༢༠༡༣ ཟླ་ ༤ ཚེས་ ༢༥ རེས་གཟའ་ཕུར་བུ།
༄༅། །བོད་མིའི་སྒྲིག་འཛུགས་བཀའ་ཤག་གི་བཀའ་འབྲེལ་འོག་ཕྱི་ལོ་ ༢༠༡༣ ཟླ་ ༣ ཚེས་ ༢༤ ཉིན་ཆོས་རིག་ལས་ཁུངས་ཀྱི་གོ་སྒྲིག་ཞུས་པའི་མཆོད་འབུལ་སྨོན་ལམ་དུ་སྲིད་སྐྱོང་བློ་བཟང་སེང་གེ་མཆོག་གིས་མཆོད་འབུལ་སྨོན་ལམ་དང་འབྲེལ་བའི་གསུང་བཤད་གནང་དོན། བཀའ་ཟུར་ཀིརྟི་རིན་པོ་ཆེ་དབུས་སྐྱབས་གནས་དགེ་འདུན་གྱི་སྡེ་དང་། མང་གཙོའི་ཀ་བ་གསུམ་གྱི་མཛད་གཙོ་རྣམ་པ། མི་མང་དང་སློབ་ཕྲུག་རྣམ་པར་བློ་ཕམ་པའི་གནས་ཚུལ་ཞིག་ཞུ་རྒྱུར་ཕྱི་ཟླ་ ༤ ཚེས་ ༡༦ ཉིན་མོ་ཕྱུག་མཚོ་ལགས་དགུང་ལོ་ ༢༠ ཡིན་པ་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་འདུག དེ་བཞིན་ཕྱི་ལོ་ ༢༠༡༣ ཟླ་ ༢ ཚེས་ ༢༤ ཉིན་རང་ལུས་མེར་སྲེག་བཏང་མཁན་ཕག་མོ་དོན་གྲུབ་ལགས་ཉེ་བའི་ཆར་འདས་གྲོངས་སུ་གྱུར་འདུག ཁོང་དང་ཁོང་རྣམ་པའི་ནང་མི་སྤུན་མཆེད་སོགས་བོད་ཀྱི་རྩ་དོན་ཆེད་ད་ལྟ་བར་ལུས་སྲོག་བློས་བཏང་མཁན་ཚང་མར་ཐུགས་སྨོན་གནང་རོགས་ཞུ་རྒྱུ་དང་། དེ་དང་འབྲེལ་བའི་ཐོག་ནས་གནས་ཚུལ་གཅིག་གཉིས་ཞུས་ན་བསམས་བྱུང་
ཉེ་ཆར་ཨ་རིའི་ཕྱི་སྲིད་བློན་ཆེན་ཇོན་ཀེ་རིལ་མཆོག་ཨེ་ཤི་ཡའི་རྒྱལ་ཁབ་ནང་ནས་རྒྱ་ནག་དང་ཉི་ཧོང། ལྷོ་ཀོ་རི་ཡ་གསུམ་དུ་ཕེབས་པར་གཙོ་བོ་བྱང་ཀོ་རི་ཡའི་གནད་དོན་ཡིན་ཡང་མཉམ་དུ་རྒྱ་ནག་འགོ་ཁྲིད་ཚོ་མཇལ་བའི་སྐབས་ལ་འགྲོ་བ་མིའི་ཐོབ་ཐང་སྐོར་ནས་གླེང་ཀློང་བྱུང་བའི་གནས་ཚུལ་ཞིག་འདུག དེ་བཞིན་ཡུ་རོབ་ནས་ཕྱི་སྲིད་ཀྱི་འགན་གཙོ་བོ་བཞེས་མཁན་ལྕམ་ཁེ་ཐེ་རིན་ཨེ་ཤི་ཊོན་མཆོག་ད་ལན་རྒྱ་ནག་ཏུ་ཕེབས་ཏེ་གཙོ་བོ་བདེ་འཇགས་དང་དེ་བཞིན་བྱང་ཀོ་རི་ཡ། ཨི་རང་གཙོས་པའི་སྐོར་བཀའ་མོལ་གནང་རྒྱུ་རེད།
ད་བར་དུ་ལྕམ་ཁེ་ཐེ་རིན་ཨེ་ཊོན་མཆོག་ནས་བོད་དོན་འབྲེལ་མོལ་ཐོག་ནས་གསར་འགོད་གསལ་བསྒྲགས་རིམ་པ་གནང་ཡོད། དེར་བརྟེན་བོད་དོན་དང་འབྲེལ་བའི་གནད་དོན་ཐོག་ཡིན་ཡང་རྒྱ་ནག་འགོ་ཁྲིད་ཚོ་དང་མཉམ་དུ་གླེང་ཀློང་བྱུང་བའི་རེ་བ་ཞུ་གི་ཡོད། དེ་བཞིན་ཨ་རིའི་ཕྱི་སྲིད་ལས་ཁུངས་ཀྱི་བློན་ཆེན་ཇོན་ཀེ་རིལ་མཆོག་གི་མཚན་ཐོག་ནས་སྙན་ཐོ་ཞིག་བཏོན་གནང་ཡོད། དེའི་ནང་ལ་གཞི་རྩའི་སྤྱི་ཡོངས་ཀྱི་འགྲོ་བ་མིའི་གནས་སྟངས་ཞིབ་ཕྲ་བཀོད་པ་དེའི་ནང་ནས་དམིགས་བསལ་བོད་ནང་གི་གནས་སྟངས་རྒྱ་ནག་གཞུང་གི་མཁྲེགས་འཛིན་གྱི་སྲིད་བྱུས། འགྲོ་བ་མིའི་ཐོབ་ཐང་གི་གནས་སྟངས་ཐབས་སྐྱོ་པོ་ཡོད་པ་གསལ་པོ་བཀོད་པ་མ་ཟད། འགྲོ་བ་མིའི་ཐོབ་ཐང་གནས་སྟངས་ཐབས་སྐྱོ་པོ་ཡོད་པའི་རྐྱེན་གྱི་བོད་མི་ཚོས་ངོ་རྒོལ་བྱེད་ཀྱི་ཡོད་པ་ཨ་རི་གཞུང་གི་གཞུང་འབྲེལ་སྙན་ཐོ་རང་ལ་བཀོད་པ་དེས་ག་རེ་མཚོན་གྱི་ཡོད་ཞེ་ན། བདེན་པ་ང་ཚོར་ཡོད་ཀྱང་རྒྱ་ནག་གཞུང་གི་མཁྲེགས་འཛིན་སྲིད་བྱུས་ཀྱི་རྐྱེན་པས་བོད་ནང་ངོ་རྒོལ་གྱི་རང་ལུས་མེར་སྲེག་བཏང་མཁན་ཡོང་གི་ཡོད།
དེར་བརྟེན་བོད་ཀྱི་གནད་དོན་དེ་སེལ་རྒྱུར་ཐབས་ལམ་ཡང་པེ་ཅིང་བརྒྱུད་འགྲོ་དགོས་ཀྱི་ཡོད། རྒྱ་ནག་གཞུང་ཐོག་ནས་སྲིད་བྱུས་གུ་ཡངས་དང་འབྲེལ་མོལ་བརྒྱུད་བོད་ཀྱི་དཀའ་ངལ་སེལ་ཐུབ་པ་ཡིན་ན་ཐབས་ལམ་ཡག་ཤོས་ཡིན་པ་རྒྱལ་སྤྱིའི་སྤྱི་ཡོངས་ནས་རྒྱལ་ཁབ་གཅིག་གཉིས་དང་གྲོས་ཚོགས་རིམ་པའི་ཐོག་ནས་གྲོས་ཆོད་དང་གསར་འགོད་གསལ་བསྒྲགས་བྱས་ཡོད་ལ་སྙན་ཐོ་ཡང་རིམ་པས་ཐོན་གྱི་ཡོད་པ་དེ་དག་ཚང་མས་མཁྱེན་ན་བསམ་བྱུང་། མཐའ་དོན་སང་ཉིན་ཕྱི་ཚེས་ ༢༥ ཉིན་པཎ་ཆེན་རིན་པོ་ཆེའི་འཁྲུངས་སྐར་ཉིན་མོ་དང་། ད་ལྟའི་ཆར་ལོ་ངོ་བཅོ་བརྒྱད་རིང་པཎ་ཆེན་དགེ་འདུན་ཆོས་ཀྱི་ཉི་མ་གར་སོང་ཆ་མེད་ཆགས་ཡོད་པ་གསལ་པོ་དང་ཁོང་དགུང་ལོ་ཉི་ཤུ་རྩ་བཞིར་ཕེབས་ཡོད། ཁོང་གི་གནས་སྟངས་དང་བོད་སྤྱི་ཡོངས་ཀྱི་གནས་སྟངས་འདྲ་པོ་ཆགས་ཡོད། གང་ཡིན་ཟེར་ན་ཆོས་དད་རང་དབང་དང་གཏམ་བརྗོད་རང་དབང་། ཆབ་སྲིད་རང་དབང་མེད་པར་བརྟེན་ད་བར་གར་སོང་ཆ་མེད་ཡིན་པའི་གནས་སྟངས་དེས་བོད་སྤྱི་ཡོངས་ལ་རྒྱ་ནག་གཞུང་གི་དམ་བསྒྲགས་ཤུགས་ཆེན་པོ་བྱེད་ཀྱི་ཡོད་པ་གསལ་པོ་ཞེ་དྲག་དང་། ཁོང་གློད་བཀྲོལ་གཏོང་དགོས་རྒྱུ་གལ་ཆེན་པོ་ཡིན་པར་སོང་ཚང་མས་མཉམ་དུ་ཐུགས་སྨོན་གནང་རོགས་གནང་ཞུ་རྒྱུ་ཡིན། ཞེས་གསུང་བཤད་གནང་ཡོད།
