༢༠༡༣ ཟླ་ ༤ ཚེས་ ༡༧ རེས་གཟའ་ལྷག་པ།
༄༅། །༸གོང་ས་༸སྐྱབས་མགོན་ཆེན་པོ་མཆོག་ལ་སུད་སིའི་གྲོགས་ཚོགས་ཀྱིས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར། བཀའ་བཞེས་ཟབ་མོ་ཐོབ་སྟེ་ཕྱི་ལོ་ ༢༠༡༣ ཟླ་ ༤ ཚེས་ ༡༦ ཉིན་སུད་སི་གྲོས་ཚོགས་སུ་ཆིབས་སྒྱུར་བསྐྱངས་སྐབས་སུད་སི་གྲོས་ཚོགས་ཀྱི་ཚོགས་གཙོ་ལྕམ་སྐུ་མཱ་ཡཱ་གྷ་རབ་ (Maya Graf) མཆོག་གིས་ཕེབས་བསུ་གཟབ་རྒྱས་ཞུས་པ་དང་ལྷན་༸གོང་ས་མཆོག་ལ་གྲོས་ཚོགས་ཀྱི་ཚོགས་མི་རྣམ་པ་ངོ་སྤྲོད་ཞུས་ཡོད། སྐབས་དེར་སུད་སིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་ལ་ཕེབས་བསུའི་
སྣེ་ལེན་ཟབ་རྒྱས་ཞུས་ཡོད། དེ་ནས་༸གོང་ས་༸སྐྱབས་མགོན་ཆེན་པོ་མཆོག་གིས་ལོ་ངོ་ ༢༥ རིང་སུད་སི་གཞུང་ནས་བོད་དོན་ཆེད་རྒྱབ་སྐྱོར་གནང་དགོས་པའི་ལས་འགུལ་སྤེལ་མཁན་སུད་སི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ལ་བཀའ་སློབ་སྩལ་དོན། ངོས་རང་དེ་རིང་རྣམ་པ་ཚོར་སྐད་ཆ་ཤོད་རྒྱུའི་གོ་སྐབས་བྱུང་བར་ཧ་ཅང་ཆེ་མཐོང་ཐོབ་པ་ཞིག་བྱུང། ངོས་ཀྱིས་ཕྱི་ལོ་ ༡༩༥༢ ནས་བོད་ནང་མང་གཙོའི་བཅོས་བསྒྱུར་ཡོང་ཆེད་འབད་བརྩོན་བྱས་མཐར་ཕྱི་ལོ་ ༢༠༡༡ ལོར་བོད་མིའི་ཆབ་སྲིད་ཀྱི་འགན་དབང་ཡོངས་རྫོགས་མང་གཙོའི་ལམ་ནས་འོས་འདེམས་བྱུང་བའི་སྲིད་སྐྱོང་ལ་རྩིས་སྤྲོད་བྱས་ཡོད། བོད་དོན་རྒྱབ་སྐྱོར་གནང་བ་དེ་བདེན་པར་རྒྱབ་སྐྱོར་གནང་བ་ཞིག་ཆགས་ཡོད་པ་དང། བོད་དོན་འཐབ་རྩོད་ནི་འཚེ་མེད་ཞི་བའི་འཐབ་རྩོད་ཡིན།
ང་ཚོས་ཕྱི་ལོ་ ༡༩༦༠ སྐབས་འཛམ་གླིང་མཉམ་འབྲེལ་རྒྱལ་ཚོགས་ལ་ཞུ་གཏུག་གི་ལས་འགུལ་དེ་ལམ་ལྷོང་བྱུང་མེད། དེ་ནས་ང་ཚོས་སྔ་ཕྱིར་མ་གཏོགས་རྒྱ་ནག་དང་ཐད་ཀར་སྐད་ཆ་ཤོད་རྒྱུའི་གོ་སྐབས་འཆར་རྒྱུ་ཡིན་པ་ཕྱི་ལོ་ ༡༩༧༤ ལོར་ཐག་གཅོད་བྱུང་ཡོད། སྐབས་དེར་རིག་གནས་གསར་བརྗེ་འགྲོ་བཞིན་ཡོད། དེ་ནས་ཕྱི་ལོ་ ༡༩༧༩ ལོར་རྒྱ་མིས་ང་ཚོར་ཐད་ཀར་འབྲེལ་བ་བྱས་ནས། ཕྱི་ལོ་ ༡༩༨༠ སྐབས་ཧུ་ཡའོ་པང་ལྷ་སར་ཕེབས་ནས་བོད་མི་ཚོར་དགོངས་དག་ཞུས་ཡོད། འོན་ཀྱང་ཧུ་ཡའོ་པང་གོ་གནས་ནས་ཕབ་རྗེས་དང་ལྷག་པར་གནམ་བདེ་སྒོ་མོའི་ཐང་ཆེན་དུ་སློབ་ཕྲུག་ཚོས་མང་གཙོའི་ལས་འགུལ་སྤེལ་རྗེས་རྒྱ་ནག་གཞུང་གིས་བོད་མིའི་ཐོག་སྲིད་བྱུས་མཁྲེགས་སུ་བཏང་ཡོད། རྒྱ་ནག་དང་ལྷན་གྲོས་མོལ་བྱ་རྒྱུའི་འབྲེལ་བ་དེ་བཞིན་ཕྱི་ལོ་ ༢༠༡༠ ལོ་ནས་མཚམས་ཆད་ཡོད་ཀྱང་། དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་ཤུགས་ཆེ་རུ་འགྲོ་བཞིན་ཡོད་པ་མ་ཟད། རྒྱ་རིགས་རྩོམ་པ་པོ་དང། མཁས་དབང་ཁྲོད་རྒྱབ་སྐྱོར་ཤུགས་ཆེ་རུ་འགྲོ་བཞིན་ཡོད། ཅེས་སོགས་ཀྱི་བཀའ་སློབ་སྩལ་གྲུབ་མཚམས་གསར་འགོད་པ་ཁག་གཅིག་ལ་བཀའ་སློབ་སྩལ་ཡོད་པ་བཅས།།
