༢༠༡༣ ཟླ་ ༤ ཚེས་ ༢༦ རེས་གཟའ་པ་སངས།
༄༅། །ཕྱི་ལོ་ ༢༠༡༣ ཟླ་ ༤ ཚེས་ ༢༥ ནས་ ༢༦ ཉིན་གཉིས་རིང་བོད་མིའི་སྒྲིག་འཛུགས་ཤེས་རིག་ལས༌ཁུངས་ཀྱིས་གཞི་རིམ་གོང་མ་འཛིན་རིམ་དགུ་པ་དང་བཅུ་པའི་ལུས་སྦྱོང་དང་། འཕྲོད་བསྟེན། ཟློས་གར་བཅས་ཀྱི་བསླབ་གཞི་རྩ་འཛིན་བཟོ་འགོད་ཚོགས་འདུ་ཞིག་ས་རཱ་མཐོ་སློབ་ཏུ་སྐོང་ཚོགས་གནང་ཡོད་འདུག ཚོགས་འདུ་འདིར་དྷ་ས་བོད་ཁྱིམ་དང། སམ་བྷོ་ཊ། མེས་དབོན་དཔེ་སྟོན་སློབ་གྲྭ་བཅས་ནས་ལུས་དགེ་དང་ཟློས་དགེ་ཁག་ཅིག་དང་། ཤེས་རིག་ལས་ཁུངས་ཀྱི་བསླབ་གཞི་བཟོ་འགོད་པ་བཅས་ཁྱོན་བསྡོམས་ཚོགས་མི་ ༨ ཚོགས་ཞུགས་གནང་ཡོད་ཅིང། ཤེས་རིག་ལས་ཁུངས་ཀྱི་དྲུང་ཆེ་ལས་འཕར་དང་ཤེས་ཡོན་ལྷན་ཚོགས་སྤྱི་ཁྱབ་ཡིག་ཚང་གི་འགན་འཛིན་གཅིག་ལྕོགས་བཀྲ་ཤིས་དོན་གྲུབ་ལགས་ནས་ཚོགས་འདུ་ངོ་སྤྲོད་དང་། ཤེས་ཡོན་སྲིད་བྱུས་དང་བསླབ་གཞི་རྩ་འཛིན་གྱི་གལ་གནད་སྐོར་གསུང་བཤད་གནང་འདུག།
ཉིན་གཉིས་རིང་གི་ཚོགས་འདུའི་ཐོག ཤེས་ཡོན་ལྷན་ཚོགས་སྤྱི་ཁྱབ་ཡིག་ཚང་ནས་བཟོ་འགོད་བྱས་པའི་ལུས་སྦྱོང་དང་། འཕྲོད་བསྟེན། ཟློས་གར་བཅས་ཀྱི་བསླབ་གཞི་རྩ་འཛིན་གྱི་རགས་ཟིན་ཐོག་གོ་བསྡུར་བྱས་ཏེ་གཏན་འབེབས་བྱས་ཡོད་པ་རེད།
