༢༠༡༣ ཟླ་ ༤ ཚེས་ ༡ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ཟླ་ ༣ ཚེས་ ༢༩ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་འབྲེལ་ཉིན་མཐའ་མར་དད་ལྡན་ཆོས་ཞུ་བ་ ༣༠༠༠༠ བརྒལ་བ་ཆེད་བཅར་ཞུས་ཡོད་པ་རྣམས་ལ་སྤྱན་རས་གཟིགས་ཀྱི་བཀའ་དབང་དང་བཀའ་སློབ་སྩལ་ཡོད།
དེ་ཡང་ཐོག་མར་མགོན་པོ་གང་ཉིད་མཆོག་བཞུགས་གནས་ནས་ཧི་མ་ལ་ཡའི་ཆོས་རིག་འཛིན་སྐྱོང་ཚོགས་པའི་མཛད་གཙོ་སོགས་ཀྱིས་ལག་ཏུ་དཀར་གཙང་མཇལ་དར་དང་དགེ་འདུན་པ་རྣམས་ཀྱིས་དུང་རྒྱ་སྤོས་སྣེས་སྔོན་བསུས་ཏེ་ས་ལུ་གྷ་རའི་དུས་འཁོར་ཐང་ཆེན་གྱི་བཞུགས་ཁྲི་རིན་པོ་ཆེར་༸ཞབས་སོར་འཁོད་གྲུབ་མཚམས་སྲད་རྒྱུད་མ་དགོན་གྲྭ་ཚང་དང་ཧི་མ་ལ་ཡའི་ཆོས་རིག་འཛིན་སྐྱོང་ཚོགས་པ་ཐུན་མོང་ནས་༸གོང་ས་༸སྐྱབས་མགོན་ཆེན་པོ་མཆོག་སྤྱིར་འཛམ་གླིང་སྐྱེ་འགྲོ་ཡོངས་དང་ཡང་སྒོས་རང་ཅག་གངས་ཅན་པ་རྣམས་ཀྱི་ཆེད་སྐུ་ཚེ་ཞབས་པད་བསྐལ་བརྒྱར་བརྟན་ཅིང་ཐུགས་ཀྱི་བཞེད་དགོངས་མཐའ་དག་འབད་མེད་ལྷུན་གྱིས་འགྲུབ་ཆེད་བརྟན་བཞུགས་བསྟར་འབུལ་ཞུས་ཡོད།
དེ་ནས་མགོན་པོ་གང་ཉིད་མཆོག་གིས་དད་ལྡན་ཆོས་ཞུ་བ་རྣམས་ལ་སྤྱན་རས་གཟིགས་ཀྱི་བཀའ་དབང་སྩལ་གྲུབ་མཚམས་བཀའ་སློབ་ཕེབས་དོན། སྤྱིར་བཏང་ལོ་གཉིས་གོང་ངོས་ཀྱིས་རྒྱལ་སྲིད་ཀྱི་འགན་ནས་ངོས་རང་སྒེར་པ་ཞིག་རྒན་ཡོལ་བྱས་པ་ཙམ་མ་ཟད། ༸གོང་ས་ལྔ་པ་ཆེན་པོའི་སྐབས་ནས་བཟུང་༸རྒྱལ་དབང་སྐུ་ཕྲེང་རིམ་བྱོན་གྱིས་བོད་ཀྱི་ཆོས་སྲིད་གཉིས་ཀྱི་དབུ་ཁྲིད་གནང་རྒྱུའི་ལམ་སྲོལ་ཞིག་བྱུང་ནས་ལོ་བཞི་བརྒྱ་མ་ཟིན་ཙམ་ཞིག་ཕྱིན་ཡོད། ལམ་སྲོལ་དེ་མཇུག་བསྡུས་པ་རེད། གང་ལྟར་དེའི་ཚེ་དེའི་དུས་ཕན་ཐོགས་བྱུང་ཡོད། ད་ཆ་དུས་ཚོད་ཡོོལ་པའི་གནས་ཚུལ་རེད། མ་འོངས་པར་ང་ཚོ་གཞིས་བྱེས་མཉམ་འཛོམས་བྱུང་མཚམས་ངོས་ཀྱིས་དེ་སྔ་ནས་གང་ལྟར་ང་ཚོས་འགན་འཁྱེར་རྒྱུ་ཡོང་གི་མ་རེད་ཅེས་བརྗོད་ཡོད།
