༢༠༡༣ ཟླ་ ༤ ཚེས་ ༢༩ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ཟླ་ ༤ ཚེས་ ༢༨ རེས་གཟའ་ཉི་མའི་ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་ཞུགས་ཐོག སྲིད་སྐྱོང་བློ་བཟང་སེང་གེ་མཆོག་གིས་གཙོས་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ། གཞན་ཡང་བཀའ་ཁྲི་ཟུར་པ་མཁས་དབང་ཟམ་གདོང་རིན་པོ་ཆེ་མཆོག་གིས་གཙོས་ཌལ་ཧོར་གཏན་སློབ་ཀྱི་དགེ་ལས་རྣམས་དང་སློབ་ཟུར་རྣམ་པ།
དེ་བཞིན་ས་གནས་འཐུས་ཚོགས་དང་ས་གནས་འགོ་འཛིན། སློབ་སྤྱི་དང་གྲོང་སྡེ་ལྷན་ཚོགས་ཀྱི་ཚོགས་གཙོ། སློབ་ཕྲུག་དང་བོད་རིགས་གཙོ་བོར་གྱུར་བའི་ཧི་མཱ་ལའི་རི་བརྒྱུས་ཀྱི་དད་ལྡན་སེར་སྐྱ་མང་ཚོགས། དེ་བཞིན་རྒྱ་གར་ཡུལ་མི་བཅས་ཚང་འཛོམས་ཐོག་ཌལ་ཧོར་གཏན་སློབ་དེ་བཞིན་ཐོག་མར་ཕྱི་ལོ་ ༡༩༦༣ ལོར་དབུ་བརྙེས་ནས་མི་ལོ་ཧྲིལ་པོ་ལྔ་བཅུ་འཁོར་བའི་དུས་དྲན་མཛད་སྒོ་སྲུང་བརྩི་ཞུ་སྐབས་སྲིད་སྐྱོང་བློ་བཟང་སེང་གེ་མཆོག་གིས་ཌལ་ཧོར་གཏན་སློབ་ཀྱི་དགེ་ལས་རྣམས་དང་དམིགས་བསལ་རྒྱ་གར་སྐུ་མགྲོན་རྣམ་པར་གསུང་བཤད་གནང་དོན།
དེ་རིང་ངས་བོད་མིའི་སྒྲིག་འཛུགས་ཀྱི་སྐབས་བཅུ་བཞི་པའི་བཀའ་ཤག་གི་ཚབ་ཞུས་ཏེ་ཌལ་ཧོར་གཏན་སློབ་དབུ་བརྙེས་ནས་མི་ལོ་ཧྲིལ་པོ་ལྔ་བཅུ་འཁོར་བའི་དུས་དྲན་སྲུ༜ང་བརྩི་ཞུ་བའི་མཛད་སྒོའི་ཐོག་རྣམ་པ་ཚོར་དགའ་བསུའི་འཚམ་འདྲི་ཞུ་རྒྱུ་ཡིན། ལོ་ངོ་ལྔ་བཅུ་ནི་དུས་ཡུན་རིང་པོ་ཞིག་ཡིན། དུས་ཡུན་དེ་རིང་རྒྱ་གར་གཞུང་མང་གཉིས་ཀྱིས་འབད་བརྩོན་ལྷོད་མེད་ཐོག་བོད་མིའི་ཤེས་ཡོན་ཐོག་མཐུན་འགྱུར་རོགས་རམ་གནང་ཡོད། རོགས་རམ་དེ་དག་ལ་རྟེན་ནས་ད་ཆ་བཙན་བྱོལ་བོད་མིའི་གནས་སྟངས་འདི་ལྟ་བུ་ཞིག་ཆགས་ཐུབ་ཡོད།
