༢༠༡༣ ཟླ་ ༤ ཚེས་ ༢༢ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ཟླ་ ༤ ཚེས་ ༩ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཨི་ཊ་ལིའི་ལྷོ་ཊི་རོལ་རང་སྐྱོང་མངའ་ཁུལ་གྱི་གྲངས་ཉུང་མི་རིགས་ཀྱི་གཟེངས་རྟགས་འབུལ་བཞེས་མཛད་རྗེས་གསར་འགོད་པ་ཁག་དང་མཇལ་འཕྲད་ཀྱིས་གསར་འགོད་པའི་དྲི་བར་བཀའ་ལན་སྩལ་ཡོད། ཕྱི་ཚེས་ ༡༠ ཉིན་ཆོས་ལུགས་ལ་མ་བརྟེན་པའི་འཇིག་རྟེན་བཟང་སྤྱོད་ཀྱི་རྣམ་གཞག་ཐོག་བཀའ་སློབ་དང་། ཕྱི་ཚེས་ ༡༡ ཉིན་ཨི་ཊ་ལིའི་ལྷོ་ཊི་རོལ་རང་སྐྱོང་མངའ་ཁུལ་ཏེ་རན་ཏོ་ (Trento) ཞེས་པའི་སྐུ་མགྲོན་དུ་གདན་ཞུས་ལྟར་ཆིབས་སྒྱུར་བསྐྱངས་ཏེ་མང་ཚོགས་ལ་༼རྙོག་འཛིང་ཆེ་བའི་འཛམ་གླིང་ནང་བདེ་སྐྱིད་འཚོལ་ཐབས།༽ (Happiness in a Troubled World) ཞེས་པའི་བརྗོད་གཞིའི་ཐོག་བཀའ་སློབ་སྩལ་ཡོད།
ཕྱི་ཚེས་ ༡༢ ཉིན་ཡུ་རོབ་བོད་བརྒྱུད་ནང་བསྟན་ལྷན་ཚོགས་ཐེངས་གཉིས་པར་བཀའ་སློབ་སྩལ་བ་མ་ཟད། ཕྱི་ཚེས་ ༡༣ ཉིན་སུད་སི་གྲོང་ཁྱེར་ཕ་རའི་བུག་ཚོགས་ཁང་ཆེན་མོའི་ནང་ (Fribourg Forum) མི་གྲངས་ ༨༠༠༠ བརྒལ་བར་བྱང་ཆུབ་ལམ་སྒྲོན་གྱི་ཆོས་འབྲེལ་དང་ཕྱེད་ཡོལ་བོད་དོན་ནམ་འགྲོ་བ་མིའི་ཐོབ་ཐང་སོགས་སྲུང་སྐྱོབ་ཆེད་རྒྱབ་སྐྱོར་གནང་མཁན་རྣམས་ལ་བདེན་པའི་འོད་སྣང་གི་གཟེངས་རྟགས་གསོལ་རས་སྩལ་ཡོད། ཕྱི་ཚེས་ ༡༤ ཉིན་༸གོང་ས་མཆོག་གིས་སུད་སིའི་གྲོང་ཁྱེར་ཕ་རའི་བུག་ (Fribourg Forum) གི་ཚོགས་ཁང་ཆེན་མོའི་ནང་འཛམ་གླིང་ཤར་ནུབ་ཀྱི་རྒྱལ་ཁབ་སུམ་ཅུ་ནས་ཆེད་བཅར་ཞུས་པའི་དད་ལྡན་ཆོས་ཞུ་བ་ ༨༠༠༠ བརྒལ་བར་སྒྲོལ་དཀར་གྱི་ཚེ་དབང་དང་། ཕྱི་ཚེས་ ༡༤ ཉིན་གྱི་དགོང་དྲོ་སུད་སིའི་གྲོང་ཁྱེར་ཕ་རའི་བུག་ (Fribourg Forum) ཚོགས་ཁང་ཆེན་མོའི་ནང་བོད་རིགས་ཁྱོན་མི་གྲངས་ ༨༠༠༠ བརྒལ་བར་དབུ་མའི་ལམ་གྱི་དགོངས་དོན་དང་འཚེ་བ་མེད་པའི་ལྟ་གྲུབ་སྐོར་ལ་བཀའ་སློབ་སྩལ།
ཕྱི་ཚེས་ ༡༥ ཉིན་སུད་སིའི་གྲོང་ཁྱེར་ལུ་སེན་ (Lausanne) ནང་རྟེན་གཞི་བྱས་པའི་ལུ་སན་གཙུག་ལག་སློབ་གཉེར་ཁང་ནས་ (University of Lausanne) གོ་སྒྲིག་ཞུས་པའི་སེམས་ཁམས་རིག་པའི་སྐོར་གྱི་ལྷན་ཚོགས་ཀྱི་ཚོགས་མགོན་དུ་ཆིབས་སྒྱུར་གྱིས་དགེ་ལས་སློབ་ཕྲུག་སོགས་ལ་བཀའ་སློབ་སྩལ་ཡོད། ཕྱི་ཚེས་ ༡༦ ཉིན་སུད་སིའི་གྲོང་ཁྱེར་ (Bern) བྷན་དུ་རྟེན་གཞི་བྱས་པའི་བྷན་གཙུག་ལག་སློབ་གྲྭར་༼ཡུན་གནས་ཐུབ་པའི་འབྱུང་འགྱུར་གྱི་སྤྱི་ཚོགས་ཤིག་ཇི་ལྟར་བསྐྲུན་ཐུབ།༽ ཅེས་པའི་བརྗོད་གཞིའི་ཐོག་བཀའ་སློབ་དང་། ཕྱི་ཚེས་ ༡༦ ཉིན་སུད་སིའི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ལ་བཀའ་སློབ་སྩལ།
