༢༠༡༣ ཟླ་ ༤ ཚེས་ ༥ རེས་གཟའ་པ་སངས།

༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཤར་ཡུ་རོབ་རྒྱལ་ཁབ་ཨེ་ཇར་བྷ་ཡེ་ཇན་(Azerbaijan) ནང་རྟེན་གཞི་བྱས་པའི་ནི་ཛ་མི་གྷན་ཇ་ཝི་རྒྱལ་སྤྱིའི་བསྟི་གནས་ཁང་ (Nizami Ganjavi International Centre) གིས་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ལས་དོན་ལ་བསྔགས་བརྗོད་ཀྱི་གསུང་འཕྲིན་སྩལ་འདུག
དེ་ཡང་འདི་ལོ་ལྷོ་ཀོ་ཀེ་ས་སི་གླེང་སྟེགས་ (South Caucasus Forum) ཞེས་པའི་རྒྱལ་སྤྱིའི་འགོ་ཁྲིད་རྣམ་པའི་ལྷ་ཚོགས་དེ་བཞིན་ཁ་ཆེའི་རྒྱལ་ཁབ་ཨེ་ཇར་བྷ་ཡེ་ཇན་ནང་རིང་མིན་ཕྱི་ཟླ་ལྔ་པའི་ནང་འཚོགས་འཆར་ཡོད་པ་དང་སྟབས་བསྟུན། ལྷན་ཚོགས་གོ་སྒྲིག་གནང་མཁན་དེ་བཞིན་ནི་ཛ་མི་གྷན་ཇ་ཝི་རྒྱལ་སྤྱིའི་བསྟི་གནས་ཁང་ལ་༸གོང་ས་༸སྐྱབས་མགོན་ཆེན་པོ་མཆོག་གིས་གླེང་སྟེགས་དེའི་ལྷན་ཚོགས་དང་འབྲེལ་བའི་གསུང་འཕྲིན་ཞིག་སྩལ་བའི་ནང་འཁོད་དོན། བསྟི་གནས་ཁང་དེ་ཉིད་ཀྱིས་འགྲོ་བ་མིའི་རང་དབང་གི་རྩོད་ལེན་སྤྱི་དང། ལྷག་པར་བུད་མེད་ཚོང་འགྲེམས་ཀྱི་ཁྲིམས་བརྒལ་བྱ་སྤྱོད་རིགས་ལ་གདོང་ལེན་གནང་གི་ཡོད་པ་ནི་ཧ་ལས་པའི་བྱ་བ་བཟང་པོ་ཞིག་ཡིན་པ་མ་ཟད། བྱ་གཞག་དེ་དག་སྤྱི་ཚོགས་ནང་མིག་དཔེ་ཆགས་ཀྱི་ཡོད་པས་བསྔགས་བརྗོད་མཛད་ཡོད། དེ་བཞིན་བསྟི་གནས་ཁང་དེའི་ངོས་ནས་ཨེ་ཇར་བྷ་ཡེ་ཇན་ལུང་པའི་ནང་སྙན་ངག་མཁན་དང་རིག་པ་སྨྲ་བ་རྣམས་ཀྱི་བྱ་གཞག་ལ་དོ་སྣང་ཟབ་མོའི་ཐོག་ཉམས་ཞིབ་གནང་བ་བརྒྱུད་འགྲོ་བ་མིའི་རང་དབང་ལ་ཕན་པ་སྒྲུབ་རྒྱུ་གལ་ཆེན་ཡིན་སྐོར་སོགས་ཀྱི་གསུང་འཕྲིན་སྩལ་འདུག

ཐེངས་འདིའི་ལྷན་ཚོགས་ཐོག་རྒྱལ་ཁབ་འདྲ་མིན་གྱི་འགོ་ཁྲིད་ ༢༠༠ ལྷག་གིས་མཉམ་ཞུགས་གནང་རྒྱུ་ཡིན་པ་མ་ཟད། ལྷན་ཚོགས་སྐབས་འགོ་ཁྲིད་རྣམས་ནས་འགྲོ་བ་མིའི་ཐོབ་ཐང་གི་རང་དབང་དང་འབྲེལ་བའི་སྤྱི་ཚོགས་ཀྱི་གནས་སྟངས་ཡར་རྒྱས་གཏོང་ཕྱོགས་སྐོར་གོ་བསྡུར་གནང་རྒྱུ་ཡིན་འདུག འདི་ལོའི་གོ་སྒྲིག་གནང་མཁན་ནི་ཨེ་ཇར་བྷ་ཡེ་ཇན་ལུང་པའི་ནང་ཡོད་པའི་གཞུང་འབྲེལ་མིན་པའི་ཚོགས་པ་ནི་ཛ་མི་གྷན་ཇ་ཝི་རྒྱལ་སྤྱིའི་བསྟི་གནས་ཁང་དང་ཁུལ་དེར་རྟེན་གཞི་བྱས་པའི་མེ་ཌི་རིཏ་ཀ་ལབ་(Club de Madrid )བཅས་ཟུང་སྦྲེལ་ཐོག་ཡིན་འདུག སྤྱིར་ནི་ཛ་མི་གྷན་ཇ་ཝི་ཞེས་པ་ནི་དེ་སྔ་དུས་རབས་ ༡༢ ཙམ་ནང་ཡུལ་དེའི་ཁ་ཆེའི་སྙན་ངག་མཁན་གྲགས་ཅན་ཞིག་ཡིན་པ་དང། ཁོང་གིས་བུད་མེད་འཚོང་རྒྱུའི་ཁྲིམས་བརྒལ་གྱི་བྱ་སྤྱོད་དེར་ངོ་རྒོལ་ཤུགས་ཆེ་གནང་སྟེ། བུད་མེད་ལ་རྒྱབ་སྐྱོར་ཤུགས་ཆེ་གནང་མཁན་ཞིག་ཡིན་འདུག