༢༠༡༣ ཟླ་ ༤ ཚེས་ ༤ རེས་གཟའ་ཕུར་བུ།
༄༅། །བོད་མིའི་སྒྲིག་འཛུགས་བཀའ་ཤག་གི་བཀའ་འབྲེལ་འོག་ཕྱི་ལོ་ ༢༠༡༣ ཟླ་ ༤ ཚེས་ ༣ ཉིན་ཆོས་རིག་ལས་ཁུངས་ནས་གོ་སྒྲིག་ཞུས་པའི་མཆོད་འབུལ་སྨོན་ལམ་དུ་སྲིད་སྐྱོང་བློ་བཟང་སེང་གེ་མཆོག་གིས་མཆོད་འབུལ་དང་འབྲེལ་བའི་གསུང་བཤད་གནང་དོན། རྣམ་གྲྭ་ཕན་བདེ་ལེགས་བཤད་གླིང་གི་མཁན་རིན་པོ་ཆེ་མཆོག་གིས་དབུས་སྐྱབས་གནས་དགེ་འདུན་གྱི་སྡེ། མང་གཙོའི་ཀ་བ་གསུམ་གྱི་མཛད་གཙོ་རྣམ་པ། མི་དམངས་དང་བརྩེ་བའི་སློབ་ཕྲུག་རྣམ་པ། དེ་བཞིན་བལ་ཡུལ་ནས་ཆེད་མངགས་ཚོགས་འདུར་ཕེབས་པའི་འཐུས་མི་རྣམ་པ་བཅས་ལ་བློ་ཕམ་པའི་གནས་ཚུལ་ཞུ་རྒྱུར། རང་ལོ་ ༢༨ ལ་སོན་པའི་བོད་མདོ་སྨད་ཀླུ་ཆུ་ནས་ཡིན་པའི་དགེ་འདུན་པ་དཀོན་མཆོག་བསྟན་འཛིན་ལགས་ཀྱིས་ཕྱི་ལོ་ ༢༠༡༣ ཟླ་ ༣ ཚེས་ ༢༦ ཉིན་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་འདུག ད་བར་དུ་རང་ལུས་མེར་སྲེག་གཏོང་མཁན་ཁྱོན་བསྡོམས་ ༡༡༤ བཏང་ཡོད་ཁོངས་ནས་ ༩༦ འདས་གྲོངས་སུ་གྱུར་ཡོད། ཕྱི་ལོ་ ༢༠༡༣ ལོར་ ༡༦ བྱུང་ཡོད།
དེ་རིང་ཉིན་མོར་བལ་ཡུལ་དུ་སྒྲུབ་ཚེ་ལགས་ཀྱིས་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་ནས་ཞག་བཞི་བཅུ་ཞེ་དགུ་འཁོར་གྱི་ཡོད། དེར་བརྟེན་ཚང་མས་ཐུགས་སྨོན་ཡག་པོ་བསྐྱོན་རོགས་ཞུ་རྒྱུ་ཡིན། དེ་བཞིན་བོད་ནང་ནས་གནས་ཚུལ་ཐོན་གསལ་ལྟར་ན། ཉེར་ཆར་མལ་གྲོ་གུང་དཀར་གྱི་གཏེར་ཁ་སྔོག་ཡུལ་ཞིག་ལ་ས་རུད་བརྒྱབ་ནས་མི་མང་དག་ཅིག་འདས་གྲོངས་སུ་གྱུར་བའི་གནས་ཚུལ་འདུག ཁོང་རྣམ་པ་ཚོར་ཡང་ཐུགས་སྨོན་བསྐྱོན་རོགས་ཞུ་རྒྱུ་ཡིན། སྤྱིར་བཏང་མལ་གྲོ་གུང་དཀར་ནས་ཟངས་དང་གསེར་གྱི་གཏེར་ཁ་སྔོག་འདོན་བྱེད་ཀྱི་ཡོད་འདུག དེར་སྐྱོན་ཆག་བྱུང་བར་རྒྱ་ནག་ནང་གི་རྒྱ་མི་མཁས་པ་ཁོར་ཡུག་ལ་དོ་སྣང་ཡོད་མཁན་དང་དེ་བཞིན་རྩོམ་པ་པོ། གློག་བརྙན་འཁྲབ་མཁན་སོགས་ཀྱིས་སྐྱོན་འཛུགས་བྱེད་བཞིན་ཡོད་པ་ཧ་ཅང་གསལ་པོ་རེད་འདུག