༸གོང་ས་མཆོག་གི་བཀའ་སློབ་གཟིགས་ཆེད་འདིར་གནོན།
དེ་བཞིན་༸རྒྱལ་དབང་གི་སྒྲིག་འཛུགས་ཡོད་པ་འདི་གནས་དང་མི་གནས་དགོས་དང་མ་དགོས་དེའི་ཚེ་དེའི་དུས་ཀྱི་འབྲེལ་ཡོད་མི་དམངས་ཚོས་ཐག་གཅོད་བྱེད་ཀྱི་རེད་ཅེས་ཕྱི་ལོ་ ༡༩༦༩ ལོར་ངོས་ཀྱིས་བརྗོད་ཡོད། ཕྱི་ལོ་ ༢༠༠༡ ལོར་ང་ཚོའི་ཆབ་སྲིད་ཀྱི་འགོ་ཁྲིད་འོས་བསྡུའི་ལམ་ནས་བསྐོས་པ་རེད། དེ་ནས་བཟུང་ངོས་རང་ཕྱེད་རྒན་ཡོལ་གནས་སྟངས་ཐོག་བསྡད་པ་ཡིན། ལོ་གཉིས་གོང་འོས་བསྡུའི་ལམ་ནས་བསྐོས་པའི་བཀའ་བློན་ཁྲི་པས་ལོ་ལྔ༌ཚན་གཉིས་གནང་སྟེ་ལོ་བཅུ་ཕྱིན་ཡོད། དེ་རྗེས་འོས་བསྡུ་བྱེད་སྐབས་ལུང་པ་འདྲ་མིན་ནང་གནས་པའི་བོད་མི་ཡོད་དོ་ཅོག་གིས་འོས་བསྡུ་བྱེད་རྒྱུར་ཧ་ཅང་འཁུར་ལེན་ཡག་པོ་བྱེད་བཞིན་འདུག དེར་བརྟེན་ངོས་རང་རྒན་ཡོལ་ཆ་ཚང་བྱ་རྒྱུའི་དུས་ལ་བབ་པ་ལྟ་བུ་མཐོང་སྟེ་རྒན་ཡོལ་ཆ་ཚང་ཞུས་ཏེ་ད
གའ་ལྡན་ཕོ་བྲང་གི་ཆབ་སྲིད་ཀྱི་འགན་འཁུར་རྒྱུ་དེ་སྐལ་བཟང་ལུགས་བཟང་དང་། བཀྲ་ཤིས་ལོ་ལེགས། དེ་བཞིན་དགའ་བཞིན་སྤྲོ་བཞིན་མ་སྐུལ་དང་བླངས་སྒོ་ནས་མཇུག་བསྡུས་པ་ཡིན། ཞེས་སོགས་ཀྱི་བཀའ་སློབ་སྩལ་ཡོད།
ལྷག་པར་༸གོང་ས་མཆོག་གིས་བོད་ཀྱི་འཐབ་རྩོད་སྐོར་བཀའ་སློབ་ཕེབས་དོན། བོད་ཀྱི་འཐབ་རྩོད་དེ་མི་རེ་ཟུང་གི་དོན་དག་མ་རེད། བོད་རྒྱ་ཆེའི་མི་དམངས་ཀྱི་བདེན་དོན་འཐབ་རྩོད་བྱེད་ཀྱི་ཡོད། གཙོ་བོ་གཞིས་ལུས་རྒྱ་ཆེའི་མི་དམངས་རྣམས་རེད། སྔོན་མ་ནས