༢༠༡༣ ཟླ་ ༤ ཚེས་ ༡༨ རེས་གཟའ་ཕུར་བུ།

༄༅། །སྐུ་ཞབས་རི་ཆ་ཌི་མོར་ (Richard Moore) མཆོག་གིས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་ཟབ་མོ་ཐོབ་སྟེ་ཕྱི་ལོ་ ༢༠༡༣ ཟླ་ ༤ ཚེས་ ༡༧ ཉིན་༸གོང་ས་༸སྐྱབས་མགོན་ཆེན་པོ་མཆོག་བྱང་ཕྱོགས་ཨར་ལེན་ཌིར་ཆིབས་སྒྱུར་གྱིས་ (Northern Ireland) གྲོང་ཁྱེར་ཌེ་རིའི་གནམ་ཐང་དུ་ (Derry) ༸ཞབས་སོར་བདེ་བར་འཁོད་སྐབས། སྐུ་ཞབས་རི་ཆ་ཌི་མོར་ (Richard Moore) མཆོག་གིས་གཙོས་འབྲེལ་ཡོད་མི་སྣ་ཁག་གིས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད། སྐབས་དེར་སྐུ་ཞབས་རི་ཆ་ཌི་མོར་མཆོག་གིས་ལག་ཏུ་མེ་ཏོག་དཀར་པོ་ཞིག་ཐོགས་ཏེ་མགོན་པོ་གང་ཉིད་མཆོག་ལ་ཕེབས་བསུའི་འཚམས་འདྲི་ཞུས་པ་མ་ཟད། ཁོང་གི་བུ་མོ་ཨེན་ཡ་ (Enya) ལགས་ཀྱང་༸གོང་ས་མཆོག་གི་སྐུ་དྲུང་དུ་ཁྲིད་ནས་ངོ་སྤྲོད་ཞུ་སྐབས། ༸གོང་ས་མཆོག་གིས་ཐུགས་དགྱེས་ཚོར་ཆེན་པོས་མཇལ་ཁ་སྩལ། དེ་རྗེས་གནམ་ཐང་ནས་བཞུགས་གནས་མགྲོན་ཁང་དུ་༸ཞབས་སོར་འཁོད་སྐབས་བོད་མི་ཚོས་གྲོ་སོ་ཕྱེ་མར་འདེགས་འབུལ་གྱི་ལམ་ནས་ཕེབས་བསུའི་སྣེ་ལེན་ཞུ་སྐབས་མགོན་པོ་གང་ཉིད་མཆོག་གིས་སྐུ་དྲུང་དུ་ཡོད་པ་སྐུ་ཞབས་རི་ཆ་ཌི་མོར་མཆོག་ལ་ཞལ་ཤོབ་དང་སྦྲགས། ནམ་མཁར་གྲོ་སོ་ཕྱེ་མར་གཏོར་གནང་གིས་བོད་པའི་སྲོལ་རྒྱུན་ངོ་སྤྲོད་མཛད།

སྐབས་དེར་གྲོང་ཁྱེར་སྤྱི་ཁྱབ་པ་ (Mayor of Derry) སྐུ་ཞབས་ཀེ་ཝིན་ཀེམ་བྷེལ་ (Kevin Campbell) མཆོག་གིས་མཛའ་བརྩེའི་མཚོན་རྟགས་ཤིག་ཕྱག་རྟགས་སུ་འབུལ་ལམ་ཞུས་ཏེ་ཕེབས་བསུའི་སྣེ་ལེན་གཟབ་རྒྱས་ཞུས་པ་མ་ཟད། ༸གོང་ས་མཆོག་གིས་ཀྱང་སྤྱི་ཁྱབ་པ་མཆོག་ལ་དཀར་གཙང་མཇལ་དར་གསོལ་རས་སྩལ་ཏེ་ཐུགས་དགྱེས་ཚོར་ཆེན་པོས་འཚམས་འདྲི་མཛད། ཕྱི་ཚེས་ ༡༨ ཉིན་༸གོང་ས་༸སྐྱབས་མགོན་ཆེན་པོ་མཆོག་དང་ཡི་ཤུའི་བླ་ཆེན་ཁག་གཅིག དེ་བཞིན་སྐུ་ཞབས་རི་ཆ་ཌི་མོར་བཅས་ཀྱིས་ཞི་བདེའི་ཟམ་པའི་ཐོག་ཆིབས་སྒྱུར་བསྐྱང་སྟེ་ཞི་བདེའི་ཟམ་པ་དབུ་འབྱེད་མཛད་རྒྱུ་ཡིན་འདུག སྐབས་དེར་ཟམ་པའི་སྟེང་སློབ་ཕྲུག་གཞོན་མང་དག་ཅིག་གིས་རུ་སྟར་སྒྲིག་ནས་ཕེབས་བསུ་ཞུ་རྒྱུ་ཡིན་འདུག་པ་བཅས།།