༢༠༡༣ ཟླ་ ༣ ཚེས་ ༡༤ རེས་གཟའ་ཕུར་བུ།
༄༅། །འདི་གར་ཕྱི་ལོ་ ༢༠༡༣ ཟླ་ ༣ ཚེས་ ༡༤ ཉིན་ཁུངས་ལྡན་གནས་ཚུལ་འབྱོར་དོན་ལྟར་ན། ཕྱི་ཟླ་ ༣ ཚེས་༨ ཉིན་ཁམས་དཀར་མཛེས་བོད་རིགས་རང་སྐྱོང་ཁུལ། གསེར་རྟ་རྫོང་གནུབ་གཟུར་ཡུལ་ཚོའི་པདྨ་ལགས་ཆབ་སྲིད་ཀྱི་ལས་འགུལ་སྤེལ་བའི་ཉེས་མིང་འོག་རྒྱ་ནག་གཞུང་གིས་འཛིན་བཟུང་བཙན་ཁྲིད་བྱས་ཏེ་ད་ལྟའི་ཆར་ཁོང་གི་གནས་ཚུལ་གསལ་རྟོགས་མེད་པར་གྱུར་འདུག
ཕྱི་ལོ་ ༢༠༡༢ ཟླ་ ༡ ཚེས་ ༢༤ ཉིན་གསེར་རྟ་རྫོང་ཐོག་ཏུ་མི་མང་གིས་གཞུང་ལ་ཞི་བའི་ངོ་རྒོལ་གྱི་སྐད་འབོད་བྱས་པར་བརྟེན། རྒྱ་ནག་གིས་དྲག་གནོན་བྱས་ཏེ། མི་མང་པོར་རྨས་སྐྱོན་བཟོས་པ་མ་ཟད། གསེར་རྟ་རྫོང་ཤོ་རེབ་གྲོང་ཚོའི་ཟླ་བ་གྲགས་པ་ལགས་དམར་གསོད་བཏང་བའི་ཉིན་པདྨ་ལགས་ཀྱང་ལས་འགུལ་ནང་མཉམ་ཞུགས་བྱས་ཡོད་འདུག སྐབས་དེར་རྒྱ་ནག་གཞུང་གིས་མེ་མདའ་བརྒྱབ་སྟེ་ཁོང་གི་ལག་པར་རྨས་སྐྱོན་ཕོག་ཡོད་ནའང་། ཁོང་རི་སྒང་དུ་བྲོས་བྱོལ་དུ་སོང་ཡོད་འདུག བར་ལམ་རྒྱ་ནག་གཞུང་གིས་ནང་མིར་མགོ་བཏགས་ཞུས་ན་གུ་ཡངས་ཡོད་སྐོར་བརྗོད་འདུག
ཟླ་འདིའི་ཕྱི་ཚེས་ ༨ ཉིན་རྒྱ་གཞུང་གིས་ཁོང་འཛིན་བཟུང་བཙན་ཁྲིད་བྱས་པ་དང་། ད་ལྟ་འབྲེལ་ཡོད་ཀྱིས་གང་དུ་ཁྲིད་ཡོད་མེད་ཙམ་ཡང་ཤེས་རྟོགས་ཐུབ་ཀྱི་མེད། རང་ལོ་ ༢༢ ལ་སོན་པའི་པདྨ་ལགས་ནི་ཁམས་དཀར་མཛེས་ཁུལ། གསེར་རྟ་རྫོང་། གནུབ་ཟུར་ཡུལ་ཚོ། ཨ་སྐྱབས་སྡེ་པ་ནས་ཡིན་པ་དང་། ཕའི་མིང་ལ་ཏེ་པོ་དང་། མའི་མིང་ལ་ནོར་རྒྱུན་བརྗོད་ཀྱི་ཡོད་འདུག་པ་བཅས། །