་ངོས་ཀྱིས་ངོས་རང་གཞིས་ལུས་རྒྱ་ཆེའི་མི་དམངས་ཀྱི་རང་དབང་ཐོག་གཏམ་བརྗོད་བྱེད་མཁན་ཞིག་ལ་ངོས་འཛིན་བྱེད་བཞིན་ཡོད། ཅེས་དུས་རྟག་ཏུ་བརྗོད་ཀྱི་ཡོད། ངོས་རང་འདི་གར་གཞིས་ལུས་རྒྱ་ཆེའི་མི་དམངས་ཀྱི་འགོ་ཁྲིད་མཁན་དང་བཀའ་གཏོང་མཁན་ལ་སྔོན་མ་ནས་ངོས་ཀྱིས་ངོས་འཛིན་བྱེད་ཀྱི་མེད། གཞིས་ལུས་རྒྱ་ཆེའི་མི་དམངས་ཀྱི་འདོད་པ་དང་བོད་ནང་གི་དངོས་ཡོད་གནས་ཚུལ་ག་རེ་ཡོད་པ་རྣམས་འགྲེལ་བཤད་རྒྱག་རྒྱུ་དང་། གཞིས་ལུས་རྒྱ་ཆེའི་མི་དམངས་ཀྱི་རེ་འདུན་རྣམས་མི་གཞན་ལ་འབོད་སྐུལ་ཐོག་བརྗོད་རྒྱུ་དེ་ངོས་ཀྱི་ལས་འགན་རེད། དེར་བརྟེན་གཙོ་བོ་གཞིས་ལུས་རྒྱ་ཆེའི་མི་དམངས་དེ་དག་དུས་ད་ལྟ་བར་དུ་སེམས་ཤུགས་དང་སྙིང་སྟོབས་ཧ་ལས་པ་རེད་འདུག
ང་ཚོས་གཉིས་ཕན་དབུ་མའི་ལམ་ཞེས་པར་རྒྱ་ནག་མི་དམངས་ནང་གི་ཤེས་ཡོན་ཅན་མང་དག་ཅིག་གིས་རྒྱབ་སྐྱོར་བྱེད་བཞིན་ཡོད། ཨ་རིའི་ནང་ཡོད་པའི་མང་གཙོ་དོན་གཉེར་བ་མང་པོ་ཞིག་ངོས་ཀྱིས་ཐུག་གི་ཡོད། ཁོང་ཚོས་དགའ་མོས་ཐོག་ནས་ཧ་ཅང་རྒྱབ་སྐྱོར་བྱེད་ཀྱི་འདུག གལ་ཆེ་ཤོས་ཤིག་ལ་བོད་ནང་གི་བོད་རིགས་སྤུན་ཟླ་ཤེས་ཡོན་ཅན་དང་རྩོམ་སྒྲིག་པ། སྒྱུ་རྩལ་པ། སློབ་དགེ་བརྒྱ་ཕྲག་བརྒལ་བ་ངོས་ཀྱིས་ཐུག་ཡོད། རང་བཙན་ཞེས་ང་ཚོ་བོད་པའི་ཚང་མའི་བློར་ཡོད། འོན་ཀྱང་ང་ཚོས་ད་ལྟའི་དཀའ་ངལ་སེལ་ཐུབ་རྒྱུར་བསམ་བློ་གཏོང་དགོས་ཀྱི་ཡོད། དེར་བརྟེན་གཉིས་ཕན་དབུ་མའི་ལམ་དེ་རྒྱུ་མཚན་ལྡན་ཐོག་རྒྱ་མིར་འགྲེལ་བཤད་དང་སྐད་ཆ་ཤོད་རྒྱུ་ཡོད་པ་ཧ་ཅང་ཡག་པོ་འདུག་ཅེས་ཚང་མས་རྒྱབ་སྐྱོར་བྱེད་ཀྱི་འདུག ཅེས་སོགས་ཀྱི་བཀའ་སློབ་སྩལ་ཏེ་ཆོས་འབྲེལ་མཇུག་སྒྲིལ་མཛད་ཡོད་པ་བཅས། །
