༢༠༡༣ ཟླ་ ༣ ཚེས་ ༢༦ རེས་གཟའ་མིག་དམར།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༣ ཟླ་ ༣ ཚེས་ ༢༥ ཉིན་འབྲས་ལྗོངས་མངའ་སྡེའི་གཞུང་གིས་ར་ཝང་ལ་ས་གནས་སུ་གསར་བཞེངས་གནང་བའི་མཐོ་ཚད་ཕི་ཊི་ ༡༣༥ ལྡན་པའི་སྟོན་པའི་སྐུ་བརྙན་ལ་དཔལ་ཆེན་རྡོ་རྗེ་གཞོན་ནུའི་སྒོ་ནས་རབ་གནས་དང་དེའི་མཐའ་སྐོར་དུ་གསར་བཞེངས་གནང་བའི་སྟོན་པའི་སྐྱེད་མོས་ཚལ་ (Buddha Park) དབུ་འབྱེད་དང་བཀའ་སློབ་སྩལ་ཡོད།
དེ་ཡང་གོང་ཚེས་ཉིན་མགོན་པོ་གང་ཉིད་མཆོག་བཞུགས་གནས་མགྲོན་ཁང་ནས་མཛད་སྒོ་གོ་སྒྲིག་ཞུ་མཁན་རྣམ་པས་གཙོས་གནད་ཡོད་མི་སྣ་སོགས་ཀྱིས་ལག་ཏུ་དཀར་གཙང་མཇལ་དར་དང་དགེ་འདུན་པ་རྣམས་ཀྱིས་དུང་རྒྱ་སྤོས་སྣེས་སྔོན་བསུས་ཏེ་གདན་ཞུས་ཀྱི་ཐོག་མར་སྟོན་པའི་སྣང་བརྙན་དང་འདུ་ཁང་མདུན་རབ་གནས་དང་དབུ་འབྱེད་མཛད་གྲུབ་བསྟུན་གནས་གཟིགས་མཛད་རྗེས་བཞུགས་ཁྲི་རིན་པོ་ཆེར་༸ཞབས་སོར་འཁོད་གྲུབ་མཚམས་འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་མཆོག་གིས་མཎྜལ་རྟེན་གསུམ་འདེགས་འབུལ་ཞུས། དེ་ནས་གདན་ཞུའི་སྤྱི་ཁྱབ་དྲུང་ཆེ་རིག་འཛིན་དབང་མོ་ལགས་ཀྱིས་འཚམས་འདྲིའི་གསུང་བཤད་གནང།
དེ་བཞིན་མངའ་སྡེའི་སྲིད་སྐྱོང་མཆོག་དང་མངའ་སྡེའི་བློོན་ཆེན་མཆོག་བཅས་ཀྱིས་གསུང་བཤད་གནང་། དེ་རྗེས་མགོན་པོ་གང་ཉིད་མཆོག་གིས་སྟོན་པའི་སྐུ་བརྙན་དབུ་འབྱེད་དང་ལྷན་མཛད་སྒོར་ཆེད་བཅར་ཞུས་པའི་དད་ལྡན་མི་མང་རྣམས་ལ་ལམ་སྟོན་བཀའ་སློབ་སྩལ་དོན། འདི་ག་མངའ་སྡེའི་སྲིད་སྐྱོང་མཆོག་དང་མངའ་སྡེའི་བློོན་ཆེན་མཆོག་གིས་གཙོས་གྲོས་ཚོགས་ཀྱི་ཚོགས་གཙོ་མཆོག འབྲེལ་ཡོད་དཔོན་རིགས་རྣམ་པ། དེ་བཞིན་དགེ་འདུན་པ་རྣམ་པ། སེར་སྐྱ་མི་དམངས་དང་ཆོས་གྲོགས་ཕོ་མོ་ལྷན་རྒྱས་ལ་ཞུ་རྒྱུར། དེ་རིང་འདི་གར་སྟོན་པའི་སྣང་བརྙན་བྱིན་རླབས་ཀྱི་གཟི་འོད་འབར་བ་འདི་ལྟ་བུ་ཞིག་གསར་བཞེངས་གནང་བ་རེད། གནས་ཀྱི་ཁྱད་པར་དང་འབྲེལ་ནས་དཔལ་ཆེན་རྡོ་རྗེ་གཞོན་ནུའི་སྒོ་ནས་རབ་གནས་ཞུས་ཡོད། འདི་གར་མང་ཚོགས་མང་དག་ཅིག་ཕེབས་འདུག་པ་ཁྱེད་རང་ཚང་མ་དགའ་པོ་ཡོང་གི་རེད་ལ། ངོས་རང་ཡང་སྐལ་པ་བཟང་པོ་བྱུང་བས་ཐུགས་རྗེ་ཆེ་ཞུ་རྒྱུ་ཡིན།
འདི་གའི་ས་ཆའི་བབ་ཀྱང་བྱིན་ཆགས་པོ་དང་ཁད་ཡངས་པོ་ཧ་ཅང་ཡག་པོ་ཆགས་འདུག རྟེན་ཁྱད་པར་ཅན་ཡོད་སའི་ས་བབ་ཀྱང་བག་ཕེབས་དང་ཡིད་དུ་འོང་བ་ཞིག་ཡོད་སྟབས། མི་མང་དག་ཅིག་འདི་གར་གནས་སྐོར་དང་རང་བཞིན་གྱིས་ཡུལ་སྐོར་སྤྲོ་འཆམ་དུ་ཡོང་བ་ཡིནའང་འདྲ། གང་ལྟར་འདི་གར་གནས་མཇལ་ཞུས་ཏེ་སེམས་ལ་ཚོར་བ་བཟང་པོ་ཞིག་ཏན་ཏན་ཡོང་གི་རེད་བསམ་པ་དྲན་གྱི་འདུག མངའ་སྡེའི་སྤྱི་ཁྱབ་བློན་ཆེན་པ་ཝན་ལྕམ་ལིང་ངེད་གཉིས་ངོ་ཤེས་རྙིང་པ་རེད།
གཙོ་བོ་ཡུལ་འདིར་སངས་རྒྱས་པའི་ཆོས་ཁྱབ་གདལ་ཆེན་པོ་ཡོད་པར་བརྟེན། དེ་དང་འབྲེལ་ཡོད་སློབ་དཔོན་ཐུགས་རྗེ་ཆེན་པོའི་སྣང་བརྙན་དང་སྟོན་པ་ཤཱཀྱ་སེང་གེའི་སྣང་བརྙན་བཞེང་རྒྱུ་རེད། དེ་བཞིན་སྤྱན་རས་གཟིགས་ཀྱི་སྣང་བརྙན་བཞེང་རྒྱུ་བཅས་ལ་ཁོང་གིས་ཧ་ཅང་འཁུར་བླངས་ཡོད། གོང་དུ་ཁོང་རྣམ་པ་གཉིས་ཀྱིས་གསུང་བཤད་གནང་སོང་། སངས་རྒྱས་པའི་ཆོས་དེ་གང་ལྟར་སྒེར་པ་སོ་སོ་ཡིན་རུང་སེམས་ལ་ཞི་བདེ་དང་བྱམས་བརྩེ་འཕེལ་རྒྱུ་ཙམ་མ་ཟད། དཀའ་ངལ་འཕྲད་སྐབས་རེ་བ་མ་བརླག་པར་གནས་ཐུབ་རྒྱུའི་ཕན་ཐོགས་ཡོད་པ་ཆགས་ཀྱི་ཡོད། དེར་བརྟེན་མངའ་སྡེའི་སྤྱི་ཁྱབ་བློན་ཆེན་མཆོག་གིས་སྐུ་བརྙན་འདི་བཞེང་རྒྱུར་ཐུགས་འཁུར་བསྐྱེད་རྒྱུ་དང་སངས་རྒྱས་བཅོམ་ལྡན་འདས་ཀྱི་བསྟན་པར་དམིགས་བསལ་དོ་སྣང་གནང་བར། ངོས་རང་བཅོམ་ལྡན་འདས་ཀྱི་རྗེས་འབྲང་དགེ་སློང་ཞིག་ཡིན་པའི་ཆ་ནས་ཐུགས་རྗེ་ཆེ་ཞུ་རྒྱུ་ཡིན།
སྤྱི་ཁྱབ་བློན་ཆེན་ཁོང་གིས་ལྷག་བསམ་བཟང་པོ་ཞིག་དང་གཞན་ཕན་གྱི་བསམ་པ་རྒྱ་ཆེན་པོ་ཞིག་གི་ཐོག་ནས་བཞེངས་གནང་བ་རེད། དེར་བརྟེན་ཁོང་གི་ལྷག་བསམ་དང་རེ་འདུན་གང་ཡོད་པ་རྣམས་བདེ་བླག་ཉིད་དུ་བསྒྲུབ་པའི་སྨོན་ལམ་ཡོད། མིའི་སྤྱི་ཚོགས་གང་དུ་ཡིན་རུང་ལོ་བརྒྱ་ཕྲག་རིང་ནས་གོམས་གཤིས་འཇགས་ཏེ་ཡོད་པར་ཡུལ་འདི་དང་དེའི་རིག་གཞུང་དང་གོམས་གཤིས་ཤིག་ཡོང་གི་ཡོད། རིག་གཞུང་དང་གོམས་གཤིས་དེ་དག་དངོས་ཡོད་གནས་ཚུལ་ལ་རན་པའི་ཐོག་ནས་བསླེབས་པ་རེད། མི་རིགས་སོ་སོའི་རིག་གཞུང་དང་གོམས་གཤིས་དེ་སོ་སོར་འབྲེལ་བ་དང་ཕན་ཐོགས་ཡོད་པ་ཞིག་རེད། སྤྱིར་བཏང་ཡུལ་ལུང་གང་དུ་ཡིན་རུང་མི་རིགས་སོ་སོའི་རིག་གཞུང་དང་གོམས་གཤིས་ནང་ས་ཁུལ་དེར་ཡོད་པའི་ཆོས་ལུགས་ཀྱི་ཤུགས་རྐྱེན་ཡོད་པ་གསལ་པོ་རེད།
དེ་རིང་འདི་ག་འབྲས་ལྗོངས་ལ་ཆ་བཞག་ནའང། གོམས་གཤིས་དང་རིག་གཞུང་དེ་དག་གི་ནང་དུ་ནང་ཆོས་དང་འབྲེལ་བ་ཡོད་ལ་ཤུགས་རྐྱེན་ཡོད་པ་ཧ་ཅང་གསལ་པོ་རེད། དེར་བརྟེན་འབྲས་ལྗོངས་ནང་སྒེར་པ་སོ་སོའི་ངོས་ནས་ནང་པ་དང་། ཧིན་རྡུ། ཡི་ཤུ། ཕལ་ཆེར་ཁ་ཆེ་བྱེད་མཁན་མཁན་ཡོད་ངེས་རེད། གང་ལྟར་ཆོས་ལུགས་འདྲ་མིན་བྱེད་མཁན་ཡོང་གི་རེད། འོན་ཀྱང་འབྲས་ལྗོངས་སྤྱི་ཡོངས་ཀྱི་ཆ་ནས་བཤད་ན་ནང་ཆོས་ཆགས་ཀྱི་ཡོད། དེར་བརྟེན་ནང་པའི་ཆོས་ལ་དོ་སྣང་སླེབ་རྒྱུར་སྣང་བརྙན་བཞེང་རྒྱུས་མཚོན་དེ་དག་ཡུལ་ལུང་རང་ལ་གཤིས་ལུགས་ཤིག་ཡོད་པ་དེ་བརྟན་པོ་དང་ཕན་ཐོགས་ཡོང་རྒྱུ་ཞིག་ཏན་ཏན་རེད་བསམས་ཀྱི་ཡོད། རིག་གཞུང་བརྗོད་སྐབས་མ་གཞི་ཕྱིའི་ཁང་པའི་བཀོད་པ་དང་གཞས་དང་ཞབས་བྲོ། ཁ་ལག་ཟ་སྟངས་སོགས་ལ་རིག་གཞུང་གི་འབྲེལ་བ་ཆགས་ཡོད།
འོན་ཀྱང་རིག་གཞུང་དངོས་གནས་དེ་བསམ་བློའི་ནང་ཡོད་དགོས་ཀྱི་རེད། དེར་བརྟེན་སངས་རྒྱས་པའི་ཆོས་དང་འབྲེལ་བའི་རིག་གཞུང་དེ་ཡང་ནང་པའི་ཆོས་དང་ནང་པའི་ཤེས་རིག་བརྗོད་སྐབས་གཙོ་བོ་སེམས་རྒྱུད་དང་འདྲེས་ཡོང་གི་འདུག སེམས་རྒྱུད་དང་འདྲེས་བའི་ཡོན་ཏན་དེ་ཕ་མས་བྱས་པ་དེ་ཕྲུ་གུ་ཚོས་ལན་ཟློད་བྱས་པའི་སྐད་ཆ་མིན། གོམས་གཤིས་དང་རིག་གཞུང་སེམས་ཀྱི་ཡོན་ཏན་དེ་དག་ལ་སློབ་སྦྱོང་བྱས་ན་ཁེ་ཕན་ཡོད་པ་མ་ཟད། དེས་མིའི་སེམས་ལ་དཀའ་ངལ་འཕྲད་སྐབས་དཀའ་ངལ་སེལ་རྒྱུར་ཕན་ཐོགས་ཡོད་པའི་གནས་ཚུལ་དེ་ཤེས་ན། སངས་རྒྱས་པའི་ཆོས་དང་འབྲེལ་བའི་རིག་གཞུང་དེ་མི་ཚེའི་ནང་ཕན་ཐོགས་འདུག་བསམ་པ་ཡོང་གི་རེད། དེར་བརྟེན་རིག་གཞུང་ཞེས་སེམས་ནང་གི་ཡོན་ཏན་དེ་ཉར་ཚགས་བྱེད་སྟངས་ལ་རྒྱུ་མཚན་དང་དགོས་པ་མཐོང་བའི་སྒོ་ནས་བདག་གཅེས་བྱ་རྒྱུ་ཞིག་བྱུང་ན་ཕན་ཐོགས་ཡོང་གི་རེད། དེར་བརྟེན་སློབ་སྦྱོང་བྱ་རྒྱུ་ཧ་ཅང་གལ་ཆེན་པོ་རེད། ཅེས་སོགས་ཀྱི་བཀའ་སློབ་སྩལ་ཡོད།
གཞན་ཡང་འབྲས་ལྗོངས་མངའ་གཞུང་གི་སྲིད་སྐྱོང་པ་མཆོག་དང་མངའ་སྡེའི་སྤྱི་ཁྱབ་བློན་ཆེན་པ་ཝན་ལྕམ་ལིང་རྣམས་གཉིས་ཀྱིས་འབྲས་ལྗོངས་མངའ་སྡེའི་གཞུང་ནས་སྟོན་པའི་སྐུ་བརྙན་བཞེངས་དགོས་པའི་དམིགས་ཡུལ་མང་ཚོགས་ལ་ངོ་སྤྲོད་གཏམ་བཤད་གནང་ཡོད། དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་འབྲས་ལྗོངས་ནང་གསར་བཞེངས་ཞུས་པའི་སྟོན་པའི་སྐུ་བརྙན་དབུ་འབྱེད་མཛད་སྒོར་ཆིབས་སྒྱུར་གྱིས་རབ་གནས་དབུ་འབྱེད་བསྐྱངས་པར་བཀའ་དྲིན་ཆེ་ཞུས་ཡོད་པ་མ་ཟད། ད་རེས་སླར་ཡང་འབྲས་ལྗོངས་མི་དམངས་ལ་བྱིན་རླབས་ཐོབ་སྟབས། འདི་གའི་མི་དམངས་ཡོངས་ཀྱི་ཚབ་ཞུས་ཏེ་ཐུགས་རྗེ་ཆེ་ཞུས་ཡོད།
ཐེངས་འདིའི་དབུ་འབྱེད་མཛད་སྒོར་འབྲས་ལྗོངས་མངའ་སྡེའི་སྲིད་སྐྱོང་སྐུ་ཞབས་བི་པི་སིང་མཆོག་དང་མངའ་སྡེའི་སྤྱི་ཁྱབ་བློན་ཆེན་པ་ཝན་ལྕམ་གླིང་མཆོག གྲོས་ཚོགས་ཀྱི་ཚོགས་གཙོ་བགྲེས་གཞོན་རྣམས་གཉིས། མངའ་སྡེའི་བློན་ཆེན་ཁག་དང་གཞུང་ཞབས་གནད་ཡོད་ཁག དད་ལྡན་མང་ཚོགས་ཁྲི་ཚོ་བརྒལ་བ་བཅར་ཡོད།
ཕྱེད་ཡོལ་ཆུ་ཚོད་ ༡།༣༠ ཐོག་མགོན་པོ་གང་ཉིད་མཆོག་གིས་ར་ཝང་ལ་ཁུལ་དང་། འབྲུག འབྲས་ལྗོངས་ཀྱི་ས་ཁུལ་ཁག ཀ་ལོན་སྦུག རྡོར་གླིང་སོགས་ནས་ཆེད་བཅར་ཞུས་པའི་དད་ལྡན་ཆོས་ཞུ་བ་ ༡༠༠༠༠ བརྒལ་བར་ལག་ལེན་སོ་བདུན་མའི་བཀའ་ཆོས་བཀའ་དྲིན་ཆེ་བ་སྩལ་ཡོད།
ད་ཐེངས་མགོན་པོ་གང་ཉིད་མཆོག་འབྲས་ལྗོངས་ལ་ཆིབས་སྒྱུར་བསྐྱངས་ཐེངས་བདུན་པ་དེ་ཆགས་ཡོད་ཅིང་ཐེངས་དང་པོ་དེ་ཕྱི་ལོ་ ༡༩༥༦ ལོར་སྟོན་པ་མྱ་ངན་ལས་འདས་ཏེ་ལོ་ ༢༥༠༠ འཁོར་བའི་དུས་སྟོན་སྐབས་འབྲས་ལྗོངས་བརྒྱུད་རྒྱ་གར་ལ་ཆིབས་སྒྱུར་བསྐྱངས་ཡོད་པ་བཅས། །
