༢༠༡༣ ཟླ་ ༣ ཚེས་ ༡༣ རེས་གཟའ་ལྷག་པ།
༄༅། །འདི་གར་ཤེས་ལོང་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༣ ཟླ་ ༣ ཚེས་ ༡༠ ཉིན་ཤེས་ལོང་ས་གནས་མི་མང་གིས་བོད་བསྟན་སྲིད་མི་རིགས་ཀྱི་དོན་རང་སྲོག་བློས་གཏོང་གནང་མཁན་རྒྱལ་གཅེས་པ་ཕོ་མོ་ཡོངས་ལ་གདུང་སེམས་མཉམ་སྐྱེ་མཚོན་སླད། དེ་ཉིན་གྱི་སྔ་དྲོ་ཆུ་ཚོད་ ༧ ཐོག་སེར་སྐྱ་མི་མང་ཡོངས་དགོན་པར་འདུ་འཛོམས་ཀྱིས་བོད་ལྗོངས་ལྷ་སྲུང་རྣམ་གཉིས་ལ་འཕྲིན་སྐུལ་དང་བསངས་གསོལ་བཏང་སྟེ་གཞུང་འབྲེལ་མཛད་སྒོ་གྲུབ་མཚམས། ཕྱེད་ཡོལ་ཆུ་ཚོད་ ༡༢ བར་རྒྱལ་གཅེས་པ་འདས་གསོན་ཡོངས་ཀྱི་ཆེད་མ་ཎི་དང། གུ་རུའི་གཟུངས་བསྔགས། རྗེས་བཙུན་སྒྲོལ་མའི་བསྟོད་པ་དང་གཟུངས་བསྔགས་སོགས་གསོག་སྒྲུབ་གནང་ཡོད་མ་ཟད། བོད་བསྟན་སྲིད་མི་རིགས་དང་རང་དབང་གི་དོན་དུ་རང་སྲོག་བློས་གཏོང་གནང་མཁན་རྒྱལ་གཅེས་པ་འདས་གསོན་ཡོངས་ལ་མཆོད་འབུལ་སྨོན་ལམ་ཆེད་ཞལ་འདེབས་ཧིན་སྒོར་ ༩༠༥༠༠།༠༠ ཐམ་པ་རང་གཞུང་ཆོས་རིག་ལས་ཁུངས་སུ་ཕུལ་ཡོད། ཕྱོགས་མཚུངས་ཤེས་ལོང་མི་མང་ནས་དེ་ཉིན་མར་མེའི་ཁྲོམ་སྐོར་གྱི་ལས་འགུལ་ཞིག་ཀྱང་སྤེལ་ཡོད་པ་བཅས།།
