༢༠༡༣ ཟླ་ ༣ ཚེས་ ༢༦ རེས་གཟའ་མིག་དམར།
༄༅། །བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༣ ཟླ་ ༣ ཚེས་ ༢༥ ཉིན་ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ་བསང་ཆུ་རྫོང་སྐྱིད་ཚང་དམེ་ཤུལ་ཞང་གི་མདུན་དུ་ནགས་ཚལ་ཆེན་པོ་ཞིག་ཡོད་པ་དེའི་ནགས་འདབས་སུ། བོད་མི་རང་ལོ་ ༤༣ ལ་སོན་པ་ནགས་སྲུང་བ་ལྷ་མོ་སྐྱབས་ལགས་ཀྱིས། རྒྱ་ནག་གཞུང་ལ་ཞི་རྒོལ་ཆེད་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་འདུག ལྷ་མོ་སྐྱབས་ལགས་ཀྱིས་གོང་ཚེས་ཉིན་གྱི་སྔ་དྲོ་ནམ་མ་ལངས་གོང་ཤིང་ཆ་སྤུངས་པའི་ནང་ས་སྣུམ་བླུགས་རྗེས་དེའི་ཁྲོད་རང་གི་ལུས་མེར་སྲེག་བཏང་ཡོད་པ་སྔ་དྲོ་སྡེ་མི་ཚོས་ཤེས་སྐབས། ཤིང་ཆ་དང་ལྷ་མོ་སྐྱབས་ཀྱི་ཕུང་པོ་མེ་རོར་གྱུར་བ་མཐོང་བ་དང་། ལྷ་མོ་སྐྱབས་ཀྱི་མགོ་བོ་གཅིག་པུ་ལས་ལྷག་མེད་པ་རེད་འདུག
དེའི་རྗེས་ས་གནས་སྲིད་གཞུང་གི་རླངས་འཁོར་མང་པོ་འབྱོར་ཏེ་ལྷ་མོ་སྐྱབས་ལགས་ཀྱིས་རང་ལུས་མེར་སྲེག་བཏང་སའི་ས་གནས་མཐའ་བསྐོར་བ་མ་ཟད། ཉེན་རྟོག་པ་དང་དམག་མི་མང་པོ་ས་གནས་དེར་འཛོམས་ཏེ་རང་ལུས་མེར་སྲེག་གཏོང་ཡུལ་གྱི་ས་གནས་དེར་དམ་བསྒྲགས་བྱས་ཏེ་སྡེ་མི་ཚོ་ས་གནས་དེར་ཡོང་འཇུག་གི་མེད། ས་གནས་དེའི་བོད་མི་ཚོ་ཡར་མར་འགྲོ་བསྐྱོད་བྱ་རྒྱུར་བཀག་འགོག་གིས་དམ་བསྒྲགས་སྔར་ལས་ཆེ་བ་བྱེད་བཞིན་ཡོད་འདུག
རྒྱལ་གཅེས་པ་ལྷ་མོ་སྐྱབས་ལགས་ནི་རང་ལོ་ ༤༣ ཡིན་པ་དང་ཁོང་ནི་ཕོ་ཧྲེང་ཞིག་ཡིན་འདུག ཁོང་ལ་ནང་མི་དང་བུ་ཕྲུག་སོགས་གང་ཡང་མེད། ལྷ་མོ་སྐྱབས་ལགས་ནི་ཀླུ་ཤོད་ཡུལ་ཚོའི་ནན་པན་སྡེ་བའི་སྡེ་མདུན་དུ་ནགས་ཚལ་ཆེན་པོ་ཞིག་ཡོད་པ་དེའི་ནང་དུ་འཚོ་སྡོད་བྱེད་བཞིན་ཡོད་པ་དང་། ཁོང་ནི་ནགས་ཚལ་དེའི་ནགས་སྲུང་བ་ཡིན་འདུག ཁོང་སྐྱེས་ཡུལ་ནི་མདོ་སྨད་བླ་བྲང་ཀླུ་ཤོད་ཡུལ་ཚོའི་མཁར་དམར་ཤུལ་སྡེ་བ་ནས་ཡིན་འདུག་པ་བཅས།།