ཕྱི་ལོ་ ༡༩༥༩ ལོར་རྒྱ་ནང་མི་དམངས་བཅིང་བཀྲོལ་དམག་ཟེར་བས་བོད་ནང་བཙན་འཛུལ་བྱེད་སྐབས་༸གོང་ས་༸སྐྱབས་མགོན་ཆེན་པོ་མཆོག་གིས་དབུ་ཁྲིད་དེ་བོད་མི་སྟོང་ཁྲག་བརྒལ་བ་རྒྱ་གར་དུ་བཙན་བྱོལ་ལ་ཕེབས་ཏེ། སྐྱབས་བཅོལ་ཞུ་དགོས་པ་ཆགས་ཡོད། སྐབས་དེར་རྒྱ་གར་དབུ་ཁྲིད་ཚོ་དང་མི་མང་ཚོས་བོད་མི་སྐྱབས་བཅོལ་བ་ཚོར་བྱམས་བརྩེའི་གཟིགས་སྐྱོང་གནང་སྟེ། རྒྱ་གར་ས་གནས་འདྲ་མིན་ནང་བོད་མི་དེ་དག་གཞིས་འཁོད་བཅུག་སྟེ་མཐུན་འགྱུར་ཧ་ཅང་བཀའ་དྲིན་ཆེ་བ་གནང་ཁོངས་ཌལ་ཧོར་འདི་ཡང་གཅིག་ཆགས་ཡོད། ཕྱོགས་མཚུངས་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་སྲིད་བློན་པན་ཌི་ཏ་ནེ་ཧེ་རུ་མཆོག་དང་མཇལ་འཕྲད་མཛད་དེ་བོད་ཕྲུག་ཚོའི་ཤེས་ཡོན་ཐོག་མཐུན་འགྱུར་གནང་རྒྱུའི་འབོད་སྐུལ་མཛད་སྐབས། སྲིད་བློན་མཆོག་ནས་བོད་མིའི་འཐབ་རྩོད་གསོན་པོར་གནས་དགོས་ན། བོད་ཕྲུག་ཚོར་ཤེས་ཡོན་ཡག་པོ་སྤྲོད་དགོས་པའི་ལམ་སྟོན་ཞུས་པ་ལྟར། མགོན་པོ་གང་ཉིད་མཆོག་ནས་ཀྱང་སྐབས་དེར་བོད་ཕྲུག་ཚོར་དེང་དུས་ཀྱི་ཤེས་ཡོན་རྐྱང་པ་ཙམ་མིན་པར་བོད་མི་རིགས་ཀྱི་ཐུན་མིན་ཆོས་དང་རིག་གཞུང་ལ་གཞི་བཅོལ་བའི་གནའ་བོའི་སྲོལ་རྒྱུན་གྱི་ཤེས་ཡོན་ཟུང་འབྲེལ་ཐོག་ནས་འགྲོ་རྒྱུ་ཧ་ཅང་གལ་ཆེ་ཡིན་པ་དགོངས་པར་འཁྲུངས་ཡོད།
དེར་བརྟེན་༸གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་ལམ་སྟོན་ཉག་གཅིག་འོག་རྒྱ་གར་དབུས་གཞུང་གི་མཐུན་འགྱུར་འོག་བོད་མིའི་སློབ་གྲྭ་འགའ་ཤས་གསར་འཛུགས་མཛད་ཐུབ་པ་བྱུང་ཡོད། དེ་ནས་རིམ་བཞིན་དབུས་བོད་སློབ་འཛིན་ཚོགས་ཀྱི་སློབ་གྲྭ་ཁག་གི་ནང་སློབ་སྤྱི་དང་རེག་ཊར། དགེ་ཆེ། དེ་བཞིན་སློབ་དགེ་དང་ལས་བྱེད་སོགས་ཀྱིས་འབད་བརྩོན་བསྟུད་མར་གནང་སྟེ། ཤེས་ཡོན་ཙམ་མིན་པར་བོད་པའི་སློབ་ཕྲུག་ཚོར་ཡ་རབས་བཟང་སྤྱོད་ཀྱི་སློབ་གསོ་སྤྲད་དེ་མི་ཚད་ལྡན་ཞིག་བསྐྲུན་རྒྱུར་ཕན་ཐོགས་ཧ་ཅང་ཆེན་པོ་གནང་ཡོད། དཔེར་ན། ད་ཆ་བཙན་བྱོལ་བོད་མིའི་སྤྱི་ཚོགས་ཁྲོད་ཡི་གེ་འབྲི་ཀློག་ཤེས་མཁན་གྱི་བརྒྱ་ཆ་ ༨༤ ཆགས་ཡོད། བོད་ནང་དུ་བོད་མི་ཡི་གེ་འབྲི་ཀློག་ཤེས་མཁན་བརྒྱ་ཆ་ལྔ་བཅུ་ཙམ་ཡིན། དེར་བརྟེན་རྒྱ་གར་གཞུང་མང་གཉིས་ཀྱི་བོད་མི་ཚོར་ཇི་ཙམ་བཀའ་དྲིན་ཆེན་པོ་ཡིན་པ་གསལ་པོ་མཚོན་ཐུབ། རྒྱ་གར་དུ་སྐྱབས་བཅོལ་བོད་མི་ཚོའི་ཡེ་གེ་འབྲི་ཀློག་གི་ཤེས་ཚད་དེ་རྒྱ་ནག་གཞུང་གིས་བཙན་བཟུང་བྱས་པའི་བོད་ནང་དུ་ཡོད་པའི་བོད་མི་ཚོ་ལས་མཐོ་བ་ཆགས་ཡོད།
ཕྱོགས་མཚུངས་བོད་ནང་དུ་རྒྱ་ནག་གཞུང་གིས་བོད་ཕྲུག་ཚོ་རྒྱ་རིགས་སུ་འགྱུར་ཐབས་ཆེད་རྒྱ་སྐད་གཙོ་བོ་སློབ་བཞིན་ཡོད། འོན་ཀྱང་རྒྱ་གར་ནང་བོད་པའི་སློབ་གྲྭ་ཁག་གི་ནང་བོད་ཀྱི་སྐད་ཡིག་སློབ་བཞིན་ཡོད་པ་མ་ཟད། གཞི་རིམ་འོག་མའི་ནང་སློབ་ཁྲིད་བརྒྱུད་ལམ་དེ་བཞིན་བོད་ཀྱི་སྐད་ཡིག་དང་བོད་མི་རིགས་ཀྱི་ཐུན་མིན་རིག་གཞུང་གཞི་རྩར་འཛིན་ནས། དེང་དུས་ཤེས་ཡོན་སྤྲོད་ཐབས་བྱེད་བཞིན་ཡོད། ངས་རྒྱ་གར་དབུས་གཞུང་གི་མིའི་མཐུན་སྐྱེན་ཡར་རྒྱས་བློན་ཆེན་ལས་ཁུངས་ཀྱི་བློན་ཆེན་སྐུ་ཞབས་ཀ་སྦིལ་སི་བྷལ་མཆོག་དང་མཇལ་ནས། རྒྱ་གར་གཞུང་གིས་བོད་མིའི་སློབ་ཕྲུག་ཚོའི་ཤེས་ཡོན་ཆེད་མཐུན་རྒྱུར་རོགས་རམ་གནང་བའི་གྲུབ་འབྲས་རྣམས་ཞུ་རྒྱུའི་གོ་སྐབས་བྱུང། དབུས་བོད་སློབ་འཛིན་ཚོགས་ཀྱི་མཐུན་འགྱུར་འོག་ཤེས་ཡོན་གོ་སྐབས་ཐོབ་ནས་ད་ཆ་བཙན་བྱོལ་བོད་མིའི་སྤྱི་ཚོགས་ཁྲོད་ཞབས་ཞུ་བསྒྲུབ་མཁན། དཔེར་ན། བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་པ་ཆེ་བ་མཆོག་དང། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག དེ་བཞིན་ཕྲན་རང་ཉིད་དང་བཅས་ཡིན།
