། ནང་གཞི་འདི་ཤེས་རྟོག་ཇི་ཙམ་གྱི་མགྱོགས་པ་ཤེས་པ་དེ་ཙམ་གྱིས་སྤྱི་ཚོགས་ནང་ནད་གཞི་འདིའི་གྲངས་ཚད་ཉུང་དུ་གཏོང་འགྱུར་ཁེ་ཕན་ཡོད། ངོས་ནས་རེ་བསྐུལ་ཞུ་རྒྱུར་ཚང་མས་སོ་སོའི་འཕྲོད་བསྟེན་སླད་སྨན་ཁང་དུ་ཡང་ཟེ་བརྟག་དཔྱད་བྱ་རྒྱུར་སྣང་ཆུང་མ་གནང་པའི་ཐོག་ནས་ཁྲག་ཤེད་མཐོ་བའི་ནད་གཞི་འདི་དག་སྔོན་དུ་ཤེས་རྟོགས་ཡོང་བ་དང་དེ་བཞིན་སྨན་བཅོས་བྱ་རྒྱུར་ཕན་ཐོགས་ཡོད།།
སྨན་པ་ཚེ་རིང་དབང་ཕྱུག
འཕྲོད་བསྟེན་བཀའ་བློན
