༢༠༡༣ ཟླ་ ༣ ཚེས་ ༧ རེས་གཟའ་ཕུར་བུ།
༄༅། །ཕྱི་ལོ་ ༢༠༡༣ ཟླ་ ༣ ཚེས་ ༦ རེས་གཟའ་ལྷག་པའི་ཉིན་ཁལ་མུཀ་ (Kalmyk) ནང་པའི་གཙོ་འཛིན་ཏེ་ལོ་རིན་པོ་ཆེ་མཆོག་དང་ཀིརྟི་རིན་པོ་ཆེ་མཆོག་གིས་སུད་སི་གྲོང་ཁྱེར་ཇི་ནི་ཝར་འཚོགས་བཞིན་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༢༢ སྐབས། ཚོགས་ཆེན་གྱི་ཟུར་ཚོགས་ཤིག་ཏུ་རིན་པོ་ཆེ་རྣམ་གཉིས་ཆེད་ཕེབས་གནང་སྟེ། རྒྱ་ནག་མི་དམངས་སྤྱི་མཐུན་རྒྱལ་ཁབ་ནང་ཡོད་པའི་བོད་བརྒྱུད་ནང་བསྟན་འཚོ་རྒྱུར་འཕྲད་བཞིན་པའི་ཉེན་ཁ། ཞེས་པའི་བརྗོད་གཞིའི་ཐོག་གསུང་བཤད་གནང་ཡོད།
དེ་ཡང་ཏེ་ལོ་རིན་པོ་ཆེ་མཆོག་གིས་གསུང་དོན། བོད་བརྒྱུད་ནང་བསྟན་འཚོ་གནས་ཐུབ་རྒྱུ་དེ་བཞིན་བོད་མི་ཁོ་ནར་ཕན་གནོད་ཀྱི་འབྲེལ་བ་ཆགས་ཡོད་པའི་གནས་སྟངས་ཤིག་མིན་པར། འཛམ་གླིང་སྤྱིའི་བདེ་དོན་ལའང་ཕན་གནོད་དང་འབྲེལ་ཡོད། བོད་བརྒྱུད་ནང་བསྟན་སྲུང་སྐྱོབ་དགོས་ཞེས་བརྗོད་སྐབས་ནང་ཆོས་ཙམ་མིན་པར་ནང་པའི་ལྟ་གྲུབ་ཀྱི་རྣམ་གཞག་དང་ནང་པའི་ཚན་རིག་གི་རྣམ་གཞག་སོགས་ཀྱང་ཚུད་ཡོད། བོད་བརྒྱུད་ནང་བསྟན་ལ་འཆད་ཉན་ཡང་དག་པ་ཞིག་བྱེད་དགོས་ཚེ་བོད་སྐད་ཁོ་ནའི་ཐོག་ནས་སློབ་གཉེར་བྱེད་ཐུབ་པ་ཞིག་ཆགས་ཡོད་ཀྱང། དེང་སྐབས་རྒྱ་ནག་གཞུང་གིས་བོད་ཀྱི་སྐད་ཡིག་ཐོག་དམ་བསྒྲགས་བྱེད་བཞིན་ཡོད། ཅེས་གསུངས། སྤྱིར་རིན་པོ་ཆེ་མཆོག་ཨ་རིར་འཁྲུངས་པ་དང། ཁོང་གི་ཡབ་ཡུམ་གཉིས་ཁལ་མུཀ་སོག་པོའི་ཁྱིམ་ཚང་ཞིག་ནས་ཡིན་འདུག རིན་པོ་ཆེ་མཆོག་དགུང་གྲངས་ ༧ ལ་སོན་སྐབས་རྒྱ་གར་ལྷོ་ཕྱོགས་དཔལ་ལྡན་འབྲས་སྤུངས་སྒོ་མང་གྲྭ་ཚང་དུ་ཆོས་བཞུགས་ཀྱིས་གཞུང་ལུགས་རབ་འབྱམས་ལ་སློབ་གཉེར་གནང་ཡོད།
ཕྱོགས་མཚུངས་འཕགས་ཡུལ་ཀིརྟི་བྱེས་པ་གྲྭ་ཚང་གི་དབུ་བླ་བཀའ་ཟུར་ཀིརྟི་རིན་པོ་ཆེ་མཆོག་དང་པོ་ལེན་ཌིའི་ (Poland) འགྲོ་བ་མིའི་ཐོབ་ཐང་སྲུང་སྐྱོབ་ཐེབས་རྩའི་ (Helsinki Foundation for Human Rights) སྐུ་ཚབ་སྐུ་ཞབས་ཨེ་ཌེམ་ཀོ་ཛེལ་ (Mr. Adam Koziel) མཆོག དེ་བཞིན་རྒྱལ་སྤྱིའི་འགྲོ་བ་མིའི་ཐོབ་ཐང་རྟོག་ཞིབ་ཚོགས་ཚུང་གི་སྐུ་ཚབ་ལྕམ་སྐུ་སོ་ཕི་རི་ཆ་ཌི་སན་ (Ms. Sophie