༢༠༡༣ ཟླ་ ༤ ཚེས་ ༢༦ རེས་གཟའ་པ་སངས།
༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་ནས་ཕྱི་ལོ་ ༢༠༡༣ ཟླ་ ༤ ཚེས་ ༢༦ ཉིན་བཏང་གནས་ནང་འཁོད་དོན། ཐེ་ཝན་ནང་སྐབས་བརྒྱད་པའི་གཞོན་སྐྱེས་འགོ་ཁྲིད་ཀྱི་སྦྱོང་བརྡར་ཏེ་རྒྱ་ནག་མང་གཙོ་ཅན་ཏུ་གྱུར་རྒྱུ་ཞེས་པའི་རྒྱལ་སྤྱིའི་བགྲོ་གླེང་ཚོགས་འདུར་རྒྱ་གར་ནས་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་། ཕྱི་དྲིལ་དྲུང་ཆེ་བཀྲ་ཤིས་ཕུན་ཚོགས་ལགས། བོད་ཀྱི་སྲིད་བྱུས་ཉམས་ཞིབ་ཁང་གི་དྲུང་འཕར་འཕགས་པ་ཚེ་རིང་ལགས་བཅས་མགྲོན་འབོད་གནང་བ་ལྟར། ཕྱི་ཚེས་ ༢༦ ཉིན་གྱི་སྔ་དྲོར་ཐེ་ཝན་སྐུ་ཚབ་དོན་གཅོད་ཟླ་བ་ཚེ་རིང་ལགས་དང་། ཐེ་ཝན་བོད་རིགས་ཚོགས་པའི་ཚོགས་གཙོ། ས་གནས་གཞོན་ནུའི་ཚོགས་གཙོ། བོད་རིགས་ཚོགས་པ་དང་གཞོན་ནུའི་སློབ་སྟོན་པ། ཐེ་ཝན་བོད་རྒྱ་མཐུན་ཚོགས་ཀྱི་ཚོགས་གཙོ་སོགས་གནམ་གྲུ་ཐང་དུ་ཕེབས་བསུར་བཅར་ཡོད། ཚོགས་འདུ་གོ་སྒྲིག་གནང་མཁན་གྱིས་ཕྱི་དྲོ་ཆུ་ཚོད་ ༢ པར་གསར་འགོད་ལྷན་ཚོགས་གོ་སྒྲིག་འོག་གཙོ་བོའི་སྐུ་མགྲོན་གྲས་སུ་བོད་མི་མང་སྤྱི་འཐུས་ཚོགས་གཙོ་མཆོག་དང་། ཕྱི་འབྲེལ་དྲུང་ཆེ་རྣམ་གཉིས་ལྷན་ཞུགས་གནང་སྟེ་བོད་གཞུང་གི་ལངས་ཕྱོགས་དང་། བོད་ནང་གི་ད་ལྟའི་ཛ་དྲག་གནས་སྟངས། བོད་མིས་རང་ལུས་མེར་སྲེག་སྐོར་ངོ་སྤྲོད་གནང་བ་མ་ཟད། གསར་འགོད་པའི་བོད་དང་འབྲེལ་བའི་འདྲི་བ་སྟེ། བོད་རྒྱ་ཞི་མོལ་དང་ད་ལྟའི་གནས་སྟངས། རང་ལུས་མེར་སྲེག་སྐོར་སོགས་ལ་ལན་འདེབས་གསལ་བཤད་གནང་ཡོད། ཕྱི་ཚེས་ ༢༧ ནས་ ༣༠ བར་གྱི་ཚོགས་ཆེན་ཐོག་མཉམ་ཞུགས་དང་། ཚོགས་ཐོག་བོད་དོན་ངོ་སྤྲོད་ཀྱི་གསུང་བཤད་གནང་རྒྱུ་ཡིན་པ་རེད། གོ་སྒྲིག་ཚོགས་ཆུང་ནས་ཐེངས་འདིར་ཨ་རི་དང་། ཉི་ཧོང་། ཨོ་སི་ཀྲི་ལི་ཡ། ཐེ་ལན་ཌ། སིང་གྷ་པུར། ཁེ་ཎ་ཌ། མ་ལེ་ཤི་ཡ། རྒྱ་ནག་སྐམ་ས། ཧོང་ཀོང་། ཨོ་མེན་སོགས་ཡུལ་གྲུ་འདྲ་མིན་ནས་རྒྱ་མི་རིགས་གཙོས་པའི་མི་རིགས་འདྲ་མིན་གྱི་མི་གྲངས་དྲུག་ཅུ་བརྒལ་བ་གདན་ཞུ་གནང་ཡོད་པ་དང་། ཐེ་ཝན་ཁུལ་ནས་མི་གྲངས་བཞི་བཅུ་ལྷག་མཉམ་ཞུགས་གནང་རྒྱུ་ཡིན་འདུག ཐེ་ཝན་ནང་སློབ་སྦྱོང་བྱེད་བཞིན་པའི་རྒྱ་ནག་སྐམ་སའི་སློབ་ཕྲུག་མང་པོ་ཞིག་མཉམ་ཞུགས་གནང་གི་ཡོད་སྐོར་ངོ་སྤྲོད་གནང་། གོང་གསལ་ཚོགས་ཆེན་གྲུབ་རྗེས་ཐེ་ཝན་སྐུ་ཚབ་དོན་གཅོད་ནས་གོ་སྒྲིག་གིས་རང་གཞུང་གི་མཛད་གཙོ་རྣམ་པས་ཐེ་ཝན་གཞུང་མང་གི་གནད་ཡོད་མི་སྣ་ཁག་གཅིག་དང་མཇལ་འཕྲད་གནང་རྒྱུ་ཡིན་འདུག
