༢༠༡༣ ཟླ་ ༣ ཚེས་ ༤ རེས་གཟའ་ཟླ་བ།
༄༅། །བོད་རྒྱལ་ལོ་ ༢༡༤༠ ཕྱི་ལོ་ ༢༠༡༣ ཟླ་ ༣ ཚེས་ ༡༠ ཉིན་འདས་ལོ་ ༡༩༥༩ ལོར་བོད་ཀྱི་རྒྱལ་ས་ལྷ་སར་བོད་མི་སེར་སྐྱ་ཁྲི་སྟོང་མང་པོས་བོད་བསྟན་པ་ཆབ་སྲིད་ཀྱི་དོན་དུ་རྒྱ་ནག་བཙན་འཛུལ་པར་ཞི་བའི་སྒེར་ལངས་བྱས་ཏེ་མི་ལོ་ཧྲིལ་པོ་ ༥༤ འཁོར་བའི་དུས་དྲན་སྲུང་བརྩི་འཛམ་གླིང་ས་ཕྱོགས་གང་སར་གནས་པའི་བོད་མི་དང་བོད་དོན་རྒྱབ་སྐྱོར་བ་ཚོས་ཞུ་སྲོལ་ཡོད་པ་ལྟར། གོང་ཚེས་ཉིན་ཡུ་རོབ་ཁུལ་གྱི་བོད་མི་དང་བོད་དོན་རྒྱབ་སྐྱོར་བ་ལྔ་སྟོང་ལྷག་གིས་ཡུ་རོབ་ཀྱི་བསྟི་གནས་སྦེལ་ཇམ་རྒྱལ་སའི་ནང་གི་གྷལ་ནོ་ཞེས་པའི་ས་གནས་ནས་དབུ་འཛུགས་ཀྱིས་ལི་མོ་ཌེ་ཁརཀ་ཅེས་པའི་བར་ཞི་བའི་གོམ་བགྲོད་གནང་སྟེ་བོད་ནང་གི་བོད་མི་རྣམས་ལ་གདུང་སེམས་མཉམས་སྐྱེ་དང་བོད་ནང་གི་ཛ་དྲག་ཆེ་བའི་གནས་སྟངས། དེ་བཞིན་བོད་ནང་གི་བོད་མི་མང་དག་ཅིག་གིས་བོད་ཀྱི་བདེན་དོན་ཆེད་རང་ལུས་མེར་སྲེག་བཏང་བའི་གནས་སྟངས་སྐོར་ཡུ་རོབ་ཀྱི་མང་ཚོགས་ལ་གསལ་སྟོན་གནང་རྒྱུ་དང། ཕྱོགས་མཚུངས་བོད་མིའི་འཚེ་མེད་ཞི་བའི་འཐབ་རྩོད་ལ་ཡུ་རོབ་མཐུན་ཚོགས་ཀྱི་ཚོགས་མི་དང་རྒྱལ་ཁབ་ཁག་གི་རྒྱབ་སྐྱོར་སྔར་ལྷག་ཐོབ་ཐབས་གནང་རྒྱུ་ཡིན་འདུག དེ་ཉིན་མི་མང་འདུ་འཛོམས་སྐབས་གསུང་བཤད་གནང་མཁན་ཁོངས་སུ་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་དང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྤེན་པ་ཚེ་རིང་མཆོག ཡུ་རོབ་ཀྱི་དམིགས་བསལ་སྐུ་ཚབ་སྐལ་བཟང་རྒྱལ་མཚན་མཆོག བཀའ་ཟུར་ཀིརྟི་རིན་པོ་ཆེ་མཆོག སྦར་སེལ་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས། བོད་མི་མང་སྤྱི་འཐུས་ཆུང་བདག་ཀོན་རི་ལགས། བོད་མི་མང་སྤྱི་འཐུས་ཐུབ་བསྟན་དབང་ཆེན་ལགས། ཡུ་རོབ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་མཆོག་གིས་གཙོས་གནད་ཡོད་མི་སྣ་ཁག་གཅིག་གིས་གསུང་བཤད་གནང་རྒྱུ་ཡིན་འདུག་པ་བཅས། །