Richardson) མཆོག་བཅས་ཀྱང་མཉམ་ཞུགས་ཀྱིས་བོད་དོན་གསུང་བཤད་གནང་ཡོད། སྐབས་དེར་ཀིརྟི་རིན་པོ་ཆེ་མཆོག་གིས་ལྷན་ཚོགས་སུ་ཕེབས་པའི་རྒྱ་ནག་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་འཐུས་མི་རྣམས་ལ་འཚམས་འདྲི་ཞུས་པ་དང་སྦྲགས་གསུང་དོན། རྒྱ་མི་རིགས་ནི་ལོ་ངོ་བརྒྱ་ཕྲག་རིང་ནས་ང་ཚོའི་ཁྱིམ་མཚེས་སུ་གནས་པར་བརྟེན། ང་ཚོས་རྒྱ་མི་རིགས་ལ་ཆོས་གྲོགས་ཀྱི་འདུ་ཤེས་འཛིན་བཞིན་ཡོད། ལྷག་པར་རྒྱ་མི་རིགས་ཁྲོད་དུའང་བོད་བརྒྱུད་ནང་བསྟན་ཉམས་ལེན་གནང་མཁན་གང་ཙམ་ཡོད། འོན་ཀྱང་ད་ལྟའི་རྒྱ་ནག་དམར་པོའི་སྲིད་གཞུང་གིས་བོད་མིའི་ཆོས་དང་རིག་གཞུང་ལ་ཁྱད་གསོད་ཀྱིས་བོད་མིའི་ཐོག་གདུག་རྩུབ་དང་དམ་བསྒྲགས་ཧ་ཅང་ཆེ་བའི་སྲིད་བྱུས་འཛིན་བཞིན་པ་དེར་ང་ཚོས་མཐའ་གཅིག་ཏུ་ངོ་རྒོལ་བྱེད་བཞིན་ཡོད། བོད་པའི་དགོན་པ་གྲྭ་ཚང་དེ་དག་ཡུལ་སྐོར་སྤྲོ་འཆམ་བྱེད་སའི་འགྲེམས་སྟོན་ཁང་ཞིག་རྩ་བ་ནས་མིན། རྒྱ་ནག་གཞུང་གིས་དེང་སྐབས་བོད་པའི་ཆོས་བྱེད་དགོན་སྡེ་ཁག་གི་ནང་དགེ་འདུན་པའི་གྲངས་ཚད་ངེས་ཅན་ཁྲིམས་བཅད་བཟོས་ཏེ་དམ་བསྒྲགས་བྱེད་བཞིན་ཡོད། དགོན་པ་གྲྭ་ཚང་ནང་སློབ་གཉེར་གནང་མཁན་དགེ་འདུན་པར་དམ་བསྒྲགས་བྱས་ཚེ་བོད་བརྒྱུད་ནང་བསྟན་གྱི་མདུན་ལམ་ལ་རེ་བ་གང་ཡང་མེད། རྒྱ་ནག་གཞུང་གིས་རྒྱལ་སྤྱིའི་སྒྲིག་འཛུགས་འདྲ་མིན་ནང་འཛུལ་ཞུགས་བྱས་ཡོད།
དེར་བརྟེན་སྒྲིག་འཛུགས་དེ་དག་གིས་བསྟན་ལ་ཕབ་པའི་སྒྲིག་ཁྲིམས་ལ་བརྩི་བཀུར་ཞུ་དགོས་པ་ལས་འགྲོ་བ་མིའི་ཐོབ་ཐང་དང་མང་གཙོའི་རིན་ཐང་ཐོག་རྒྱ་ནག་རང་ཉིད་ཀྱི་འདོད་དབང་གིས་འགྲེལ་བཤད་བརྒྱབ་སྟེ་ཕྱིན་ན་འགྲིག་ཐབས་རྩ་བ་ནས་མེད། ཅེས་སོགས་ཀྱི་གསུང་བཤད་གནང་ཡོད།
གཞན་ཡང་སྐབས་དེར་རྒྱལ་སྤྱིའི་འགྲོ་བ་མིའི་ཐོབ་ཐང་རྟོག་ཞིབ་ཚོགས་ཚུང་གི་སྐུ་ཚབ་ལྕམ་སྐུ་སོ་ཕི་རི་ཆ་ཌི་སན་ (Ms. Sophie Richardson) མཆོག་གིས་གསུང་དོན། རྒྱ་ནག་གཞུང་ནས་བོད་མི་རང་ལུས་མེར་སྲེག་གཏོང་མཁན་ཚོར་ཕྱི་ཕྱོགས་སུ་གནས་པའི་བོད་མི་ཚོས་བརྒྱུད་སྐུལ་བྱེད་ཚུལ་བཤད་ཀྱང་ད་བར་ཁུངས་སྐྱེལ་ར་སྤྲོད་ཆེད་དཔང་རྟགས་གང་ཡང་སྟོན་རྒྱུ་མེད། ཅེས་སོགས་ཀྱི་གསུང་བཤད་གནང་ཡོད་པ་བཅས།།
