༢༠༡༣ ཟླ་ ༣ ཚེས་ ༢༡ རེས་གཟལ་ཕུར་བུ།
༄༅། །ཕྱི་ལོ་ ༢༠༡༣ ཟླ་ ༣ ཚེས་ ༢༡ ཉིན་གྱི་ཆུ་ཚོད་ ༡༢།༠༠ ཙམ་ལ་༸གོང་ས་མཆོག་བཞུགས་སྒར་ནས་ལྡི་ལིར་ཆིབས་སྒྱུར་སྐབས་མི་མང་རྣམས་ཀྱིས་ལམ་གཡས་གཡོན་དུ་ལག་ཏུ་དཀར་གཙང་མཇལ་དར་དང་བདུག་སྤོས། དེ་བཞིན་མེ་ཏོག་ཐོགས་ཏེ་མཇལ་ཞུ་དང་ལྷན་ཕེབས་སྐྱེལ་ཞུས་ཡོད།
ཕྱི་ཚེས་ ༢༢ ནས་ ༢༣ བར་གྱི་ཉིན་གཉིས་རིང་རྒྱལ་ས་ལྡི་ལིར་ཏཱ་ལའི་བླ་མའི་ཀུན་ཕན་ཐེབས་རྩ་ཁང་གི་གོ་སྒྲིག་ཞུས་ཐོག རྒྱ་གར་གྱི་གནད་ཡོད་མི་སྣ་དང་དད་ལྡན་པ་རྣམས་ལ་རྗེ་ཙོང་ཁ་པ་ཆེན་པོས་མཛད་པའི་༼ལམ་རིམ་བསྡུས་དོན༽ གྱི་གསུང་ཆོས་སྩལ་རྒྱུ་དང་། ཕྱི་ཚེས་ ༢༤ ཉིན་རྒྱ་གར་བྱང་ཤར་འབྲས་ལྗོངས་མངའ་སྡེ་གཞུང་གིས་གསོལ་འདེབས་ཞུས་དོན་ལྟར། འབྲས་ལྗོངས་ཁུལ་དུ་ཆིབས་སྒྱུར་གྱིས་མངའ་སྡེའི་སྲིད་སྐྱོང་དང་སྤྱི་ཁྱབ་བློན་ཆེན་མཆོག་གིས་གཙོས་གནད་ཡོད་མི་སྣ་མཇལ་འཛོམས་ཐོག ར་ཝང་ལར་སྟོན་པའི་སྐུ་བརྙན་གསར་བཞེངས་གནང་ཡོད་པ་དེ་དབུ་འབྱེད་རབ་གནས་མཛད་པ་ལྷན་ས་གནས་མི་མང་ལ་བཀའ་ཆོས་དང་ཚེ་དབང་སྩལ་རྒྱུ་ཡིན་འདུག ཕྱི་ཚེས་ ༢༦ ཉིན་འབྲས་ལྗོངས་རྒྱལ་ས་སྒང་ཏོག་ཏུ་ཆིབས་སྒྱུར་བསྐྱང་སྟེ་མཐོ་སློབ་ཁག་གི་སློབ་མར་ཤེས་ཡོན་དང་འབྲེལ་བའི་ལམ་སྟོན་བཀའ་སློབ་སྩལ་རྒྱུ་ཡིན་འདུག
ཕྱི་ཚེས་ ༢༧ ཉིན་ནུབ་བྷང་གལ་ས་གནས་ས་ལུ་གྷ་རའི་(Salugara)སྲས་བརྒྱུད་གྲྭ་ཚང་དང་ཧི་མ་ལ་ཡའི་ཆོས་ཚོགས་ཐུན་མོང་གིས་གསོལ་འདེབས་ཞུས་དོན་ལྟར། མགོན་པོ་གང་ཉིད་མཆོག་གིས་ས་གནས་སུ་ཆིབས་སྒྱུར་བསྐྱང་སྟེ་མང་ཚོགས་ལ་འཇམ་མགོན་བླ་མ་ཙོང་ཁ་པ་ཆེན་པོས་མཛད་པའི་༼ལམ་རིམ་བསྡུས་དོན།༽ དང་ཀུན་མཁྱེན་ཀློང་ཆེན་རབ་འབྱམས་པས་མཛད་པའི་༼སེམས་ཉིད་ངལ་གསོ།༽ དེ་བཞིན་སྤྱན་རས་གཟིགས་ཀྱི་བཀའ་དབང་བཅས་ཆོས་འབྲེལ་སྩལ་རྒྱུ་ཡིན་འདུག་པ་བཅས། །