སྤྱིར་བཏང་རང་ལུས་མེར་སྲེག་གཏོང་དགོས་དོན་ནི་བོད་ནང་རྒྱ་ནག་གཞུང་ནས་མཁྲེགས་འཛིན་གྱི་སྲིད་བྱུས་བཟུང་བར་བརྟེན་ནས་བྱུང་བ་རེད། དེ་བཞིན་ཆབ་སྲིད་དམ་བསྒྲགས་དང་མི་རིགས་དབྱེ་འབྱེད། ཁོར་ཡུག་གཏོར་བཤིག་གཏོང་གི་ཡོད་པའི་ཁུལ་སྐྱེལ་ནི་མལ་གྲོ་གུང་དཀར་དུ་ས་རུད་བྱུང་བ་དེ་ནས་ཧ་ཅང་གསལ་པོ་ཆགས་ཡོད། ཕྱོགས་གཅིག་ནས་རྒྱ་ནག་གཞུང་གིས་དམིགས་བསལ་མལ་གྲོ་གུང་དཀར་གྱི་གསེར་གཏེར་སྔོག་ཡུལ་དེ་མིག་དཔེ་ལྟ་ས་ཡིན་ཞེས་ཁྱབ་བསྒྲགས་བྱས་ཡོད། མིག་དཔེ་ལྟ་ས་ཡིན་རུང་ཁོར་ཡུག་ལ་སྲུང་སྐྱོབ་བྱེད་ཀྱི་མེད་པའི་གནས་སྟངས་ཧ་ཅང་གསལ་པོ་ཆགས་ཡོད།
དེར་བརྟེན་རྒྱ་ནག་གཞུང་ནས་དུས་རྟག་ཏུ་བརྗོད་དང་བརྗོད་མུས་ཡིན་པ་དེ་བདེན་པ་མིན་པ་ཧ་ཅང་གསལ་པོ་ཆགས་ཡོད། གནས་ཚུལ་གཞན་ཞིག་ཞུ་རྒྱུར། ཕྱི་ལོ་ ༢༠༡༢ ལོར་ཞུ་གཏུག་གི་ལོ་དང་ཕྱི་ལོ་ ༢༠༡༣ ལོར་གདུང་སེམས་མཉམ་སྐྱེའི་ལོ་ཡིན་ཞེས་བརྗོད་ཡོད། ལས་འགུལ་སྤེལ་ཕྱོགས་སྐོར་བཀའ་ཤག་ཐོག་ནས་རེ་འདུན་ཞུས་ཡོད་ལ་བཀའ་སྤྱི་གཉིས་ནས་འགོ་ཁྲིད་དེ་ལས་འགུལ་ཡང་སྤེལ་ཡོད། ཕྱི་ལོ་ ༢༠༡༢ ལོར་ཞུ་གཏུག་གི་ལོར་འབོད་སྐུལ་ཞུས་ཡོད་པ་ལྟར། བོད་མི་དང་བོད་དོན་ལ་རྒྱབ་སྐྱོར་བྱེད་མཁན་ཚོགས་པ་ཁག་མང་དག་ཅིག་གིས་ཞུ་གཏུག་ཕུལ་བའི་བཀའ་དྲིན་ལ་བརྟེན་ནས་ལུང་པ་མང་པོ་ཞིག་གི་གྲོས་ཚོགས་ནང་གྲོས་ཆོད་བཞག་ཐུབ་ཡོད་པ་མ་ཟད། དབུ་མའི་ལམ་དང་འབྲེལ་མོལ་ལ་རྒྱབ་སྐྱོར་ཡོད་པའི་གསལ་བསྒྲགས་ཀྱང་མང་དག་ཅིག་གནང་ཡོད། དེ་དག་ཁྲོད་ནས་ཁག་གཅིག་རྣམ་པ་ཚོར་ངོ་སྤྲོད་ཞུས་ན། ཕྱི་ལོ་ ༢༠༡༡ ཟླ་ ༡༠ ཚེས་ ༢༧ ཉིན་ཡུ་རོབ་གྲོས་ཚོགས་ནས་བོད་དོན་ཐོག་གྲོས་ཆོད་བཞག་ཡོད། ཕྱི་ལོ་ ༢༠༡༢ ཟླ་ ༡ ཚེས་ ༣༠ ཉིན་ཨ་རིའི་གྲོས་ཚོགས་ནས་གྲོས་ཆོད་བཞག་ཡོད།