ཕྱོགས་མཚུངས་ཌལ་ཧོར་གཏན་སློབ་ནས་ཐོན་པའི་སློབ་ཟུར་ཁྲོད་ཆ་བཞག་ན། བོད་མིའི་སྒྲིག་འཛུགས་ཀྱི་ལས་ཁུངས་ཆེ་ཕྲ་ཆུང་གསུམ་ནང་ཞབས་ཕྱི་ཞུས་དང་ཞུ་མུད་ཡིན་པ་མ་ཟད། འཛམ་གླིང་ས་ཕྱོགས་གང་སར་བོད་མིའི་སྤྱི་ཚོགས་དང་ཆོས་དང་རིག་གཞུང་ལ་སྨན་པའི་ཞབས་ཕྱི་ཞུས་དང་ཞུ་མུས་ཡིན། ངས་བཀའ་བློན་ལས་རོགས་ཐོག་མར་བསྐོ་བཞག་ཁོང་ནས་བཀའ་ལོན་གསུམ་སློབ་གྲྭ་འདི་ནས་ཐོན་ཡོད། ལར་ནས་ཤེས་ཡོན་གཅིག་པུས་མི་ཚན་ཉིད་ཚང་བ་ཞིག་བསྐྲུན་མི་ཐུབ། ཤེས་ཡོན་དང་ལྷན་མིའི་བསམ་བློའི་རིན་ཐང་གོང་མཐོར་གཏོང་རྒྱུ་ཧ་ཅང་གལ་ཆེན་པོ་ཆགས་ཡོད། དེར་བརྟེན་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་ལམ་སྟོན་སྩལ་བའི་ནང། དེང་དུས་ཀྱི་ཤེས་ཡོན་ཐོག་མིའི་བསམ་བློའི་རིན་ཐང་གོང་མཐོར་བཏང་སྟེ། མི་བཟང་པོ་ཞིག་བསྐྲུན་ཐབས་དགོས་རྒྱུ་དུས་ཀྱི་ཛ་དྲག་གི་དགོས་མཁོ་ཞིག་ཆགས་ཡོད་སྐོར་བཀའ་སློབ་མཛད་ཡོད། དེར་བརྟེན་བཀའ་ཤག་སྐབས་བཅུ་བཞི་པས་ཀྱང་༸གོང་ས་མཆོག་གི་བཀའ་སློབ་སྙིང་བཅངས་ཀྱིས་འབད་བརྩོན་རྒྱུན་འཁྱོངས་བྱ་རྒྱུར་ཆོད་སེམས་བརྟན་པོ་ཡོད།
སྤྱིར་བོད་ནང་དེང་སྐབས་གནས་སྟངས་ཧ་ཅང་ཛ་དྲག་འོག་ཡོད་ཀྱང། ཕྱི་ནང་བོད་མི་ཚོས་བོད་མི་རིགས་ཀྱི་ལ་རྒྱ་དང་སྙིང་སྟོབས་ཧ་ཅང་ཤུགས་ཆེན་པོར་གནས་ཡོད། ང་ཚོ་རྒྱ་གར་རང་དབང་ལུང་པའི་ནང་ཡོད་པར་བརྟེན་འཛམ་གླིང་ས་ཕྱོགས་གང་སར་སྤོབས་པ་ཆེན་པོའི་ཐོག་ནས་འགྲོ་བསྐྱོད་ཐུབ་པའི་རང་དབང་ཡོད། མཐའ་དོན་ངས་སླར་ཡང་རྒྱ་གར་གཞུང་མང་གཉིས་ཀྱིས་ད་བར་མཐུན་འགྱུར་རོགས་རམ་གནང་བར་ཐུགས་རྗེ་ཆེ་ཞུ་རྒྱུ་མ་ཟད། མཐུན་འགྱུར་རོགས་རམ་དེ་དག་གིས་གྲུབ་འབྲས་གཡུར་དུ་ཟ་བ་ཞིག་འཐོན་ངེས་ཡིན་ཞེས་ཞུ་རྒྱུ་ཡིན། བཀྲ་ཤིས་བདེ་ལེགས།།
