༢༠༡༣ ཟླ་ ༣ ཚེས་ ༡༣ རེས་གཟའ་ལྷག་པ།
༄༅། །ཨ་རིའི་གྲོས་ཚོགས་འཐུས་མི་ཁག་གཅིག་གིས་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༥༤ པར་རྒྱབ་སྐྱོར་གནང་སྟེ་རྒྱ་ནག་གཞུང་ལ། བོད་མི་ཚོར་ཁྲིམས་མཐུན་གྱི་ཐོབ་ཐང་སྤྲོད་དགོས་པའི་འབོད་སྐུལ་གྱི་གསལ་བསྒྲགས་སྤེལ་འདུག
དེ་ཡང་ཨ་རིའི་གྲོས་ཚོགས་ཀྱི་འཐུས་མི་སྐུ་ཚབ་ཇེམ་སི་པི་མཀ་གོ་ཝེ་རན་ལགས་ཀྱིས་ (James P. Mcgovern) སྤེལ་བའི་གསལ་བསྒྲགས་ནང་། ཨ་མི་རི་ཁ་དང་རྒྱལ་སྤྱིའི་སྤྱི་ཚོགས་ཀྱིས་བོད་ནང་གི་བོད་མི་ཚོ་རྒྱ་ནག་གཞུང་གི་དྲག་གནོན་འོག་དཀའ་སྡུག་མྱོང་བཞིན་པ་དེར་ཁ་ཁུ་སིམ་མུར་སྡོད་ཐབས་མེད་པར་ང་ཚོས་ངེས་པར་དུ་རྒྱ་ནག་གཞུང་གི་དྲག་གནོན་གྱི་སྲིད་བྱུས་མཚམས་འཇོག་ཡོང་ཐབས་བྱེད་དགོས་ཀྱི་རེད། ཅེས་གསུངས་ཡོད།
ཡང་གྲོས་ཚོགས་ཀྱི་འཐུས་མི་སྐུ་ཞབས་སི་ཊི་པན་ལགས་ཀྱིས་ (Stepen F. Lynch) ད་བར་རྒྱལ་སྤྱིའི་སྤྱི་ཚོགས་ཀྱིས་བོད་ནང་དུ་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་གི་ཡོད་པར་རྒྱ་ནག་གཞུང་ལ་སྐྱོན་བརྗོད་ཇི་ཙམ་བྱས་ཀྱང་མུ་མཐུད་ནས་ཇེ་སྡུག་ཏུ་བཏང་ཡོད་པར་བརྟེན། ད་ཆ་རྒྱ་ནག་གཞུང་གི་བྱ་སྤྱོད་དེ་དག་རང་སྣང་གང་ཤར་དུ་འཇོག་ཐབས་མེད། ཅེས་གསུངས་ཡོད།
དེ་ནས་གྲོས་ཚོགས་ཀྱི་འཐུས་མི་སྐུ་ཞབས་མེ་ཁལ་ལགས་ཀྱིས་ (Michael E. Capuano) རྒྱ་ནག་གཞུང་གིས་བོད་ལ་བཙན་འཛུལ་བྱས་པ་ནས་བོད་མིའི་ཐོག་དཀའ་སྡུག་དང༌། དམར་གསོད། རང་དབང་གི་ཆེད་དུ་བྲོས་བྱོལ་འགྲོ་དགོས་པའི་གནས་སྟངས། དྲག་གནོན་སོགས་མྱོང་བཞིན་ཡོད། བོད་ལ་རང་དབང་ཞིག་མ་ཐོབ་པའི་བར་དུ་མུ་མཐུད་ནས་བོད་དོན་ཐོག་རྒྱབ་སྐྱོར་བྱ་རྒྱུ་ཡིན།ཞེས་གསུངས་ཡོད།
ཡང་གྲོས་ཚོགས་ཀྱི་འཐུས་མི་ལྕམ་སྐུ་ནི་ཀོ་ལགས་ཀྱིས་ (Niki Tsongas) གསུང་དོན། ང་ཚོས་མུ་མཐུད་ནས་བོད་དོན་ཆེད་དུ་འབོད་སྒྲ་སྒྲོག་རྒྱུ་ཡིན་ལ། བོད་དོན་དཀའ་རྙོག་སེལ་ཐབས་ཀྱི་གྲོས་མོལ་བསྐྱར་གསོ་ཡོང་ཐབས་དང༌། བོད་ཀྱི་འགྲོ་བ་མིའི་ཐོབ་ཐང་སྲུང་སྐྱོབ། བོད་ཀྱི་ཆོས་དང་རིག་གཞུང། སྐད་ཡིག་སོགས་ལ་རྒྱ་ནག་གཞུང་ཕྱོགས་ནས་སྲུང་སྐྱོབ་ཡོང་ཐབས་ཀྱི་གནོན་ཤུགས་སྤྲོད་རྒྱུ་ཡིན། བོད་ནང་དུ་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བའི་བྱ་སྤྱོད་དེ་མཚམས་འཇོག་ཡོང་ཐབས་མཉམ་རུབ་ཀྱིས་ཕྱག་ལས་གནང་དགོས་སྐོར་སོགས་གསུངས།
དེ་བཞིན་གྲོས་ཚོགས་ཀྱི་འཐུས་མི་སྐུ་ཞབས་ཇོན་ལགས་དང་ (John F. Tieney) སྐུ་ཞབས་ཐེ་ཨོ་ཌོ་རི་ (Theodore C. Speliotis,) ལགས། སྐུ་ཞབས་མར་ཀི་ (Ed Markey) ལགས། སྐུ་ཞབས་ཝི་ལེམ་ (William R. Keating) ལགས་བཅས་ནས་གོང་གསལ་གྲོས་ཚོགས་ཀྱི་འཐུས་མི་རྣམས་དང་གཅིག་མཚུངས་བོད་མིའི་རང་དབང་སྒེར་ལངས་ཐེངས་ ༥༤ རྒྱབ་སྐྱོར་གྱི་གསལ་བསྒྲགས་སྤེལ་འདུག་པ་བཅས། །