ཕྱི་ལོ་ ༢༠༡༢ ཟླ་ ༢ ཚེས་ ༨ ཉིན་ཨི་ཊ་ལིའི་གྲོས་ཚོགས་ནང་བོད་དོན་ཐོག་གྲོས་ཆོད་བཞག་ཡོད། ཕྱི་ལོ་ ༢༠༡༢ ཟླ་ ༣ ཚེས་ ༣༠ ཉིན་ཡུ་རོབ་གྲོས་ཚོགས་ནང་གུ་ཡངས་ཅན་དང་མང་གཙོ་དོན་གཉེར་བ་ཚོས་གསར་འགོད་གསལ་བསྒྲགས་གནང་ཡོད། ཕྱི་ལོ་ ༢༠༡༢ ཟླ་ ༤ ཚེས་ ༥ ཉིན་སྲིད་སྐྱོང་ཉི་ཧོང་དུ་བཅར་སྐབས་ཉི་ཧོང་གྲོས་ཚོགས་ཀྱི་འཐུས་མི་ ༦༠ དང་སྐུ་ཚབ་བཞི་བཅུ་ཞེ་གྲངས་ཡོད་པའི་ཆབ་སྲིད་ཚོགས་པ་ལྔ་ཐུན་མོང་ནས་དབུ་མའི་ལམ་དང་བོད་རྒྱ་འབྲེལ་མོལ་ལ་རྒྱབ་སྐྱོར་ཡོད་པ་མ་ཟད། བོད་ཀྱི་རྩ་དོན་ཐོག་སེམས་འཚབ་ཡོད་པའི་གསལ་བསྒྲགས་ཤིག་ཀྱང་གནང་ཡོད། དེ་བཞིན་ལྷོ་ཨ་མིའི་རི་ཀའི་སྦར་སིལ་གྲོས་ཚོགས་ནས་ཕྱི་ལོ་ ༢༠༡༢ ཟླ་ ༦ ཚེས་ ༡༥ ཉིན་བོད་དོན་ཐོག་གྲོས་ཆོད་བཞག་ཡོད། ཕྱི་ལོ་ ༢༠༡༢ ཟླ་ ༦ ཚེས་ ༢༧ ཉིན་ཡུ་རོབ་ནང་གི་རྒྱལ་ཁབ་ལུ་སན་གྱི་གྲོས་ཚོགས་ནང་གྲོས་ཆོད་བཞག་ཡོད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཉི་ཧོང་ལ་ཆིབས་སྒྱུར་བསྐྱངས་སྐབས་ཕྱི་ལོ་ ༢༠༡༢ ཟླ་ ༡༡ ཚེས་ ༡༤ ཉིན་གྲོས་ཚོགས་ཀྱི་འཐུས་མི་བརྒྱ་དང་ལྔ་བཅུས་བོད་དོན་དང་འབྲེལ་མོལ་ལ་རྒྱབ་སྐྱོར་ཡོད་པའི་ཡིག་ཆ་ཞིག་བཀྲམ་ཡོད། ཕྱི་ལོ་ ༢༠༡༢ ཟླ་ ༡༡ ཚེས་ ༣༠ ཉིན་ཕ་རན་སིའི་གྲོས་ཚོགས་ནང་གྲོས་ཆོད་བཞག་ཡོད། ཕྱི་ལོ་ ༢༠༡༣ ཟླ་ ༣ ཚེས་ ༢༠ ཉིན་ཨོ་སི་ཊོ་ལི་ཡའི་གྲོས་ཚོགས་ནང་ (Motion) བཞག་ཡོད། དེ་འབྲེལ་ཕྱི་དྲིལ་ལས་ཁུངས་ཁག་དང་མགྲིན་ཚབ་པས་བོད་རྒྱའི་འབྲེལ་མོལ་ལ་རྒྱབ་སྐྱོར་ཡོད་པའི་གཏམ་བཤད་དང་གསར་འགོད་གསལ་བསྒྲགས་གནང་མཁན་བྱུང་ཡོད།
དཔེར་ན། ཕྱི་ལོ་ ༢༠༡༢ ཟླ་ ༥ ཚེས་ ༢༢ ཡུ་རོབ་ཀྱི་ཚོགས་གཙོ་གཞོན་པས་གསལ་བསྒྲགས་གནང་ཡོད། དེ་བཞིན་ཨ་རིའི་གཞུང་གི་སྐུ་ཚབ་གྷེ་རི་ལོཀ་གིས་རྔ་པ་ཁུལ་དུ་ཕེབས་ཏེ་ཕྱི་ལོ་ ༢༠༡༡ ཟླ་ ༡༠ ཚེས་ ༡༧ ཉིན་མོ་བོད་ཀྱི་གནད་དོན་སེལ་དགོས་ཀྱི་འདུག་ཅེས་གསུངས་ཡོད། པོ་ལན་ཌིའི་ཕྱི་སྲིད་ལས་ཁུངས་ནས་ཕྱི་ལོ་ ༢༠༡༡ ཟླ་ ༡༠ ཚེས་ ༢༡ ཉིན་གསལ་བསྒྲགས་གནང་ཡོད། ཨ་རིའི་དམིགས་བསལ་འབྲེལ་མཐུད་པས་ཕྱི་ལོ་ ༢༠༡༢ ཟླ་ ༡༢ ཚེས་ ༥ དང་ཚེས་ ༡༡ ཉིན་འབྲེལ་མོལ་གནང་དགོས་སྐོར་གསུངས་ཡོད། ཡུ་རོབ་ཀྱི་ཚོགས་གཞོན་མཆོག་གིས་བསྐྱར་དུ་ཕྱི་ལོ་ ༢༠༡༢ ཚེས་ ༡༢ ཚེས་ ༡༤ ཉིན་བོད་དོན་སྐོར་གསུངས་འདུག ཁེ་ན་ཌའི་ཕྱི་སྲིད་བློན་ཆེན་མཆོག་གིས་ཕྱི་ལོ་ ༢༠༡༢ ཟླ་ ༡༢ ཚེས་ ༡༥ ཉིན་བོད་དོན་སེལ་ཐབས་བྱེད་དགོས་ཞེས་གསུངས་ཡོད། དབྱིན་ཡུལ་གྱི་ཕྱི་སྲིད་ལས་ཁུངས་ཀྱི་ཕྱི་སྲིད་བློན་ཆེན་མཆོག་གིས་ཕྱི་ལོ་ ༢༠༡༢ ཟླ་ ༡༢ ཚེས་ ༡༨ ཉིན་བོད་དོན་སྐོར་ལ་གསུངས་ཡོད། དེ་དང་འབྲེལ་ནས་གྲོས་ཚོགས་འཐུས་མི་སྒེར་ཐོག་ནས་གྲོས་ཚོགས་ར་བའི་ནང་གསུང་བཤད་གནང་བ་མང་དག་ཡོད།
དེ་བཞིན་ཇར་མན་སྲིད་བློན་ལ་ཇར་མན་གྲོས་ཚོགས་ཀྱི་འཐུས་མི་གང་ཙམ་ཞིག་གིས་བོད་དོན་སྐོར་ལ་ཐུགས་སྣང་གནང་དགོས་སྐོར་གྱི་ཕྱག་བྲིས་ཕུལ་འདུག དེ་དག་གིས་ང་ཚོས་ཕྱི་ལོ་ ༢༠༡༢ ལོ་ཞུ་གཏུག་གི་ཉིན་མོ་ཡིན་པ་གཞེན་སྐུལ་ཞུས་པ་ལྟར། བོད་མི་དང་བོད་དོན་རྒྱབ་སྐྱོར་ཚོགས་པ་སྤྱི་ཡོངས་ནས་དཀའ་ལས་བརྒྱབ་པའི་བཀའ་དྲིན་ལ་བརྟེན་ནས་གྲོས་ཆོད་རིམ་པ་བཞག་ཐུབ་ཡོད། ཕྱི་སྲིད་ལས་ཁུངས་ཀྱིས་གཙོས་བོད་རྒྱ་འབྲེལ་མོལ་ཡོང་ཐབས་ལ་བོད་ཀྱི་ཛ་དྲག་གནད་དོན་སེལ་ཐབས་བྱེད་དགོས་པ་རེད། ཅེས་སེམས་འཚབ་དང་སྦྲགས་བོད་དོན་ལ་རྒྱབ་སྐྱོར་ཡོད་པའི་རྣམ་པ་ཐོན་ཐུབ་པ་བྱུང་ཡོད། རྒྱལ་སྤྱིའི་སྤྱི་ཡོངས་ནས་བོད་དོན་ལ་རྒྱབ་སྐྱོར་གྱི་རྣམ་པ་ཤུགས་ཆེ་རུ་འགྲོ་གི་ཡོད་པ་མ་ཟད། རྒྱབ་སྐྱོར་རྣམ་པ་ཙམ་མིན་པར་གཞུང་འབྲེལ་གྱི་ཡིག་ཆ་བཞག་ཐུབ་རྒྱུ་མང་དུ་འགྲོ་གི་ཡོད་ཅེས་ཞུ་རྒྱུ་ཡིན།
མཐའ་དོན། དུས་ད་ལྟ་བར་དུ་བོད་ཀྱི་རྩ་དོན་ཆེད་རང་སྲོག་བློས་བཏང་གནང་མཁན་དང་ཁོང་རྣམ་པའི་ནང་མི་སྤུན་མཆེད་བཅས་ལ་ཐུགས་སྨོན་བསྐྱོན་རོགས་ཞུ་རྒྱུ་ཡིན། ཞེས་གསུང་བཤད་གནང་ཡོད་པ་བཅས། །