ཕྱི་ཚེས་ ༡༧ ཉིན་༸གོང་ས་མཆོག་གིས་སུད་སིའི་ནང་རྟེན་གཞི་བྱས་པའི་རི་ཀོན་ཆོས་འཁོར་དགོན་པར་ཆིབས་སྒྱུར་བཀའ་དྲིན་བསྐྱངས་ཏེ་དེར་འདུས་མི་དམངས་རྣམས་ལ་བཀའ་སློབ་དང་། ཕྱི་ཚེས་ ༡༨ ཉིན་མ་གི་གཙུག་ལག་སློབ་ཁང་ (Magee University) དུ་ཆིབས་སྒྱུར་གྱིས་ཞི་བདེ་དང་རྩོད་རྙོག་གི་ལྟ་གྲུབ། ཅེས་པའི་བརྗོད་གཞིའི་ཐོག་གཙུག་ལག་སློབ་དཔོན་སྐུ་ཞབས་བྷེ་རན་ཊོན་ཧེམ་བྷར་མཆོག་དང་ལྷན་བགྲོ་གླེང་མཛད་ཡོད། ཕྱི་ཚེས་ ༢༠ ཉིན་དབྱིན་ཇིའི་གྲོང་ཁྱེར་ཀེམ་བྷི་རི་ཆིའི་ (Cambridge) ཁྱབ་ཁོངས་སན་ཇོན་སི་ (St John’s College) མཐོ་རིམ་སློབ་གཉེར་ཁང་དུ་རྒྱ་རིགས་སློབ་ཕྲུག་ལ་བཀའ་སློབ་དང་། ཕྱེད་ཡོལ་སན་ཇོན་སི་ལྷ་ཁང་ཞིག་ནང་ཆིབས་སྒྱུར་བསྐྱངས་ཏེ་མཐོ་སློབ་དེའི་དགེ་ལས་སློབ་ཕྲུག་རྣམས་ལ་༼སེམས་ལ་སློབ་སྦྱོང་ཇི་ལྟར་སྤྲོད་དགོས་༽ཞེས་པའི་བརྗོད་གཞིའི་འོག་བྱམས་བརྩེའི་ཕན་ཡོན་སྐོར་ལ་བཀའ་སློབ།
དེ་བཞིན་འཚེ་མེད་ཞི་བ་དང་རྩོད་རྙོག་འདུམ་འགྲིག་གི་བརྗོད་གཞིའི་ཐོག་བགྲོ་གླེང་ཚོགས་འདུར་བཀའ་སློབ་སྩལ་བ་བཅས་མཛད་འཕྲིན་ཁག་ལེགས་པར་གྲུབ་མཚམས་ཕྱི་ལོ་ ༢༠༡༣ ཟླ་ ༤ ཚེས་ ༢༢ ཉིན་རྒྱ་གར་གྱི་རྒྱལ་ས་ལྡི་ལི་ནས་མཁའ་ལམ་བརྒྱུད་སྔ་དྲོ་ཆུ་ཚོད་ ༡༠ པའི་ཐོག་ག་གྷལ་གནམ་ཐང་དུ་༸ཞབས་སོར་འཁོད་སྐབས་དབུས་བོད་མིའི་སྒྲིག་འཛུགས་ཀྱི་སྲིད་ཚབ་ཆོས་རིག་བཀའ་བློན་པདྨ་ཆོས་འབྱོར་མཆོག་གིས་དབུས་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་། གཞུང་འབྲེལ་མིན་པའི་ཚོགས་པའི་སྐུ་ཚབ་བཅས་ཀྱིས་ཕེབས་བསུ་གཟབ་རྒྱས་ཞུས་ཡོད། དེ་ནས་ཆིབས་འགྲོ་བརྒྱུད་བཞུགས་སྒར་དུ་ཆིབས་སྒྱུར་བསྐྱངས་སྐབས་རྡ་སའི་མི་མང་རྣམས་ཀྱིས་གཙོས་དད་ལྡན་པ་རྣམས་ནས་ལག་ཏུ་དཀར་གཙང་མཇལ་དར་དང་བདུག་སྤོས་ཐོགས་ཏེ་ཕེབས་བསུ་དང་། ཕོ་བྲང་གི་རྒྱལ་སྒོའི་ནང་ཁྲིམས་ཞིབ་པ་ཆེ་བ་མཆོག་གིས་གཙོས་ཁྲིམས་ཞིབ་པ་གཞན་མཆོག་དང་། ལྷན་ཁང་ཁག་གཅིག་གི་བཀའ་བློན་རྣམ་པ་སོགས་ཀྱིས་ཕེབས་བསུ་གཟབ་རྒྱས་ཞུས་ཡོད་པ་བཅས། །
