༢༠༡༣ ཟླ་ ༤ ཚེས་ ༡༥ རེས་གཟའ་ཟླ་བ།

༄༅། །ཕྱི་ལོ་ ༢༠༡༣ ཟླ་ ༤ ཚེས་ ༡༨ ཉིན་སྲིད་སྐྱོང་བློ་བཟང་སེང་གེ་མཆོག་ཕ་རན་སིའི་རྒྱལ་ས་པེ་རི་སི་ནང་ཕེབས་རྒྱུ་ཡིན་པར་བརྟེན། གོ་སྐབས་དེ་དང་བསྟུན་ནས་ཕ་རན་སིའི་ཕྱི་སྲིད་བློན་ཆེན་མཆོག་གིས་མཇལ་འཕྲད་གནང་དགོས་པའི་འབོད་སྐུལ་ཞུས་ཡོད། དེ་ཡང་ཕ་རན་སིའི་རྒྱལ་ཡོངས་གྲོས་ཚོགས་ཀྱི་ (National Assembly) ཚོགས་གཞོན་སྐུ་ཞབས་ཇིན་པེ་ཊིཀ་གྷིལ་ (Mr. Jean-Patrick Gill) མཆོག་གིས་ཕྱི་ལོ་ ༢༠༡༣ ཟླ་ ༤ ཚེས་ ༡༥ ཉིན་ཕ་རན་སིའི་ཕྱི་སྲིད་བློན་ཆེན་མཆོག་ལ་འབོད་སྐུལ་གྱི་ཞུ་སྙན་ཞིག་ཕུལ་བའི་ནང་འཁོད་དོན། བོད་ནང་དུ་རང་ལུས་མེར་སྲེག་བསྟུད་མར་འཐོན་བཞིན་པའི་གནས་སྟངས་ཧ་ཅང་ཛ་དྲག་ཆེ་བའི་དུས་སྐབས་འདིར། སྐུ་ཉིད་མཆོག་གིས་བོད་མིའི་སྲིད་སྐྱོང་མཆོག་དང་མཇལ་འཕྲད་གནང་རྒྱུ་དུས་ཀྱི་དགོས་མཁོ་ཞིག་ཆགས་ཡོད། ཅེས་འཁོད་ཡོད་པ་མ་ཟད།

ཕ་རན་སིའི་བོད་དོན་རྒྱབ་སྐྱོར་ཚོགས་པས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ཕ་རན་སིའི་རྒྱལ་ཡོངས་ (National Assembly) ནང་གདན་ཞུ་གནང་རྒྱུ་ཡིན་པ་འཁོད་དོན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་ད་ཆ་བོད་མིའི་ཆབ་སྲིད་ཀྱི་སྐུ་དབང་ཡོངས་རྫོགས་མང་གཙོའི་ལམ་ནས་འོས་འདེམས་བྱས་པའི་དབུ་ཁྲིད་ལ་རྩིས་སྤྲོད་མཛད་ཟིན། ཞེས་འཁོད་ཡོད། སྐུ་ཞབས་ཇིན་པེ་ཊིཀ་གྷིལ་ (Mr. Jean-Patrick Gill) མཆོག་ནི་ཕ་རན་སིའི་གྲོས་ཚོགས་འོག་མའི་ཚོགས་གཞོན་(French Lower House) ཡིན་འདུག་པ་བཅས།།