༢༠༡༣ ཟླ་ ༣ ཚེས་ ༡༦ རེས་གཟའ་སྤེན་པ།
༄༅། །ཕྱི་ལོ་ ༢༠༡༣ ཟླ་ ༣ ཚེས་ ༡༤ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཡི་ཤུའི་བླ་ཆེན་པོབ་གསར་པ་མཆོག་ལ་འཚམས་འཕྲིན་སྩལ་བའི་ནང་འཁོད་དོན། སྐུ་ཉིད་མཆོག་ཡི་ཤུའི་བླ་ཆེན་པོབ་གསར་པར་འོས་འདེམས་བྱུང་བ་ནི་བྱུང་རབས་ཀྱི་ལོ་རྒྱུས་ལྡན་པ་ཞིག་ཆགས་པར་བརྟེན། ངོས་ཀྱིས་སྐུ་ཉིད་མཆོག་ལ་དགའ་བསུའི་འཚམས་འདྲི་ཞུ་རྒྱུ་ཡིན། ཞེས་འཁོད་ཡོད་པ་མ་ཟད། བླ་ཆེན་པོབ་གསར་པ་མཆོག་གིས་དེ་སྔ་དུས་རབས་བཅུ་གཉིས་ནང་ཨི་ཊ་ལིའི་གྲོང་ཁྱེར་ཨ་སི་སིའི་ནང་བྱུང་བའི་ཡི་ཤུའི་བླ་ཆེན་སྐྱེས་བུ་དམ་པ་སྐུ་ཞབས་ཕ་རན་སི་སི་མཆོག་གི་མཚན་བཞེས་གནང་བར་བསྔགས་བརྗོད་མཛད་དོན།
སྤྱིར་ངོས་ཀྱིས་ཡི་ཤུའི་བླ་ཆེན་མང་པོ་ཞིག་གི་སྐོར་དེ་ཙམ་རྒྱུས་མངའ་མེད་ཀྱང། དེ་སྔ་ངོས་རང་ཨ་སི་སིར་ཆོས་ལུགས་མཐུན་སྒྲིལ་ལྷན་ཚོགས་ཤིག་ཏུ་བསྐྱོད་སྐབས་ཡི་ཤུའི་བླ་ཆེན་སྐྱེས་བུ་དམ་པ་སྐུ་ཞབས་ཕ་རན་སི་སི་མཆོག་གི་སྐོར་ཤེས་རྟོགས་བྱུང། ཁོང་ནི་ཞི་ཞིང་དུལ་ལ། བསླབ་ཁྲིམས་ཚུལ་བཞིན་དུ་སྲུང་མཁན་ཞིག་ཡིན་འདུག ལྷག་པར་ཁོང་གིས་སྲོག་ཆགས་ཀུན་ལ་ཉེ་རིང་མེད་པའི་བྱམས་བརྩེའི་བསམ་པ་དེར་ངོས་རང་ཧ་ཅང་ངོ་མཚར་སྐྱེ་བཞིན་ཡོད། ཐེངས་འདིར་སྐུ་ཉིད་མཆོག་གིས་ཁོང་གི་མཚན་བཞེས་གནང་བར་ངོས་ལ་སེམས་འགུལ་ཧ་ཅང་ཐེབས་བྱུང། ཞེས་དང་།
ཡང་༸གོང་ས་མཆོག་གིས་དེ་སྔ་ཡི་ཤུའི་བླ་ཆེན་པོབ་ཇོན་པོལ་གཉིས་པ་མཆོག་དང་དེ་རྗེས་པོབ་བྷེ་ནི་ཌིག་བཅུ་དྲུག་པ་མཆོག དེ་བཞིན་ཡི་ཤུའི་ཆོས་གྲོགས་ཕོ་མོ་མང་དག་ཅིག་དང་མཇལ་འཕྲད་མཛད་པ་ཐུགས་དྲན་གསོ་མཛད་པ་དང་སྦྲགས། པོབ་གསར་པ་མཆོག་དང་ཡང་མགྱོགས་མྱུར་མཇལ་རྒྱུའི་ཐུགས་རེ་མཛད་བཞིན་ཡོད་སྐོར་བཀའ་སྩལ་དོན།
ངོས་ཀྱིས་དེ་སྔ་ཡི་ཤུའི་བླ་ཆེན་པོབ་གོང་མ་རྣམས་དང་མཇལ་ཏེ་མཛའ་བརྩེའི་འབྲེལ་ལམ་ཞུ་རྒྱུ་བྱུང་བ་མ་ཟད། འདས་པའི་ལོ་བཞི་བཅུ་ཙམ་གྱི་རིང་ཡི་ཤུའི་ཆོས་གྲོགས་ཕོ་མོ་ཚོ་དང་ལྷན་དོན་ཕན་ལྡན་པའི་བསམ་ཚུལ་བརྗེ་ལེན་གྱི་འདུ་འཛོམས་མང་པོའི་ནང་མཉམ་ཞུགས་བྱ་རྒྱུ་བྱུང་བར་ཧ་ཅང་དགའ་ཚོར་ཆེན་པོ་བྱུང་། ཕྱོགས་མཚུངས་འབྱུང་འགྱུར་ཡང་སྐུ་ཉིད་མཆོག་དང་མགྱོགས་མྱུར་མཇལ་རྒྱུའི་རེ་བ་ཞུ་བཞིན་ཡོད། ཅེས་སྩལ་གནང་མཛད་འདུག
འཚམས་འཕྲིན་ངོ་མ་དབྱིན་ཡིག་ནང་སྩལ་ཡོད་པ་ནས་འདི་ག་ཕྱི་དྲིལ་བོད་ཡིག་ཚན་པས་ཕབ་བསྒྱུར་ཞུས་པས་ཚིག་དོན་ལ་ཧེ་བག་ཡོད་ཚེ་དབྱིན་ཡིག་ལ་རྩ་འཛིན་ཡོང་བ་ཞུ།
